تغييرات ضرورية تعمليها فى ديكور البيت فى الصيف
الدنيا بقت حر خلاص و جه وقت نشيل اغطية الانتريه و الستاير التقيلة و نستبدلها بستاير تانية ملونة و خفيفة و خامات ناعمة و لطيفة اكتر علشان الحر ، وعلشان تستقبلى الربيع و الصيف صح ، فى المقال ده بنات حوا هيقولولك على تغييرات ضرورية و بسيطة تعمليها فى ديكور البيت علشان تستقبلى بيها الربيع ، اعرفيها معانا ..
تغييرات ضرورية تعمليها فى ديكور البيت فى الصيف
1- الالوان الفاتحة :
الربيع هو وقت الالوان الفاتحة و المبهجة ،و الخروجات و الفسح علشان كده حاولى يبقى بيتك هو كمان زى الربيع مليان بالألوان و الحياة و اخلصى من ألوان الشتا الغامقة و الكئيبة واستبدليهم بألوان فريش و فاتحة. استبدلى الألوان زى البنى و الاسود بألوان تانية زى درجات الباستيل و اللبنى و البينك علشان تضيفى لون لبيتك و تعملى تغييرات فى ديكور البيت فى الصيف .
2- الورد :
استخدمى الورود الملونة و الزرع الأخضر فى البيت علشان تضيفى لمسة من الحياة ، مش لازم تبقى الوان او انواع محددة ، اجمل حاجة فى الزرع و الورد انه ايا كان شكله او نوعه وايا كان ستايل او ديكور المكان اللى بيتحط فيه بيمشى معاه على
طول، علشان كده الموضوع سهل ، و كمان مش لازم تستخدمى كمية كبيرة، فازة بورود بسيطة او نبات ضل تقدرى تحطيه جوه البيت هيقوم بالمهمة و ينقل جمال الجناين و المساحات الخضرا جوه بيتك ببساطة .
3- خامات خفيفة :
شيلى بقى السجاد التقيل اللى مغطى مساحة الارض كلها و الستاير التقيلة اللى بتمنع الهوا و اغطية المخدات التقيلة و البطاطين و الاغطية الصوف و الفرو و غيرها و استبدليها بخامات تانية اخف زى الستاير الشيفون او الدانتيل و اغطية السرير القطن و السجاد المودرن الخفيف اللى بيغطى مساحة متوسطة من الأرض علشان مايعملش حرارة زايدة جوه البيت .
4- معدات الاضاءة :
طريقة بسيطة لكن سهلة جدا علشان تجددى البيت ، غيرى الأبجورات بغيرها منقوشة بالورود او بألوان فاتحة و اضائتها ساطعة وقوية و يفضل تكون بيضا مش صفرا ، و لو مفيش امكانية تجيبى جديد ممكن تضيفى تعديلات على الابجورات الموجودة عندك اصلا زى انك تزينيها بالورورد الصناعية اللى بنستخدمها مع الملابس او حبات اللولى و الشرايط الملونة . الموضوع بسيط جدا و سهل و مش هياخد منك اكتر من دقايق وهيسعدك تعملى تغيير كبير فى ديكور البيت فى الصيف .
5- ادهنى اوضة :
لو عندك وقت فاضى فى الويك اند و عايزة تعملى نشاط جديد و مختلف تبان نتيجته و تحسي انك عملتى حاجة جديدة مهمة و بايدك يبقى جربى انك تدهنى اوضة! غير انه مجهود عضلى عظيم هيساعدك تحرقى كالوريز و تنشطى عضلات جسمك لكنه كمان هيساعدك تجددى البيت و تضيفي له لمسة جميلة ، اختارى لون فاتح بتحبيه زى الزهرى او البينك او ممكن تختارى درجة دافية رقيقة من درجات الوان الباستيل .
6- غيرى الستاير :
الستاير ليها تأثير كبير اوى على شكل البيت ، علشان كده فى الربيع والصيف بدلى الستاير التقيلة بخامات تانية خفيفة زى ما قلنا من شوية ، وبدلى ألوان الشتا زى الزيتى و البنى و البيج بألوان تانية زى الابيض و البينك واللبنى او الـ baby blue ، الستاير الجاهزة او الستاير من خامات خفيفة زى الشيفون و الاورجانزا تكلفتها بتبقى فى المتناول جدا ، يعنى ده تغيير كبير و جميل و بتكلفة بسيطة .
غيرى الستاير
7- استخدمى اكسسوارات اقل :
فى الصيف و الربيع كل ماكانت فى حاجات اقل فى الاوضة كل ما كان ده افضل علشان تحسسك بالمساحة والبراح اللى بالتالى هيهون عليكى الحر و يديكى احساس بوجود الهوا ، علشان كده حاولى تستحدمى اكسسوارات اقل فى ديكور البيت زى انك تستبدلى العلب الخشبية لو كان عندك منها بفازة واحدة من الازاز الشفاف ، و لو بتستخدمى الشموع فى الديكور استبدلى الشموع الغامقة بالبيضاء او الشموع المتلونة بألوان فاتحة .
استخدمى اكسسوارات اقل
اعرفى معانا كمان 8 تغييرات في ديكور البيت هتخليه مريح اكتر وهتساعدك على تقليل التوتر .