7 حيل جمالية هتجدد بشرتك وتبينها اصغر

بقلمريهام محمود فيبشرة visibility4766

مع التقدم في العمر او حتى عوامل الجو البشرة بتتأثر وبيبدأ يظهر عليها بقع وتجاعيد وخطوط رفيعة, والشيخوخة الطبيعية اللي هي اكيد هتحصل مع التقدم في العمر دي ممكن نأخرها شوية بالاهتمام بالبشرة, لكن الشيخوخة اللي ناتجة عن العوامل الخارجية واسلوب حياتنا هي دي اللي نقدر نتحكم فيها اكتر, والنهاردة من خلال موضوعنا هنقول لكل بنات حوا حيل جمالية لتجديد البشرة.

حيل جمالية لتجديد البشرة:

1- ماسك الجزر والبيض:

هاتي جزرة صغيرة ابشريها, واضربي بيضة واحدة, وخدي معلقة صغيرة من الجزر المبشور ضيفيها للبيضة, اخلطيهم مع بعض كويس, ودلكي بشرتك ورقبتك بالخليط بصوابعك في حركات دائرية, وبعدين سيبيه لمدة 30 دقيقة, وبعدين اغسليه بمية باردة, وبعدها رطبي بشرتك بكريم مرطب او زيت لوز حلو.

ممكن تعملي الماسك كل يوم لمدة 10 ايام ورا بعض, بعدها ريحي البشرة لمدة اسبوع, وارجعي اعملي الماسك تاني من 2 – 3 مرات في الاسبوع, بعد شهر واحد بس هتلاحظي النتيجة على بشرتك وان البقع اختفت, وهتلاقي بشرتك ناعمة ونضرة اكتر.

حيل جمالية لتجديد البشرة
حيل جمالية لتجديد البشرة

2- ماسك البقدونس:

خدي معلقة صغيرة بقدونس, اخلطي معاها معلقة صغيرة عصير ليمون, ومعلقة صغيرة من دقيق الشوفان, حطي الخليط على البشرة وسيبيه لمدة 20 دقيقة وبعدها اغسليه بمية باردة, وادهني بشرتك بكريم مرطب.

ممكن تكرري الماسك ده يوميا لو بشرتك دهنية او عادية, لكن لو بشرتك جافة ممكن تعمليه مرتين بس في الاسبوع, والبقدونس بيساعد على تبييض وشد البشرة وتنعيمها وترطيبها.

حيل جمالية لتجديد البشرة
حيل جمالية لتجديد البشرة

3- ماسك الموز:

خدي موزة واحدة واهرسيها, ولو بشرتك جافة اوي ممكن تضيفي على الموزة شوية  Sour cream او كريمة الطبخ, حطي الموزة على بشرتك وسيبيها لمدة من 20 – 30 دقيقة, وبعدها اغسليها بمية باردة.

ممكن تكرري الماسك ده كذا مرة في الاسبوع, والموز بيساعد البشرة تبقى نضرة وصحية, ويعتبر مقشر ناعم للبشرة, وده اللي بيخليه ممتاز جدا للتخلص من بقع العمر.

حيل جمالية لتجديد البشرة
حيل جمالية لتجديد البشرة

4- اليوجا او تمارين الوجه المضادة للتجاعيد:

اليوجا للوجه بقت في الفترة الاخيرة من اكتر الاساليب المستخدمة اللي بتساعد على الحفاظ على شباب ونضارة البشرة وبتمنع ظهور التجاعيد, ولازم تعملي التمارين دي يوميا او على الاقل من 4 – 5 مرات في الاسبوع, ومتنسيش قبل التمارين غسل الوش والايد.

– تمرين للمنطقة اللي حوالين العين:

حطي الصوباع السبابة تحت الحواجب والابهام تحت العينين, بصي لفوق, وارفعي الحواجب, وبعدها غمضي عينك ببطء, واقفلي الجفن اللي فوق واللي تحت في نفس التوقيت, كرري التمرين كذا مره ورا بعض.

– تمرين للتجاعيد الافقية على الجبين:

حطي الصوباعين السبابة لايديكي الاتنين فوق الحواجب بكام مللي, اضغطي على الجلد باطراف الصوابع بحيث انك متعرفيش تحركي الحواجب, اسحبي زوايا الحواجب لفوق وللجنب, وخليكي شاده الجلد للجنب لمدة 5 ثواني, وبعدين استرخي, كرريه 3 مرات.

– تمرين للتجاعيد العمودية على الجبين:

اضغطي بصوابعك على الحواجب والجبهة, وشدي الجلد, حاولي انك تحركي حواجبك وكأنك هتكشري اوي, خليكي على الوضع ده لمدة من 15 – 20 ثانية, وبعدها استرخي, كرريه 3 مرات.

حيل جمالية لتجديد البشرة
حيل جمالية لتجديد البشرة

5- خل التفاح:

خل التفاح مكون ممتاز جدا لعلاج بقع العمر, لانه بيحتوي على احماض الفا هيدروكسي, ادهني البقع بخل التفاح, وسيبيه طول الليل واغسليه الصبح, وممكن تخلطي معاه شوية من زيت جوز الهند او زيت الزيتون عشان تتجنبي جفاف البشرة.

حيل جمالية لتجديد البشرة
حيل جمالية لتجديد البشرة

6- زيت الخروع:

زيت الخروع بيحتوي على خصائص شفائية مذهلة, دلكي البشرة بكام نقطة من زيت الخروع على البقع, وممكن تكرريه بالليل والصبح, بعد شهر واحد من استخدام زيت الخروع هتلاحظي ان البقع راحت بشكل كبير جدا.

حيل جمالية لتجديد البشرة
حيل جمالية لتجديد البشرة

7- فيتامين C:

البشرة مع التقدم في العمر بيحصل فيها نقص في فيتامين C وهو يعتبر فيتامين مهم جدا للحفاظ على صحة البشرة ومرونتها, وعشان تحافظي على نسبة فيتامين C ممكن تاخديه من خلال مكملات غذائية من الصيدلية, او تقشير البشرة بفيتامين C ده هيساعد جدا في التقليل من الخطوط الرفيعة وتغير لون الجلد.

– وممكن نعمل خلطة فيتامين C لتبييض وتنعيم البشرة وللحفاظ عليها نضرة وصحية, وهي عبارة عن 2 قرص من فيتامين C الفوار, عصير 4 ليمونات او 2 معلقة كبيرة مية ورد كبديل لليمون لو بشرتك حساسة منه , فنجان زيت لوز مر او زيت جوز هند او زيت زيتون, علبة كريم جليسوليد, اخلطي الكريم مع زيت اللوز, دوبي اقراص فيتامين C الفوارة في عصير الليمون, ضيفي خليط الكريم والزيت لخليط عصير الليمون والفيتامين, قلبيهم كويس مع بعض وحطيهم في علبة واحتفظي بيه في التلاجة ممكن يقعد معاكي لحد اسبوع, دلكي بشرتك كل يوم قبل النوم بالكريم واغسليه الصبح.

– وممكن تستخدمي اقراص الفوار لوحدها دوبيها في مية وخدي منها بقطنة وامسحي بيها البشرة, سيبيه لمدة 5 دقايق بس وبعدين اغسليه.

حيل جمالية لتجديد البشرة
حيل جمالية لتجديد البشرة

15 غلطة بتعمليهم وانتي بتنضفي بشرتك لازم تتجنبيهم عشان تحافظي على بشرتك صحية

غلطات بتعمليها في تنضيف بشرتك