8 عادات سيئة ممكن تتسبب في تدمير العلاقة لازم تتجنبيهم
اي اتنين مرتبطين لما بيدخلوا لمرحلة الجواز وبتبقى الحياة بينهم مشتركة وبيقضوا مع بعض وقت اكبر ده ساعات بيخلي العادات الصغيرة او البسيطة اللي كانت بتعدي قبل كده, انها تكبر وتبوظ العلاقة او تسبب مشاكل كتير, وممكن تكون حاجات بسيطة جدا وبنعملها ومش متخيلين انها ممكن تكون مزعجة, في الطبيعي لما اي شخص بيحب ممكن يعدي صفات صغيرة مش عجباه اوي في الطرف التاني في سبيل انه يكمل معاه, لكن بعد الجواز ومع مرور الوقت بتبدأ الحاجات الصغيرة دي تكبر, والنهاردة من خلال موضوعنا جمعنالكم اكتر 8 عادات ممكن تدمر العلاقة عشان تتجنبيهم وتحافظي على حياتك الزوجية سعيدة.
عادات ممكن تدمر العلاقة:
1- بتفتشي وراه:
ممكن انتي تشوفي انه عادي تفتشي في تليفونه او تشوفي ايميله, لكن اي حد محتاج مساحة خصوصية في حياته حتى لو كان الزوج, لانك لو هتفتشي وراه وتقعدي تدوري ورا كل حركة بيعملها في يومه وراح فين وجيه منين وتبقي عايزة تعرفي مكانه طول الوقت, عدم ثقتك دي هتوصلك في النهاية لمشاكل كتير في العلاقة.
2- بتقفي له على الغلطة:
الغفران والنسيان هي مفاتيح العلاقة الناجحة لو عايزة تحافظي عليها, ولو انتي بتقفي له على الغلطة مهما كانت صغيرة ده اكيد هيسبب مشاكل كتير وهتبقى العلاقة دايما متوترة بينكم.
3- مش بيعجبك اي حاجة مهما عمل:
دايما شايفة ان لو انتي معملتيش الحاجة بنفسك يبقى هتطلع غلط او مش معمولة مظبوط, يعني مثلا لو فكر يساعدك في شغل البيت تقعدي تعدلي عليه وتقولي له انه كان لازم يعمل كذا وكذا وتبدأي انتي تعملي الحاجة تاني ده هيخليه يبطل انه يساعدك او يشاركك في اي حاجة ويحس انه مش مرغوب فيه ومش مهم, وفي الحالة دي هيطفش خالص من البيت ويفضل انه يقضي وقته مع اصحابه بدل ما يقضيه معاكي او يساعدك.
4- بتنتقدي عيلته باستمرار:
هتكوني بتحطي نفسك في موقف صعب لو بتنتقدي عيلتة بشكل مستمر, حتى لو هو نفسه شايف ان عيلته مزعجة او بيعلموا حاجات تضايق مش هيبقى حابب انك تقولي عليهم كده, لان مافيش حد مهما كان ممكن يسمح لحد تاني انه يجرح في عيلته او لحمه ودمه, ولو انتي بتعملي كده باستمرار ده اكيد هيأدي لمشاكل كتير.
5- بتفتحي مواضيع في اوقات غلط:
اكيد في اوقات مناسبة للكلام في موضوع معين ووقت غلط, ومش معنى ان الوقت مناسب ليكي انك تتكلمي فيه يبقى مناسب ليه, يعني مثلا تكلميه عن مشاكل المصاريف او الولاد بعد ثواني من دخوله البيت وهو لسه راجع من الشغل دي غلطة كبيرة جدا لانه هيزود عليه الضغط اكتر, والوقت التاني اللي لازم تتجنبي فيه انك تفتحي اي مواضيع مهمة بعد ممارسة العلاقة الحميمة, اختيار الوقت المناسب مهم جدا عشان تتفادي اي مشاكل.
6- بتتخانقي معاه في مكان عام:
امسكي لسانك لحد ما ترجعوا البيت, ممكن تكوني عايزة تطلعي اللي جواكي لكن الخناق في مكان عام او قدام مامته وباباه من اسوأ العادات اللي لازم تتجنبيها لان ده هيخليه يتعصب اكتر وهيكبر المشكلة زيادة, فلو لقيتي انكم دايما بتتخانقوا في الاماكن العامة او قدام الناس يبقى لازم ده يتغير في اسرع وقت, وتتكلمي معاه في اي مشكلة بشكل خاص بينكم بس.
7- بتستخدمي الصمت في مشاكلكم:
متستخدميش ابدا الصمت في معاقبة شريك حياتك, لان ده هيأدي لمشاعر سيئة اكتر وهيزود المشكلة, الصمت مش هيحل اي حاجة, لكن الكلام والحوار هو اللي هيحل المشكلة.
8- تجاهل شريك حياتك:
مافيش حد ابدا بيحب يحس بالتجاهل, لان التجاهل اسوأ كمان من انك تصرخي او تزعقي, تجاهل الشخص يعني انتي بتوصلي له رسالة انه مش مهم عندك لدرجة انك حتى مش عايزة تزعجي نفسك بالكلام معاه, لو في المشاكل بتتجاهلوا بعض باستمرار وكل واحد بيتعامل في البيت كأن التاني مش موجود, في الحالة دي انتي عندك مشكلة حقيقية ولازم تحليها.
اكتر 10 كذبات ممكن تتقال من الشريك في العلاقة
