12 حيلة مكياج هتخليكي تحطي مكياجك بشكل اسهل ويطلع احلى

معظم البنات بيقضوا وقت كبير قدام المرايا عشان يظبطوا المكياج ويطلع بشكل حلو, لكن في بعض الاحيان ممكن نصايح صغيرة وبسيطة تساعدك تخلصي اسرع وتوفرلك في الوقت وفي نفس الوقت مكياجك يطلع حلو, والنهاردة من خلال موضوعنا هنعرف مجموعة اسرار و حيل مكياج هتسهل عليكي المهمة دي.

حيل مكياج:

1- اعملي تأثير الايلاينر الجل بقلم الكحل العادي:

عشان ترسمي خط تقيل ولون غني وتعملي نفس تأثير الايلاينر الجل على العين بقلم الكحل العادي, سيحي سن القلم على النار او بالولاعة, الطريقة دي هتساعدك جدا انها تطري قلم الكحل وهتخليه زي الايلاينر الجل بالظبط.

2- اعملي برونزر للجسم:

لو عايزة لون تان وجسم برونزي بيلمع زي جسم المشاهير والموديلز ممكن تعملي ده بطريقة بسيطة جدا, لو عندك ايشادو دهبي مش عايزاه او برونزر مكسور ممكن تستغليه وتضيفي عليه زي اطفال وتخلطيهم مع بعض كويس وتدهني بيهم الجسم هيديكي لون برونزي طبيعي حلو جدا.

3- خلي رموشك اكتر كثافة باستخدام البودرة:

بسهولة جدا تقدري تدي لرموشك كثافة وحجم اكتر باستخدام بودرة الوجه, بعد ما تحطي طبقة الماسكارا الاولى, حطي طبقة رقيقة من البودرة بالفرشة, وبعدها حطي طبقة ماسكارا تانية, وممكن كمان تستخدمي البيبي بودر هتديكي نفس النتيجة.

4- اتني رموشك وحطي كحل في نفس الوقت:

لو بتستخدمي اداة تني الرموش, تبقي محظوظة جدا لانها هتوفرلك وقت كتير من روتين مكياجك اليومي, كل اللي هتعمليه انك هترسمي خط بقلم الكحل او الايلاينر على المنحنى اللي فوق من اداة تني الرموش, وبعدها استخدميها بالطريقة العادية على رموشك, بالطريقة دي هتبقي ضربتي عصفورين بحجر تنيني الرموش وحطيتي الكحل او الايلاينر في نفس الوقت.

5- بيني عيونك بشكل اكبر:

مكياج العيون السموكي ممكن يدي عنيكي وسع وحجم اكبر, لو رسمتي بنفس الطريقة اللي باينة قدامنا في الصورة, هتحطي لون فاتح على الجفن اللي فوق كله, ولون غامق عند الزاوية الخارجية للعين وعلى تنية الجفن, هترفع العين وهتديكي تأثير اوسع واكبر.

6- بيني حواجبك اتقل:

لو عايزة تبيني حواجبك اسهل ممكن تعملي خدعة بيستخدمها خبراء المكياج دايما, وهي انك بعد ما تملي حواجبك بجل الحواجب او بالقلم او ايا كان النوع اللي بتستخدميه, اضغطي على شعر الحواجب على البشرة قبل ما الجل ينشف, الحركة دي هتدي تأثير اتقل لحواجبك لانها هتطبع اللون على الجلد وهتدي حجم اضافي لحواجبك.

7- قطرة العين للبثور واحمرار الجلد:

لو ظهرت لك حباية بشكل مفاجيء تقدري تخففيها بطريقة بسيطة باستخدام قطرة العين, بقطنة مبللة بالقطرة واضغطي على الحباية هتقلل الاحمرار الناتج عن التهاب الجلد لانها هتضيق الشعيرات الدموية بنفس الطريقة اللي بتساعد على تقليل الاحمرار في العين.

8- كبري الشفايف بالبودرة البرونزية:

الخدعة دي بيستخدمها المشاهير دايما على السجادة الحمرا, اعملي خط بالبودرة البرونزية تحت الشفة اللي تحت, وخط فوق الشفة اللي فوق, والخط يكون رفيع جدا وتسيبي مسافة من 2 ل 3 مم بس بعيد عن الشفايف, زي ما هو باين في الصورة قدامنا, وبعدها ممكن تستخدمي الهايلايتر على الشفة اللي فوق عشان تحدديها اكتر وتديكي تأثير ممتليء.

9- استخدمي هايلاتير للوك مضيء:

لو حسيتي الصبح ان وشك مرهق او مش نايمة كفاية, ممكن تحلي المشكلة دي بحيلة بسيطة تخلي وشك فريش وتداري الارهاق, استخدمي الهايلايتر او الايشادو الابيض تحت عضمة الحاجب, وفي الزاوية الداخلية للعين, ومركز الجفون او منطقة نص الجفن زي ما هو باين في الصورة قدامنا.

10- حطي البودرة تحت كريم الاساس:

على غير ما احنا اتعودنا هتحطي البودرة قبل كريم الاساس, الخدعة دي هتساعد ان مكياجك يدوم فترة اطول, وهتخلي طبقة كريم الاساس اكتر كثافة بشكل طبيعي من غير ما يبقى كانك حاطه قناع على وشك, والطريقة دي غالبا بيستخدمها خبراء المكياج مع العرايس في حفلات الزفاف لانه ده يعتبر اختبار حقيقي لثبات المكياج.

11- رسمة ايلاينر مثالية باستخدام الويبس:

الحيلة دي هتسهل عليكي انك تظبطي رسمة الايلاينر وتتخلصي من اي لغبطة بسهولة, ارسمي العين بالايلاينر قبل ما تحطي الفونديشن ولو في اي لغبطة او الرسمة مش مظبوطة تقدري تمسحي اللغبطة والزيادات بكل بساطة باستخدام الويبس.

12- نضفي البلندر في دقيقة واحدة:

ممكن تنضفي البلندر او اي اسفنجة مكياج بكل سهولة في دقيقة واحدة بس من غير اي مجهود, بكل بساطة حطيها في طبق مع اي نوع صابون سايل وحطيها في الميكروويف لمدة دقيقة واحدة, وبعدها طلعيها اشطفيها بالمية.

11 سر وحيلة جمالية من موديلز فيكتوريا سيكريت بيحافظوا بيها على جمالهم