9 عادات لو عملتيهم هتساعدك على خسارة الوزن وتحسين صحتك بشكل فوري

بقلمريهام محمود فيتخسيس الوزن visibility11304

واحدة من الاسباب اللي بتخلي صعب علينا اتباع اي نظام غذائي والاستمرار عليه ونزهق بسرعة انه مستحيل تظهر نتايج فورية من اي نظام غذائي مهما كان مستحيل انك تخسي 4 او 5 كيلو في يوم واحد, لكن في حاجات ممكن تعمليها هتحسن صحتك بشكل فوري وتساعدك على خسارة الوزن بشكل اسرع, وده اللي هنعرفه النهاردة مع بعض هنقول لبنات حوا عادات لتخسيس الوزن وتحسين الصحة بشكل فعال وفوري.

عادات لتخسيس الوزن وتحسين الصحة:

1- متاكليش زبادي:

برغم ان الخبراء ومتخصصين التغذية صرحوا ان الزبادي بتحتوي على بكتيريا مناسبة للمعدة لكن مع ذلك منتجات الزبادي المصنعة تجاريا بتحتوي على كمية سكر عالية بتسمح للبكتيريا السيئة انها تنمو في المعدة, بالاضافة لده كمان الزبادي بتحتوي على اللاكتوز اللي ممكن يسبب مشاكل المعدة والهضم, وفي النهاية ده هيخليكي تحسي بانتفاخ وان معدتك مش مرتاحة, لكن لو انتي من محبات الزبادي ممكن تختاري اللبن الزبادي او ال Plain yogurt عشان تتفادي مستويات السكر العالية اللي ممكن تأذيكي.

والنوع ده من الزبادي هنلاقيه موجود في الهايبر ماركت ولو مش متوفرة احنا ممكن نعملها في البيت بطريقة سهلة, هنجيب لتر لبن ونغليه وبعدين نرفعه من على النار وننقله في اي طبق ازاز او بيركس ومنحطوش في حاجة استانلس او الومنيوم ونسيبه لحد ما يبرد يبقى في درجة حرارة الغرفة وبعدين ندوب فيه 3 معالق زبادي عادية ونقلبه كويس ونغطيه بفوطه ونحطه في الفرن ونشغل لمبة الفرن عشان تعمل حرارة ونسيبه من 4 – 12 ساعة لحد ما يتجمد ويبقى زبادي, بعدين نجيب شاشة نحطها على طبق غويط نصب فيها الزبادي ونسيبها كام ساعة كمان لحد ما تصفي اي مية موجودة فيها وممكن نحطها في التلاجة في الفترة دي, وكده تبقى الزبادي بتاعتنا جاهزة للاكل.

عادات لتخسيس الوزن
عادات لتخسيس الوزن

2- اعملي تمرين للجسم كله:

واحد من افضل التمارين للجسم كله هو تمرين ال Thruster, والتمرين مش هياخد منك اكتر من 8 دقايق, الخطوة الاولى من التمرين انك تقفي بشكل مستقيم وتفتحي الرجل اوسع من الكتفين, امسكي دامبلز في كل ايد, اتني الكوعين وانزلي بجسمك خدي وضع القرفصاء كأنك هتقعدي على كرسي, وبعدين اقفي وافردي ايدك لفوق, كرري التمرين لاكتر عدد تقدري عليه, وممكن تاخدي راحة لو تعبتي وترجعي تكملي, استمري عليه لمدة 8 دقايق, ومع الوقت ممكن تزودي اوزان الدامبلز.

عادات لتخسيس الوزن
عادات لتخسيس الوزن

3- خدي شاور قبل النوم:

لما بيكون الجسم بارد بتنامي بشكل احسن من ان لو جسمك حاسس بالحر, عشان كده مفضل انك تاخدي حمام بارد قبل النوم, لتحفيز ترموستات الجسم اللي هتساعدك تنامي بشكل اسرع, ولما تنامي كويس ده هيخفض مستويات هرمون التوتر في جسمك, ومعروف ان الهرمون ده بيأدي لتخزين الدهون في الجسم, وكده تبقي ضربتي عصفورين بحجر نمتي كويس وفي نفس الوقت ده هيساعدك انك تخسي.

عادات لتخسيس الوزن
عادات لتخسيس الوزن

4- كلي وجبة فطار تقيلة وصحية:

لو عايزة تبدأي يومك بطريقة صح وصحية, فافضل وجبة فطار ممكن تحقق لك ده هي الشوفان, هاتي شوفان مطبوخ يعني سويه في المية, او ضيفي عليه لبن دافي خالي الدسم وضيفي عليه شوية شوكولاتة غامقة مبشورة, وثمرتين توت, وكمية صغيرة من المكسرات اي نوع تختاريه, ورشة قرفة, المزيج ده من المكونات بينتج مادة بتساعد على تقليل الالتهاب ومقاومة الانسولين في الجسم, والمكونات دي مش بس صحية لكن كمان لذيذة جدا.

عادات لتخسيس الوزن
عادات لتخسيس الوزن

5- ابعدي عن الاكل الصيني:

لو انتي من محبات الاكل الصيني الافضل انك تبعدي عنه وتخرجيه من نظامك الغذائي لان الاكل الصيني بيحتوي على كمية ملح كبيرة اللي بيحتفظ بالمية في الجسم وده هيسبب لك شعور بالانتفاخ, فلو عايزة تقومي تاني يوم الصبح بطنك مش منتفخة, اتجنبي الاكل الصيني واستبدليه باكل صحي تعمليه بنفسك.

عادات لتخسيس الوزن
عادات لتخسيس الوزن

6- اتجنبي اللبان الخالي من السكر:

لما تمشي على نظام غذائي عشان تخسي متفكريش ان اللبان الخالي من السكر هيكون مفيد لانه احيانا بنشوف نصايح بتقولك لو حسيتي بجوع ممكن تاكلي خالي من السكر, لانه على العكس هو مضر, لان اللبان الخالي من السكر بيحتوي على مادة السوربيتول, والمادة دي صعبة الهضم وممكن السوربيتول الغير مهضوم ده يتسبب في تخمر البكتيريا في الامعاء, وده هيسبب لك انتفاخ في البطن.

عادات لتخسيس الوزن
عادات لتخسيس الوزن

7- اتجنبي بار الطاقة:

بار الطاقة في الحقيقة المفروض يتسمى بار السعرات الحرارية, لان عكس ما هو معروف بار الطاقة بيكون مليان بالسعرات الحرارية, بالاضافة انه بيكون داخل فيها فول الصويا اللي ممكن يسبب انتفاخ البطن والغازات, وبار الطاقة بيتم معالجته كيميائيا بطريقة تخليه غير صحي للجسم, وكمان بار الطاقة بيحتوي على مصل اللبن اللي ممكن يكون صعب الهضم للاشخاص اللي مش بيتحملوا اللاكتوز.

عادات لتخسيس الوزن
عادات لتخسيس الوزن

8- ابعدي عن الفاكهة المجففة:

الفواكة المجففة زي الفواكة الطازة غنية بالبروتين والالياف, لكن مع ذلك هي بتحتوي على كمية عالية من الفركتوز, اللي ممكن يسبب انتفاخ وغازات, ولو عايزة اختيار صحي الافضل تاكلي الفواكة الحمضية والتوت والفاكهة الطازة بشكل عام بدل المجففة.

عادات لتخسيس الوزن
عادات لتخسيس الوزن

9- اشربي سموزي:

لو عايزة تزودي عملية فقدان الوزن, يبقى انتي محتاجة تزودي من استهلاك البروتين, وافضل طريقة لده انك تشربي سموزي او عصير البروتين, ومع ذلك لو اختارتي عصاير البروتين المنتجة تجاريا فيها سكريات ومواد كيميائية ممكن تسبب الانتفاخ والالتهاب, عشان كده الافضل تستبدليها بعصير بروتين نباتي كبديل صحي.

عادات لتخسيس الوزن
عادات لتخسيس الوزن

شوفي من هنا 11 وصفة مختلفة من مشروب السموزى تساعدك على التخسيس.

لو مشيتي على النصايح دي هتلاقي نفسك صاحية تاني يوم حاسه نفسك اخف وبصحة احسن.

9 حيل هتخليكي تخسري وزن من غير نظام غذائي

حيل لتخسيس الوزن