امتى تعرفى انك لازم تتخلصى من الشوز اللى عندك و ترميهم

لما نيجى نفكر فى تنضيف او ترتيب الدولاب علشان نجدده و نستعد لاستقبال الصيف بملابسه ، عادة بنفكر اننا هنتخلص من الهدوم القديمة زى الجيبة للى باظت خلاص او البنطلون اللى بقى ضيق زيادة عن اللزوم و مش مريح، لكن كمان لازم تتخلصى من الاكسسوارات اللى مابقيتيش تلبسيها و شاغلة مكان على الفاضى،وواحدة من اهم الحاجات اللى لازم تبصى عليها و تشوفى انتى محتاجة ايه منها و ايه اللى خلاص لازم ترميه هى الشوز، وده لانها مابتتطبقش و لا ينفع تتحط فى شنط و بتشغل مساحة كبيرة من دولابك على الفاضى ، وبما انه كلنا دلوقتى بنرتب دواليبنا علشان نستقبل الصيف ، اعرفى معانا فى المقال ده امتى تعرفى انك لازم تتخلصى من الشوز اللى عندك و ترميهم ..

امتى تعرفى انك لازم تتخلصى من الشوز اللى عندك و ترميهم

1- اتأكدى من حالته :

اتأكدى من سلامة الكعب فى اى شوز من عندك، وافحصى السنيكرز و الاحذية القديمة او اللى بقالها فترة فى دولابك علشان تتأكدى انها سليمة و ممكن تتلبس لسه ولا خلاص مابقيتش نافعه، شوفى السليم ايه و ايه اللى فيع عيوب بسيطة ممكن تتصلح ، وخليكى واقعية ، لو فى شوز واضح انه حالته بقت سيئة و خلاص مش نافع اتخلصى منه من غير هحاول اصلحه او اهه يبقى ينفع فى اى وقت تانى، انتى كده هتتسببى فى زحمة فى دولابك على الفاضى، والفكرة من الموضوع ده كله هو اننا نتخلص من الشوز اللى خلاص مش نافع او قديم علشان نقلل الزحمة و نقدر نرتب الدولاب، وكمان تعرفى انتى ممكن تكونى محتاجه ايه فيما يخص الاحذية. 

2- شوفى لو مناسب الموضة:

طبعا مانقصدش انه اى شوز عندك مش على موضة الموسم ترميه، بالعكس .. اى شوز شكله حلو و شيك بالنسبة لك وحاسه انه مناسب لستايلك ولسه مقاسه كويس لازم تحتفظى بيه طبعا، الفكرة بس انه الشوز بعكس اى قطعة ملابس تانية ممكن يبينك شيك جدا او يطلعك بشكل غريب لو كان مش مناسب، وبيعتبر الشوز من القطع اللى ليها تأثير مباشر على الشكل العام للـ outfit بتاعك، و يقدر يغير من مستواه بشكل جذري لو كان هو الشوز المناسب. 

3- اتأكدى انه لسه مقاسه مناسب :

البسي كل الشوز اللى عندك وكأنك لسه بتجربيهم فى المحل اول مرة وانتى بتشتريهم، اتأكدى انه مقاسهم لسه مناسب و انهم مريحين بشكل كامل ، لانه رجلينا ممكن شكلها و مقاسها يتغير كل ما بنكبر و بالتالى الشوز اللى كان مناسب من سنة او 6 شهور ممكن دلوقتى تحسي انه مقاسه صغير شوية او بقى ماسك و بيوجعلك رجلك، خدى وقتك وامشي فيهم شوية فى اوضتك ، هتلاقى حاجات كتير لازم تتخلصى منها خلاص. 

4- فكرى فى اللايف ستايل الخاص بيكى وشوفى انتى محتاجة ايه :

آخر نقطة معانا فى امتى تفكرى تتخلصى من الشوز الزيادة عن حاجتك علشان تتخلصى من الزحمة وتعرفى انتى محتاجه ايه من انواع الشوز المناسبة هى انك تفكرى فى اللايف ستايل الخاص بيكى وتشوفى انتى محتاجة ايه ، بمعنى لو انتى شخص عملى بيمشي كتير و معظم يومه بيقضيه فى المشاوير يبقى انتى محتاجة شوز رياضى او سنيكرز اكتر من الشوز اللى بكعب مثلا، و لو انتى مثلا سيدة اعمال و بتحتاجى تلبسي فورمال كتير يبقى انت محتاجة شوز بكعب اكتر من الفلات ، وهكذا. 

اعرفى معانا كمان حيل سريعة ورخيصة عشان تعتني بالشوز بتاعك وترجعيه كانه جديد ولسه شرياه