موضة شنطة الوسط ال Fanny Pack وازاي تنسقيها مع لبسك
شنطة الوسط ال Fanny Pack من الستايلات التريندي جدا للموسم ده, والنهاردة من خلال موضوعنا هنشوف بعض بالصور ازاي تنسقيها مع لبسك وتطلعي بلوك حلو وانيق.
– شنطة الوسط ال Fanny Pack:
غير ان الشنطة بتدي لوك حلو عصري اوي هي ليها ميزة مهمة انها عملية جدا لانك هتبقي شايلة شنطة حاطة فيها كل حاجاتك وفي نفس الوقت ايدك حره ومش متقيدة بمسك الشنطة, ومناسبة جدا لخروجاتك اليومية ولوقت الشوبنج لان ايدك هتبقة فاضية تقدري تستغليها تمسكي بيها الشنط من غير ما تبقي ملخومة بشنطة الكتف او مسببة لك اي ازعاج, ولما تجربيها اكيد مش هتستغني عنها في خروجاتك اليومية, وهنلاحظ ان معظم المشاهير الاجانب بيستخدموها تقريبا في خروجاتهم اليومية لانها عملية ومريحة.
وخامة الشنطة في العادة بتكون مصنوعة من الجلد وفيها منها بيكون داخل فيها جلد مع قماش, وكمان نازل منها خامات تانية زي الفرو او القماش او القطيفة, وكمان في منها ستايلات مطبوعة بطبعة النمر.
الفاني باك ممكن تلبسيها على ايه ؟ ممكن تتلبس على اي حاجة ممكن تنسقيها مع الفساتين, والجيبات, والجينز, واللبس الكاجوال والسبورتي, يعني ممكن تنسقيها على اي حاجة عندك هتطلع حلوة.
وطريقة لبسها الاساسية بتكون حوالين الوسط, لكن كمان في طريقة تانية للبسها وهي انك تلبسيها كروس, طبعا تقدري تختاري طريقة اللبس اللي تريحك اكتر او اللي انتي شايفة ان شكلها احلى عليكي, وكمان حسب الحجم او شكل الشنطة الشنط اللي بتبقى كبيرة شوية ممكن تتلبس كروس, لكن اللي حجمها صغير افضل تتلبس حوالين الوسط.