5 اسباب ليه تروحى تقضي شهر العسل فى موريشيوس

موريشيوس بتعتبر فى نظر كتير من السائحين جزيرة فى منتهى الجمال و الطبيعة الخلابة و ده لانه جزيرة موريشيس او Mauritius island بتتمتع بالطقس الدافئ و المشمس طول السنة وكمان بتتمتع بثقافة مختلفة و غنية هتخلى زيارتك كلها مغامرات و تبقى تجربة فريدة، فلو انتى عروسة جديدة و فرحك قرب و بتدورى على مكان رومانسي و حالم تقضي فيه شهر العسل ، او لو بتدورى على مكان فيه تقضى فيه اجازة الصيف الجاية وتعملى سياحة ؟ فى المقال ده اعرفى معانا 5 اسباب ليه تروحى تقضي شهر العسل فى موريشيوس .. 

5 اسباب ليه تروحى تقضي شهر العسل فى موريشيوس

1- الاجواء الرومانسية :

الجو هناك رومانسي و حالم ، شواطئ جميلة و غابات استوائية ، جبال عالية و هواء منعش ونقى ، ده غير انكم هتبقوا متحاوطين بالمنتجعات و الفنادق الجميلة من كل جهة تتمتعوا فيها بحمامات السباحة و الـ spa وكمان ممكن عشاء رومانسي على ضوء الشموع و الموسيقى الهادية، الجزيرة دى بتعتبر مكان رومانسي مثالى. 

2- النشاطات المختلفة :

الجزيرة دى بتعتبر مكان بيضم العديد من النشاطات اللى ممكن تستمتعوا بيها كـ couple ، مشهورة جدا بأنها البلد التالتة على مستوى العالم فى رياضة الجولف، اللى بيعتبر فكرة لطيفة تقضوا بيها الوقت فى اخر النهار و تلعبوا سوا، كمان الغوص بيعتبر فكرة ممتازة لتقضية الوقت هناك لانه بيوجد فى البحر اكتر من 400 نوع من السمك و اكتر من 200 فصيلة من الشعب المرجانية و حوالى 22 اثر او سفينة غارقة فى المية ده غير انه الفترة المثالية للزيارة هى من شهر ابريل لشهر نوفمبر اللى هى موسم الصيف هناك بسبب الاشجار و الشعب دائمة الخضرة، وبتعتبر افضل اماكن الغوص هى Colorado ، و Roche Zozo الموجودين على الساحل الجنوبى. 

3- الشواطئ : 

مكان مثالى لعشاق البحر و الشواطئ لانه السواحل فيها بتمتد لمساحة 160 كيلومتر، فى الشمال هتلاقوا الرمل الابيض اللى ممكن تلعبوا عليه التزحلق على الرمال او الـ sand boarding ،اما الساحل الشرقى بيتميز بانه صخرى اكتر وهتلاقوه منعزل و ده بيوفرلكم خصوصية ، اما الساحل الغربى فهتلاقى الشاطئ كثيف الرمال اللى مثالى علشان تشوفوا واحد من اجمل مناظر غروب الشمس فى العالم مع بعض. 

4- جمال الحياة البرية : 

الحياة البرية موجوده هناك كمان تحت المية بأنواع متعددة من الاسماك و الشعب المرجانية اللى اتكلمنا عليها من شوية وكمان فوق المية هتلاقى جنة من الطيور الجميلة بفصائل مختلفة و متنوعة، كمان بتعتبر الجزيرة موطن لنوع من السلاحف العملاقة و اللى بتعتبر اكبر كائن فى العمر على وجه الارض، و لو بتحبى الزهور الجزيرة فيها اكتر من 700 نوع من الزهور والنباتات.

5- الاكل : 

طبعا مشهورة بالسي فود و الاكلات البحرية الممتازة و الفريدة جدا، ده غير انه المطاعم و الفنادق هناك بتقدملك اكلات من كل بلاد العالم، لكنهم مشهورين بطبق النودلز بالكارى بشكل خاص. بننصحك تجربى الاكل الشعبى هناك زى طبق النودلز والدجاج بالكارى وطبعا لازم تجربى المأكولات البحرية الفريش والمميزة جدا. 

اعرفى معانا كمان اجمل الاماكن لقضاء شهر العسل في مصر .