10 طرق تعرفي بيهم اذا كنتي بتحبي نفسك ولا لا.. وازاي تتعلمي تحبي نفسك اكتر !
اكيد بتقابلك كتير على النت نصايح وكتب عن التنمية البشرية اللي بتقولك اهمية انك تحبي نفسك وتقدريها اكتر, لكن اكيد في فرق كبير واختلاف ما بين حب النفس والنرجسية او الغرور, حب النفس معناه انك تهتمي بنفسك وبسعادتك الخاصة وتقبلي نفسك زي ما انتي, والنهاردة من خلال موضوعنا هنقولك 10 طرق تعرفي بيهم اذا كنتي بتحبي نفسك ولا لا, و ازاي تتعلمي تحبي نفسك.
ازاي تتعلمي تحبي نفسك اكتر:
1- مرتاحة مع عواطفك:
لو عايزة تحبي نفسك يبقى لازم تكوني متواصلة مع عواطفك ومتحاوليش انك تخبيها مهما كانت, يعني اضحكي بصوت عالي لو حاسه انك عايزة تضحكي, عيطي لو حسيتي انك محتاجة لده, العواطف تعتبر جزء مهم من شخصيتك, عشان كده لازم تحترميها, والعواطف هي اللي دايما هتقولك او ترشدك للحاجة المناسبة ليكي واللي ممكن يخليكي سعيدة.
2- مش بتتكلمي عن الماضي:
لو انتي شخص بتحبي نفسك يبقى مش هتسمحي للماضي انه يشدك لتحت, وهتكوني شخص بيتقبل اخطائه واتعلم انه يعيش مع الماضي من غير ما يتمسك بيه يعني هتعتبري الماضي درس اتعلمتي منه حاجة ومش هتسمحي انه يأثر على الحاضر بتاعك, وهتحبي اللي انتي عليه النهاردة ومش هتقلقي باللي حصل امبارح, هتحطي الماضي في مكانه وتتحركي وتعيشي حياتك وتتنقلي للمرحلة اللي بعدها.
3- بتثقي في صوتك الداخلي:
هتعرفي انك شخص بيحب نفسه وبيقدرها, لو بتثقي في حدسك وقلبك, اكيد بتحبي تاخدي نصيحة من الاشخاص الموثوقين حواليكي, لكن في نفس الوقت انتي بتثقي بشكل كافي في قدراتك الخاصة في اتخاذ القرارات لنفسك, وتجاربك السابقة عادة هي اللي اثبتت لك ان مشاعرك الداخلية في اغلب الوقت بتكون صح.
4- فخورة بنجاحاتك:
حب النفس مش معناه ان عندك اعجاب مفرط بنفسك, لكن اكيدة هتكوني سعيدة بنجاحاتك وانجازاتك وهتحتفلي بيها, وكمان مش بتخافي من انك تعترفي بغلطك, وهتكوني مرتاحة جدا مع كل اخطائك وقدراتك.
5- عارفة انتي عايزة ايه من الحياة:
الاشخاص اللي بيحبوا نفسهم عادة عندهم احساس بهدفهم, عارفين كويس هما عايزين ايه من الحياة وبيعملوا كل اللي يقدروا عليه عشان يتأكدوا انهم يوصلوا لهدفهم, والسبب في انهم عندهم طموح كبير هو انهم بيبقوا عايزين يحققوا السعادة في حياتهم, وبيكونوا عايزين يدوا نفسهم كل فرصة ممكنة تخليهم افضل من اللي هما فيه.
6- مش هتفكري كتير في رأي الناس فيكي:
هنلاقي الاشخاص اللي بيحبوا نفسهم مش بيهتموا برأي الناس او اللي حواليهم فيهم, وكمان مش بيضيعوا وقتهم انهم يحكموا على اللي حواليهم, لما يكون شخص مبسوط بحياته زي ما هي وحاببها يبقى ليه يزعج نفسه برأي الناس فيه او في حياته.
7- بتحبي جسمك زي ما هو وبتهتمي بيه:
حب النفس هو كمان انك تهتمي بجسمك, ولو انتي بتحبي نفسك مش هيسيطر عليكي التفكير في وزنك ومظهرك بشكل مبالغ فيه وهتحبي جسمك زي ما هو, لكن في نفس الوقت هتهتمي بصحتك بشكل كويس, يعني هتاكلي اكل صحي وتفضلي نشيطة عشان صحتك اولا قبل شكل جسمك او وزنك.
8- دايما صادقة مع نفسك:
الاشخاص اللي بيحبوا نفسهم بيكونوا صادقين وحقيقين ومش بيكذبوا على نفسهم او على اللي حواليهم, وبيتمسكوا بمبادئهم ومعتقداتهم, ومش هيتظاهروا ابدا بشخصية مش بتاعتهم او يظهروا على غير حقيقتهم, هيكونوا دايما صادقين وعندهم الشجاعة انهم يدافعوا عن مبادئهم او الحاجة اللي هما مقتنعين بيها.
9- بتعرفي تستمتعي باللحظة:
اي شخص بيكون عنده خطط لمستقبله, لكن اكيد ده مش هيمنعك انك تستمعي بكل دقيقة في يومك, وبتدمجي وبتتفاعلي بشكل كامل مع لحظة بتمري بيها في يومك وبتعيشي الوقت الحاضر بكل حاجة فيه, والاشخاص اللي بيحبوا نفسهم بيكون عندهم حب للحياة وبيعيشوا يومهم وبيتفاعلوا مع كل حاجة بتحصل حواليهم وبيعيشوا كل لحظة صح وبيدوها حقها اوي.
10- بتحبي نفسك زي ما انتي:
قبل كل حاجة, انك لازم تحبي الشخص اللي انتي عليه دلوقتي مهما كان, ممكن يكون عندك عيوب او اخطاء, لكن لو بصيتي لنفسك كويس واخدتي كل حاجة بعين الاعتبار وبصيتي لكل حاجة فيكي من عيوب واخطاء ومميزات وكل اللي مريتي بيه, هتلاقي نفسك مبسوطة باللي انتي فيه دلوقتي.
7 حاجات على السوشيال ميديا ممكن تأثر على حبك وتقديرك لنفسك
