7 حاجات لازم تتخلى عنها علشان تبقى سعيدة .. اعرفيهم

بقلمآية حسان فيمنوعات visibility1347

على طول حاسه انك متضايقة او مهمومة رغم كل محاولات انك تبقى مبسوطة ومش عارفه ايه السبب؟ احنا هنقولك، عادة احساس الضيق و قلة السعادة بيبقى بسبب تمسكنا بحاجات مانعه عننا السعادة دى او على اقل تقدير مأخراها و بيبقى لازم نعرفها و نشوفها علشان نتخلى عنها و نقدر نشوف السعادة فين و نروحلها، او على الاقل نقرب منها .. اعرفى معانا فى المقال ده 7 حاجات لازم تتخلى عنها علشان تبقى سعيدة .

7 حاجات لازم تتخلى عنها علشان تبقى سعيدة .. اعرفيهم

1- قلة ثقتك فى نفسك  : 

اول نقطة هنتكلم فيها من حاجات لازم تبعدى عنها علشان تبقى سعيدة هى قلة ثقتك فى نفسك، دى المشكلة اللى مفيش شك بتقابلنا كلنا ، مهما وصلنا لدرجة من النجاح فى الدراسة او فى البيت او اتقدمنا فى شغلنا و اترقينا ، اوقات كتير بنفضل نشك فى نفسنا و فى قدراتنا و نقعد نسأل اسئلة زى ، يا ترى  الموضوع مستاهل التعب ده كله ؟ هو انا كده ماشية على الطريق الصح؟ يا ترى هقدر انجح؟ الاسئلة دى اكيد مرت على بالك و كلها بتتسبب فى احساسك بالخوف و التردد والافكار دى بتشكل عقبات كبيرة حتى لو كانت مش حقيقية او موجوة فى الواقع، لكنها بتبقى موجودة فى دماغك انتى ، و ده الاخطر. علشان كده لازم تتعملى تثقى فى نفسك و فى قدراتك و تعرفى انه طبيعتنا البشرية بتفرض علينا انه مايبقاش فى حد كامل و لا فى حاجة مثالية 100 % ، لانه طبيعى انه كلنا ما نقدرش نعمل كل حاجة و اننا نغلط، لكن المهم تعرفى تطورى نفسك و من قدراتك.

قلة ثقتك فى نفسك

2- فكرة انك لازم تبقى صح دايما : 

الحقيقة انه دى مش غلطتك اوى ، لكنها ممكن تكون فى طبعك لاننا من صغرنا بيتم مدحنا لما نكون صح و بيلومونا لو كنا غلط، علشان كده ممكن تكون الصفة دى موجوده عندك و بتأثر عليكى و بالتالى لازم تتخلصى منها .. ايه هى ؟ احساسك او حاجتك الى انك تبقى صح على طول، لاننا بشكل طبيعى بنساوى نجاح الفرد بانه يبقى على طول صح و بنخاف من الغلط لكن الحقيقة هى انه حاجتنا المستمرة لاننا نكون دايما صح  ومعانا حق بتأخرنا و بتضيع علينا فرص و تجارب كتيرة.  الدكاترة النفسيين بيعتقدوا انه الحاجة الى اننا نبقى دايما على حق بتعتبر واحدة من اخطر و اكبر الاخطاء فى ثقافة البشر بشكل عام، و علشان كده طرحوا سؤال مهم ، هل تفضلى انك تبقى صح، ولا انك تبقى سعيدة؟ اول اجابة هتيجى فى بالك دلوقتى هى انك طبعا بتفضلى تكونى سعيدة ، لكن فى الواقع حاجتنا الى اننا نبقى صح دايما هتخليكى تختارى الاجابة الاولى!

علشان كده حاولى تتخلصى من الحاجة دى و عادى، جربى انك تعترفى بغلطك فى خناقة او خلاف مع جوزك، اخواتك او زمايك فى الشغل، احنا فى الاول  وفى الاخر بشر و شئ صحى اننا نغلط من وقت للتانى، والا هنتعلم و نتطور ازاى.

فكرة انك لازم تبقى صح دايما

3- توقعاتك الغير واقعية : 

معظمنا من صغرنا  او من وقت ما بنبدأ نكون لنفسنا وعى و شخصية مستقلة ما بقيتش كل احلامنا بتدور حوالين فستان الفرح والعريس و بس، لكن دلوقتى الشغل و الكارير و النجاح الوظيفى بقى بيشكل  الجزء الاكبر و اعتقد بالنسبة لبعض مننا الاهم من احلامنا، و فى مجتمع مهووس بالشغل او  career-obsessed culture زى ما بيقولولوا الاجانب بقينا بنستبدل السعى ورا السعادة بالسعى ورا الكمال! لانه بطبيعتنا احنا طماعين و بنفضل نجرى و نجرى علشان نوصل لما هو اكتر من السعادة ، وده فى بعض الاحيان بيبقى هو الضعف بعنيه، مش بنقصد انك ماتبقيش طموحة ولا عندك احلام، لكن توقعاتك واحلامك لازم تكون قابلة للتصديق و للتحقيق علشان تقدرى  توصليلها، ويبقى احتمال انك تحقيقها اكبر من احتمال فشلك  وبكده يبقى طريق تحقيق الحلم ده مليان بالسعادة والمغامرات بدل خيبات الامل و الاحساس بالتعاسة و الفشل. 

طيب ازاى تتجنبى الغلطة دى؟ اعملى list  بكل تأمل او حلم مستحيل او غير واقعى جه على بالك الاسبوع ده مثلا و ابدأى حلليله، فكرى فى انه ممكن ييقى دمه خفيف، او مثير للاهتمام ، او ممكن تتبسطى انك شايفة فى نفسك القدرة على تحقيق الحلم ده ، اتخلصى من الحاجات الغير واقعية و اللى يقابلك و تحسيه فعلا جزء من احلامك اشتغلى على نفسك و طورى منها علشان تقدرى تحققيه .

توقعاتك الغير واقعية

4- بطلى تلومى نفسك : 

لما حاجة بتحصل غلط او لما خطة بتفشل اول حد بندور عليه علشان يبقى هو السبب و نلومه هو نفسنا. اسألى نفسك كده بتلومى حد تانى و لا بتحطى الغلط عليكى و بتلومى نفسك الاول ؟ انك تلومى نفسك على كل فشل فى دراسة و فى شغل او غلط ف حياتك بيعتبر طريق اسهل من انك تدورى عل مين المسؤول او تقعدى تحققى و تشوفى ايه اللى حصل غلط و بسببه خططك باظت، لكن لوم نفسك و جلد الذات مش هيفيدك بأى حاجة الحقيقة انه هيسببلك احباط و هيخلى الوضع أسوأ . علشان كده جه الوقت اللى تبطلى فيه تلومى نفسك او اى شخص تانى و تبدأى تتحملى مسؤولية اختياراتك و افعالك،حللى الامور و فكرى فيها و اعرفى ليه المشكلة حصلت و ايه التصرفات اللى أدت لده ، واتقبلى حقيقة انه احيانا مش كل الخطط بتمشي زى ما احنا راسمينها مهما اشتغلنا عليها او كنا واخدين بالنا، لكن المهم انك تعرفى الغلط فين و تعرفيه و تستفيدى  منه علشان تقدرى تتجنبيه بعد كده.

بطلى تلومى نفسك

5- عادات الاكل السيئة :

حاجة كمان مهم تعمليها  علشان تبقى سعيدة هى انك تتخلصى من عادات الاكل السيئة ، انتى ممكن ماتلاحظيش الموضوع ده لكن نظامك الغذائى و الحاجات اللى بتاكليها ممكن يبقى ليها تأثير كبير على مودك، صحيح البرجر و الوشوكولاتة بيبقى احساسهم حلو وانتى بتاكليهم لكن بعد الوجبة ممكن يتعبوكى و يأثروا بشكل سلبى على صحتك بعكس الخضروات والاكل الصحى طبعا، فى دراسة عملتها الـ Huffington post بتقول انه الناس اللى بتعتمد على الاكلات السريعة المليانة بالدهون فى نظامهم الغذائى من البالغين بتزيد نسبة ميلهم للانتحار بنسبة 42% عن الافراد اللى بياكلوا اكل صحى. علشان كده حاولى تعتمدى فى الدايت بتاعك على الخضروات ، الاكلات الغنية بالاوميجا 3 وغيرها من الاكلات اللى ممكن تفيد صحتك نفسيا او جسديا. 

عادات الاكل السيئة

6- الحجج و الاعذار :

كتير مننا بيحطوا سعادتهم و سعيهم ورا احلامهم on hold بسبب الاعذار، زى انا لسه صغير، الظروف مش مساعدانى، مفيش حد بيساعدنى و غيرها من الشماعات اللى بنعلق عليها تأجيلنا لسعينا ورا الاحلام ، و ده لانه انتى بتعملى كده خوفا من انك تجرى ورا حلمك و تفشلى لا قدر الله او انك بتفضلى تشكى فى قدراتك و تقولى لنفسك انك ما تقدريش تحققى حلمك، او الاسوا .. أنك ما تستاهيلهوش، لكن خدى بالك لازم تبعدى عن الحجج و الاعذار و تبدأى تتحملى مسؤولية حياتك و تسعى وراء احلامك، و حتى لو فشلتى لازم تبقى مجرد المحاولة بالنسبة لك  نوع من انواع النجاح. 

الحجج و الاعذار

7- ماتفكريش فى الماضى :

آخر حاجة هنتكلم فيها من حاجات لازم تتخلى عنها علشان تبقى سعيدة هى انك تتركى الماضى و تسيبيه ورا ضهرك، صحيح ده ممكن يبقى حاجة صعب جدا انها تتعمل و انك تسامحى اى حد اذاكى فى الماضى و تـ move on لكن لو قدرتى تعملى كده، هتحسي بتحسن كبير جدا حتى من الناحية النفسية، وكأنه فى تقل اتشال من على قلبك خلاص  و بقيتى قادرة تتنفسى براحتك من جديد ، اعملى كده و هتبقى على اول طريق السعادة. 

ماتفكريش فى الماضى

اعرفى معانا كمان 10 حاجات تعمليهم فى البيت هيخلوكى سعيدة فورا و ببساطة !