7 اسباب ليه الكراش بيرفضك او مش واخد باله منك .. اعرفيهم
انك تبقى معجبة بحد و مش قادرة تصرحيله بده او تبينيله و فى نفس الوقت مش قادرة تتجاهلى مشاعرك ناحيته بيبقى صعب مفيش شك، فما بالك بقى لو كنتى حاسه انه مقفول منك و مفيش اى مشاعر من ناحيته تجاهك و حاسه كمان برفضه المستمر، و للاسف مش عارفه هو ليه بيعمل كده او ايه هى اسباب الرفض دى.. علشان كده فى المقال ده بنات حوا هيساعدوكى تعرفى ليه الكراش ممكن يكون مش حاسس بيكى، اعرفى معانا 7 اسباب ليه الكراش بيرفضك او مش واخد باله منك.
7 اسباب ليه الكراش بيرفضك او مش واخد باله منك .. اعرفيهم
1- لو بتلحى عليه كتير بتصرفاتك :
اول سبب معانا من اسباب ليه الكراش بيرفضك او مش واخد باله منك هى انك ممكن تكون من كتر مانتى واثقة فى نفسك وفى مشاعرك و عايزه يحس بيكى و يبقى بينكم حاجة بشكل واضح ، تكونى بتلحى عليه كتير بتصرفاتك زى انك بتكلميه كتير على التليفون وعلى النت و بتطلبى كتير تقابليه و كل مايروح فى حتة يشوفك و هكذا، لازم تحاولى تكونى هادية.
2- ببساطة .. ماعندهوش مشاعر تجاهك :
انا عارفه انه ده ممكن يكون اكتر احتمال مؤلم او سيء بالنسبة لك و اللى دايما بتحاولى ماتفكريش فيه او بتتمنى يكون مش هو السبب الحقيقي، لكنه فى الواقع ابسط سبب للرفض، لانه ممكن يكون ببساطة مش حاسس بنفس الطريقة تجاهك و معتبرك مجرد صديقة او زميلة او اخت له.
3- مش جاهز انه يدخل فى ارتباط :
عادة لما بنسمع الجملة المشهورة ” المشكلة مش فيكى، المشكلة فيا انا” بنفكرها كليشيه و كدب و جملة بتتقال علشان تنهى الموضوع بطريقة لطيفة و خلاص، لكن تعرفى انها ممكن تكون حقيقية؟ ممكن يكون الكراش او الشخص اللى انتى معجبة بيه ببساطة مش جاهز انه يدخل فى ارتباط لاسباب تخصه هو زى انه ممكن يكون لسه خارج من ارتباط و ماعندوش استعداد يعيد التجربة تانى مثلا .
4- مش فاهم انتى عايزة منه ايه :
سبب تانى من اسباب ليه الكراش بيرفضك هى انك ممكن تكونى معتقده انه مشاعرك و تصرفاتك واضحة و بتبين انك معجبة بيه لكن فى الحقيقة هو ممكن يكون مش فاهم خالص انتى عايزة ايه منه ، احيانا الناس ممكن ماتاخدش بالها من التلميحات اصلا!
5- مستنى منك حركة جريئة او واضحة :
كتير من الولاد بيحبوا البنت الجريئة و الواضحة اللى مابتخبيش ولا بتخاف انها تصرح بمشاعرها، سواء بكلمة، تلميح، حركة او مثلا انك تطلبى من صديق او صديقة مشتركة انها توصل بمشاعرك له، لانه خجول او ممكن يكون بيبادلك نفس الاعجاب و مش متأكد ان كنتى معجبة بيه فعلا وخايف يصرحلك او يبين مشاعره و يتحرج او ينجرح.
6- معجب بحد تانى :
وده اكتر سبب ممكن يكون مؤلم بالنسبة لك، انه يكون مش شايفك ولا حاسس بيكى لانه already معجب بواحدة تانية او اصلا مرتبط و فى حد تانى فى حياته. وده وارد انه يكون هو السبب و ممكن يكون خرج حديثا من ارتباط تانى و لسه مش عارف يتخطاه ولا جاهز عاطفيا انه يدخل فى تجربة جديدة علشان كده مش واخد باله منك.
7- بيحب يكون سينجل single :
فى ولاد كتير بيحبوا يبقوا سينجل و بعيدين عن الارتباطات لانهم بيحسوا انه الاتباط والتزاماته بتخنقهم و تقيد حريتهم، ممكن جدا تكون المشكلة مش فيكى انتى لكن هو بطبيعته مش حابب ولا عاوز يرتبط وشايف انه هيبقى افضل لو فضل لوحده.
اعرفى معانا كمان 10 علامات لو عملها معاكي تقولك انه مستعد يديكي قلبه .
