10 نصايح ازاي تحطي الروج المات زي المحترفين
الروج المات من الانواع التريندي جدا بقالها فترة وتقريبا كل ماركات المكياج بقت تنزل الروج المات بمجموعة الوان كبيرة جدا ومناسبة لاي وقت ولكل الاذواق ما بين الفاتح والغامق والنيود, ولو انتي من محبات الروج المات اكيد موضوعنا النهاردة هيهمك هنقول فيه لكل بنات حوا مجموعة نصايح ازاي تحطي الروج المات زي المحترفين وتطلع الشفايف بشكل حلو وجذاب.
ازاي تحطي الروج المات زي المحترفين:
1- الاساس:
اساس المظهر الحلو للروج هي القاعدة الجيدة, وده معناه ان لو شفايفك جافة ومقشرة لازم تعالجي المشكلة دي عشان الروج يطلع بشكل حلو عليها, عشان كده اول نصيحة عشان تطبقي الروج المات زي المحترفين هو ان تكون القاعدة مثالية, وعشان نحقق ده ممكن نستخدم فرشة اسنان قديمة نفرك بيها الشفايف عشان نتخلص من الجلد الميت, وبعدها حطي طبقة سميكة من زبدة الكاكاو وسيبيها على الشفايف شوية عشان تمتصها كويس, وبعدها طبقي الروج.
2- لون الشفايف:
لو لون الشفايف عندك غامقة اوي, وعايزة تحطي لون روج مات فاتح, هنا هتبقي محتاجة كريم اساس او كونسيلر عشان تحيدي اللون الاساسي للشفايف وتخفي الغمقان, بعد اعداد الشفايف زي ما قولنا في الخطوة الاولى, حطي كمية بسيطة جدا من كريم الاساس او الكونسيلر على الشفايف عشان تخفي اي لون غامق, والطريقة دي كمان هتخلي لون الروج يطلع اقوى ويثبت فترة اطول.
3- استخدام منديل:
نصيحة كمان مفيدة عشان تحطي الروج المات زي المحترفين, انك تحطي طبقة واحدة رقيقة وبعدين تجيبي منديل تضغطي بشفايفك عليه عشان تشيلي اي زيادات او تكتلات, ولو الروج في لمعة بسيطة وانتي عايزاه مات تماما ممكن بعد ما تحطيه تاخدي كمية بسيطة من البودرة تحطيها بفرشة صغيرة.
4- اختيار النوع الصح:
لو عايزة النوع المات اللي بيكون خالي من اللمعة تماما, يبقى لما تيجي تشتري بصي على الروج بيكون مكتوب عليه كلمة “Matte”, غير كده بيكون فيه لمعة وداخل فيه زيوت عشان يفضل محافظ على لمعانه على الشفايف.
5- تحديد الشفايف:
لو هتحطي لون روج بألوان فاتحة زي البينك او المرجاني, عشان تظهري الروج اكتر وتحدديه ارسمي الشفايف بقلم تحديد نفس لون الروج بالظبط قبل ما تحطي الروج, الا لو هتحطي لون روج احمر يبقى في الحالة دي استخدمي قلم تحديد يكون اقرب لون للون شفايفك الطبيعية, وممكن ترسمي بقلم التحديد فوق رسمة الشفايف الطبيعية بحاجة بسيطة لو عايزة تبيني شفايفك اكبر.
6- التنضيف حوالين الشفايف:
خطوة مهمة جدا لازم تعمليها بعد ما تحطي الروج انك تنضفي اي تلطيخ حوالين الشفايف, هاتي قطعة قطن حطي عليها كمية بسيطة من مكياج العيون وامسحي بيها بالراحة اي تلطيخ, وبعدها بفرشة صغيرة حطي خط كونسيلر حوالين الشفايف وادمجيه كويس الحركة دي كمان هتظهر شكل شفايفك اكتر وتحددهم.
7- سلطي الضوء على نص الشفايف:
واحدة من نصايح المحترفين للروج المات, انك بعد ما تحطي الروج حطي لمسة بسيطة جدا بالهايلايتر في نص الشفايف اللي تحت, والحيلة دي مفيدة مع الروج المات بشكل خاص لانه ممكن يبين شفايفك بحجم اصغر من حجمها الطبيعي لكن الحركة دي هتظهر الشفايف وتخلي شكلها ممتليء, ممكن تستخدمي ايشادو ابيض بيلمع او بودرة مضيئة.
8- لو شفايفك رقيقة اتجنبي الالوان الغامقة:
لو شفايفك رقيقة وبتحبي الالوان المات متقلقيش هتقدري تستخدميها بردو لكن اعتمدي على الالوان الفاتحة زي البينك, الارجواني, بدل الالوان الغامقة اللي ممكن تبين شفايفك اصغر بعكس الالوان الفاتحة هتظهر شفايفك وتبينها بحجم اكبر.
9- حطي Top coat مات:
دلوقتي موجود Top coat مات للشفايف ممكن تحطيه فوق اي روج بيلمع هيتحول معاكي لمات زي فكرة ال Top coat المات اللي بيستخدم فوق المانيكير اللامع عشان يطفيه, والحيلة دي هتخلي الروج يدوم معاكي لساعات وهتاكلي وتشربي طول اليوم وهتلاقي زي ما هو, وهتلاقوه في محلات المكياج او في الصيدليات الكبيرة.
10- كملي مكياجك بلوك بسيط:
بعد ما تنفذي كل الخطوات اللي قولناها فوق, خلي الشفايف هي اللي ظاهرة في الوش وعليها التركيز وكملي باقي المكياج بلوك بسيط, كل اللي هتحتاجيه انك ترسمي خط ايلاينر رفيع, واظهري الرموش بطبقة او اتنين من الماسكارا, يعني خليكي بسيطة واتجنبي الهايلايتر الكتير او البلاشر اللامع.
افضل 11 حيلة تعمليهم بالروج لشفايف جذابة
