طريقة عمل الخبز العربي من غير فرن بنفسك في البيت
كلنا تقريبا بنشتكي من جودة الخبز اللي بنشتريه من بره ومش بنلاقي بديل ليه لاننا مش بنعرف نعمله في البيت, عشان كده النهاردة هنقولك طريقة عمل الخبز العربي بطريقة سهلة وبسيطة جدا وتقدري تنفذيها بنفسك في البيت وهيطلع معاكي ناجح جدا لانك مش هتحتاجي فرن لانه هيتعمل على البوتجاز من فوق.
– طريقة عمل الخبز العربي:
الكمية دي تقريبا هتعمل 8 ارغفة.
المكونات:
– دقيق لجميع الاغراض “1 كوب + 1 ½ كوب + ¼ كوب”.
– زيت زيتون “2 معلقة كبيرة + 1 ½ معلقة صغيرة”.
– 2 ¼ معلقة صغيرة خميرة جافة – او باكو خميرة او 7 جرام.
– 1 معلقة صغيرة سكر.
– 1 ½ معلقة صغيرة ملح.
– 1 كوب مية دافية.
الطريقة:
1- في طبق كبير ضيفي المية الدافية, والسكر, والخميرة, و 1 كوب دقيق, قلبيهم مع بعض, وسيبي الخليط لمدة 15 دقيقة لحد ما الخميرة تنشط والخليط تلاقيه عمل فقاعات.
2- ضيفي عليه 2 معلقة كبيرة زيت زيتون والملح و 1 ½ كوباية دقيق, وقلبي الخليط كله بمعلقة خشب لحد ما تتشكل عندك العجينة.
3- رشي الرخامة بشوية دقيق, وانقلي العجينة عليها واعجنيها بايدك لمدة من 5 – 6 دقايق على الاقل لحد ما العجينة تبقى ناعمة ومرنة, وممكن تضيفي شوية دقيق كمان اثناء العجن في حالة بس لو لقيتي العجينة بتلزق في ايدك او على الرخامة لكن غير كده مضيفيش دقيق تاني.
4- ادهني الطبق ب ½ معلقة صغيرة زيت زيتون, انقلي فيه العجينة وحركي العجينة فيه بحيث تغلفيها كلها بالزيت, غطي العجينة بفوطة وسيبيها في مكان دافي لمدة ساعتين او لحد ما تخمر كويس وحجمها يتضاعف.
5- دلوقتي بعد ما العجينة تكون خمرت انقليها على الرخامة وافرديها بالراحة بسمك 1 بوصة تقريبا, قسمي العجينة ل 8 قطع متساوية, شكلي القطع على شكل كور صغيرة, ورشي شوية دقيق صغيرين على كل كورة, غطي الكور بفوطة وسيبيها تستريح لمدة 30 دقيقة.
6- رشي شوية دقيق على الرخامة, هاتي كورة العجين افرديها بالراحة بصوابعك, وبعدين افرديها بالرول “النشابة” لحد ما تبقى شريحة سمكها حوالي ربع بوصة, بعد ما تفردي كل كور العجين سيبيها تستريح لمدة 5 دقايق.
7- هاتي طاسة كبيرة ضد الالتصاق حطي فيها 1 معلقة صغيرة زيت زيتون وحطيها على نار متوسطة عالية وخليه يسخن كويس جدا قبل ما تحطي العجين عشان يتنفخ معاكي.
8- حطي الخبز في الطاسة وسيبيه لمدة دقيقتين لحد ما يعمل بقع بني خفيفة اقلبيه على الجنب التاني لمدة دقيقتين, وبعدين اقلبيه على الجنب الاول تاني وسيبيه لمدة 30 ثانية كمان, هتلاقي الخبز بدأ يتنفخ معاكي.
9- دلوقتي شيلي الخبز من الطاسه وحطيه على فوطة واعملي واحد تاني لحد ما تخلصي قطع العجين كلها,
10- وبكده يبقى الخبز جاهز تقدري تاكلي منه وهو سخن ولذيذ وبالهنا والشفا.
– ممكن تخزنيه في كيس محكم في التلاجة, ولما تيجي تاكلي منه سخنية في الميكروويف شوية او على النار.
– ممكن بعد ما تعجني العجينة ومش عايزة تسويها دلوقتي وعايزة تعملي الخبز في وقت تاني, حطيها في التلاجة هتقعد معاكي لمدة اسبوع تقريبا.
– طريقة تانية للخبز:
الطريقة دي لو عايزة تعملي خبز اسمر.
المكونات:
– 3 كوبايات دقيق كامل.
– 1 ½ كوباية مية دافية.
– ½ معلقة صغيرة خميرة جافة.
– من 1 – 1 ½ معلقة كبيرة زيت زيتون.
– ½ معلقة كبيرة ملح.
– رشة ملح.
الطريقة:
1- في طبق صغير ضيفي ½ كوباية مية دافية, مع السكر, والخميرة, قلبيهم وسيبيهم لمدة من 10 – 15 دقيقة.
2- في طبق كبير اخلطي باقي المية الدافية مع الدقيق والملح وزيت الزيتون وقلبيهم مع بعض بمعلقة خشب.
3- بعد ما خليط الخميرة يتخمر, ضيفيه للعجينة واعجنيها لحد ما تبقى ناعمة ومرنة.
4- حطي العجينة في طبق مدهون زيت زيتون او ادهني العجينة نفسها بشوية زيت زيتون وغطيها بفوطة, وسيبيها لمدة من ساعة لساعة ونص.
5- بمجرد ما العجينة تخمر وحجمها يتضاعف, اضغطي عليها بالراحة عشان تفرغي الهوا, وقطعيها لكور باحجام متساوية.
6- رشي الرخامة بشوية دقيق, خدي كل كورة افرديها بالنشابة بسمك حوالي ¼ بوصة, بعد ما تفردي كل قطع العجين غطيها بفوطة وسيبيها ترتاح لمدة 10 دقايق.
7- لو عايزة تخبزيه في الفرن, لو فرن عادي سخنيه على درجة حرارة 250 درجة مئوية ولو في الميكروويف سخنيه على درجة حرارة 200 درجة مئوية, رصي الخبز في صينية مدهونة زيت, وحطيه في الفرن لمدة من 7 – 10 دقايق او لحد ما يتنفخ ويبقى لونه بني فاتح.
8- لو هتسويه على البوتجاز من فوق, زي الطريقة اللي فاتت هاتي طاسه ضد الالتصاق وحطي فيها معلقة صغيرة زيت زيتون سخنيها كويس, وحطي العجينة وغطيها وسيبيها لمدة من 2 – 3 دقايق وبعدها اقلبيه على الجنب التاني لمدة من 2 – 3 دقايق كمان لحد ما يتنفخ.
9- وكده الخبز يبقى جاهز للاكل تاكليه كده او تعملي منه ساندوتشات.
طريقة عمل كوبايات الباذنجان باللحمة الضاني وصوص البشاميل بالجبنة
