9 حيل هتخليكي تخسري وزن من غير نظام غذائي

ريهام محمود

في

5745

حسب منظمة الصحة العالمية صرحت ان عدد الاشخاص اللي بيعانوا من السمنة او الوزن الزائد زاد ثلات مرات عن اخر اربعين سنة, واكيد نتيجة لده بقى في عدد اكبر من الناس بيهتموا اكتر بالنظام الغذائي الصحي عشان يقدروا يقللوا وزنهم, لكن الخبر الحلو هنا انك مش لازم تمشي على نظام غذائي قاسي عشان تخسري وزنك, في بعض الاحيان بيكون كافي انك تستخدمي بعض الحيل اللي ممكن تمنعك من الافراط في الاكل, وده اللي هنعرفه النهاردة من خلال موضوعنا هنقولك على حيل لتخسيس الوزن من غير ما تمشي على نظام غذائي محدد او قاسي وتمنعي نفسك من الاكل.

حيل لتخسيس الوزن:

1- البسي حزام ضيق:

اول حيلة هي انك قبل وجبة الغدا والعشا البسي اي حزام عندك او شريط وضيقيه اوي على الوسط يعني يبقى اقل من مقاسك الطبيعي, وبعدها تقدري تاكلي, الخدعة دي بسيطة وفعالة جدا هتساعدك تتجنبي انك تاكلي كمية اكل كبيرة.

2- اشربي في كوباية طويلة:

جزء كبير من السعرات الحرارية اللي بنكتسبها مش بتبقى من الاكل بس لكن كمان من المشروبات, مثلا كوباية العصير بتحتوي تقريبا على 120 سعر حراري و 20 جرام سكر, وممكن انك تقللي ده لو شربتي في كوباية طويلة لاننا في العادة هنلاقي نفسنا اننا بنصب عصير في الكوباية الطويلة تقريبا بنسبة من 20 – 30% اقل من الكوباية القصيرة.

3- اظبطي وقت للاكل جنبك:

الموضوع بسيط انك لما بتاكلي بسرعة ده بيخليكي تاكلي كمية اكل كبيرة لان المخ مش بيبقى عنده فرصة ييستقبل اشارة بانك خلاص شبعتي, عشان كده اظبطي منبه او تايمر جنبك على 20 دقيقة وكلي ببطء, بالطريقة دي هتمنعك انك تاكلي كميات اكل زيادة, هتاكلي بس على قد الوقت اللي حددتيه وبعدها هتوقفي اكل.

4- خدي حمام سخن:

المية السخنة مش بتساعد بس على الاسترخاء, لكن كمان هتساعدك تخسري وزن, ومن خلال الدراسات المختلفة العلماء اثبتوا ان ساعة واحدة بتقضيها في حمام سخن بتحرق حوالي 130 سعر حراري, وده تقريبا نفس السعرات الحرارية اللي بتحرقيها من 30 دقيقة مشي, ده غير ان نسبة السكر بيكون اقل بنسبة 10% بعد الحمام السخن.

5- حطي طبق فاكهة على الترابيزة قدامك:

لما هتبقي شايفة الاكل الصحي قدامك باستمرار, ده هيخليكي تبرمجي نفسك مع الوقت انك تاكلي اكل صحي, والخدعة دي مش بتتوقف بس عند الخضار والفاكهة الحقيقية لا كمان صور الاكل الصحي بتساعد على ده, ودايما اشتركي في مواقع التواصل الاجتماعي في جروبات وصفحات الاكل الصحي عشان يبقى قدامك باستمرار في كل مكان.

6- اقعدي في اخر الترابيزة:

الحيلة دي مهمة جدا وفعالة في العزومات والمناسبات والحفلات, لانه هيكون تقريبا من المستحيل انك تشوفي قدامك كل انواع الاكل اللذيذة اللي انتي بتحبيها وتمنعي نفسك عنها, عشان كده لما تقعدي بعيد على اخر الترابيزة هيبقى في فرصة انك في انواع اكل مش هتاكليها لانك مش هتقدري توصلي لها.

7- كلي حاجة خفيفة قبل الاكل الدسم:

لو لقيتي قدامك سفرة مليانة بما لذ وطاب وكل الحاجات اللي انتي بتحبيها من اكلات دسمة او حلويات, اعملي عادة كده قبل ما تاكلي من الحاجات المغرية دي كلي حاجة تسد نفسك شوية او تخليكي متاكليش كتير, مثلا ممكن تسلقي بروكلي من غير ملح وتاكليه, بالطريقة دي هتاكلي اكل مش صحي بكمية اقل.

8- قطعي الاكل قطع صغيرة:

الحيلة دي ممكن تخدع المخ وتديه انطباع ان في كمية اكل اكتر في الطبق من الكمية اللي بالفعل موجودة, وبالطريقة دي هتحسي بالشبع اسرع ومش هتاكلي كتير, كمان الاكل في اطباق صغيرة هيعمل نفس النتيجة, كمان استخدام عصيان الاكل الصيني بدل السكاكين والشوك هتقوم بنفس المهمة.

9- استخدمي خيالك:

تخيل الاكل اللي انتي نفسك تاكليه هيخليكي تاكلي كمية اكل اقل في الحقيقة, وحسب التجارب اللي اتعملت على مجموعة من الاشخاص نتايجها اثبتت ان الاشخاص اللي اتخيلوا انهم اكلوا M & M اكلوا كمية اكل اقل من الاشخاص اللي مقاموش بالتجربة دي, عشان كده احنا بنشجعك على احلام اليقظة واتخيلي كل الاكلات اللي بتحبيها, ده هيساعدك على انقاص الوزن.

واكيد بننصحك مع الحيل دي انك تحاولي تاكلي اكل صحي زي ما قولنا تعودي نفسك عليه, وممكن مع تمارين بشكل منتظم زي المشي او الجري, لو مشيتي علي الحاجات دي هتلاقي نفسك خسيتي من غير مجهود ولا نظام غذائي قاسي.