نصايح وافكار ازاى تحسي بتعب اقل خلال اليوم وتزودى طاقتك

آية حسان
آية حسان
في
صحة
875

طبيعى انك من وقت للتانى تمرى بيوم كله كسل تبقى مش عايزة فيه تنزلى ولا تشتغلى ولا تعملى حاجة، لكن لو الاحساس ده اتكرر و بقيتى تحسي انك خلال اليوم مش قادرة تعملى حاجة لفترات او ساعات طويلة يبقى انتى محتاجة تغيرى حاجات معينة فى اللايف ستايل الخاص بيكى لانها بتستنفذ طاقتك، فى المقال ده بنات حوا هيساعدوكى تعرفى نصايح وافكار ازاى تحسي بتعب اقل خلال اليوم وتزودى طاقتك .. 

نصايح وافكار ازاى تحسي بتعب اقل خلال اليوم وتزودى طاقتك

1- راقبى نومك : 

معروف انه النوم القليل هيخليكى تعبانة و مش مركزة ،فلو عادة بتنامى اقل من 7 ساعات فى اليوم ، مش بس هتبقى مجهدة، لكن كمان ممكن تتصابى بمشاكل صحية زى زيادة الوزن، الاكتئاب، زيادة احتمالية الحوادث لو بتسوقى ، ضعف المناعة، زيادة خطر الاصابة بمرض السكرومشاكل القلب، و تشتت التركيز و تقلبات المود و كمان ضعف الذاكرة. علشان كده مهم جدا انك تاخدى القدر الكافى من النوم كل ليلة، خصوصا لو كنتى بتشتغلى او بتدرسي يبقى مهم تحاولى تنامى 8 ساعات يوميا. 

حاجة كمان بتبان بتساعدك لكن فى الحقيقة هى بتسبب اجهاد اكبر هى الـ snooze ، طبعا لما المنبه بيضرب كل يم الصبح الـ5 دقايق بتوع الـ snooze بيبانوا مغريين جدا ، لكن الحقيقة انهم بيخلوا جسمك مجهد اكتر و بيخلوكى عايزة تنامى اكتر، الصح هو انك تقومى من السرير و تصحى اول ما المنبه يضرب، وى ما النوم مهم حاولى ماتناميش زيادة و تعملى حسابك فى نص ساعة على الاقل للتماربن الصباحية كل يوم .

راقبى نومك
راقبى نومك

2- اشحنى طاقتك بالبروتين  : 

لو كان فطارك المعتاد بيتكون من الدوناتس او المعجنات التقيلة او المسكرة، اوالبطاطس المقلية اللى مليانة زيت ، توقعى انك تحسي بتأثيرهم بعد كام ساعة. لانه لما تبدأى اليوم و تدخلى لمعدتك جرع تقيلة من الكربوهيدرات و الدهون ده هيتسبب فى زيادة كبيرة لمعدل السكر فى الدم وبعد فترة السكر بينزل بنسبة كبيرة و ده ممكن يخليكى يبقى عندك قابلية اكتر للأكل تانى او للحلويات و الشوكولاتة ، علشان كده حاولى يبقى البروتين مكون اساسي فى كل وجباتك حتى الفطار و خدى سناك ما بين وجبة و التانية او لو حسيتى بجوع فى نص اليوم، ممكن تاكلى بيض اومليت للفطار او لو مفيش وقت كلى توست بزبدة الفول السودانى مثلا، او كلى علبة زبادى مع فاكهة ، وبدل الحاجة الحلوة فى نص اليوم ممكن تاكلى تفاحة كـ سناك مع قطعة صغيرة من الجبنة، البروتين مش هيأثر على مستوى السكر فى دمك و هيخليكى منتبهة و مركزة اكتر طول اليوم. 

اشحنى طاقتك بالبروتين
اشحنى طاقتك بالبروتين

3- قومى من على الكنبة !

نصيحة كمان معانا من نصايح ازاى تحسي بتعب اقل خلال اليوم وتزودى طاقتك، هى انك لازم تقومى من على الكنبة، لانه فى اوقات كتير – واللى هقوله دلوقتى هيفاجئك- ممكن يكون الاحساس بالكسل و التعب هو فى الحقيقة طريقة جسمك علشان يقولك انه محتاج يتحرك اكتر و يبذل مجهود، حاولى تتمرنى بشكل يومى علشان ترفعى من معدل الميتابوليزم والحرق عندك و تحسنى من مودك و تعززى طاقتك وتنامى بشكل افضل فى الليل ، مابنتكلمش انك تقضى ساعات فى الجيم كل يوم، لكن ممكن تمشي من 20 لـ 30 دقيقة يوميا علشان تستفيدى من فوايد التمرين. 

قومى من على الكنبة
قومى من على الكنبة

4- اشربي مية كتير  : 

رابع نصيحة معانا من ازاى تحسي بتعب اقل خلال اليوم وتزودى طاقتك هى انك لازم تشربى مية كتير، لان قلة شرب المية بتسبب الجفاف و ده بيؤدى الى الاحساس بالتعب لانك مابتشربيش مية كفاية خلال اليوم، ارفعى من معدل شربك للمية بانه يبقى فى على طول فى ايدك او على مكتبك ازازة مية ، واشربى كوباية مية كاملة قبل كل وجبة ، ولو فى وقت ممكن تاخدى شاور سريع علشان تجددى نشاطك، لكن لو انتى مشغولة و ده مش متاح، يكفى تغسلى ايدك او وشك بمية ساقعة علشان تفوقى . 

اشربي مية كتير
اشربي مية كتير

5- استمتعى بوقتك : 

انك تقضى وقت حلو مع اصحابك و تضحكى معاهم و تهزرى ، بيعتبر واحد من احسن الحاجات اللى ممكن تعزز طاقتك و ترجع نشاطك، اتفرجى على فيلم او اقرأى رواية مضحكة و حاولى تشركى نفسك فى نشاطات مختلفة كل يوم حتى لو كانت لوقت قليل ، او حتى اسمعى مزيكتك و اغانيكى المفضلة بصوت عالى، وجربى حاجة جديدة زى انك تشتركى فى كلاس زومبا او يوجا علشان تكافحى بيه السلبية والاكتئاب. 

استمتعى بوقتك
استمتعى بوقتك

6- نشطى عقلك : 

آخر نصيحة معانا من نصايح وافكار ازاى تحسي بتعب اقل خلال اليوم وتزودى طاقتك هى انك تجربى 

 التأمل  او الـ Meditation كمان حتى و لو لـ 3 دقايق كل يوم فى البيت و سط جو من الهدوء و الاسترخاء هيساعدك تعززى طاقتك بشكل كبير و هيفيدك جدا. 

ممكن كما تتطوعى فى اعمال خيرية ، لانه مساعدة الآخرين هتديكى الاحساس انك مفيدة و هتخليكى تفكرى فى نفسك بشكل افضل، وحاولى كمان كل يوم قبل ما تنامى تاخدى دقيقة او اتنين علشان تفكرى فى الحاجات الكويسة اللى حصلت طول اليوم و تشكرى ربنا عليهم .

مهم كمان انك تتعلمى تسامحى و تتحكمى فى غضبك لانه مشاعر زى الغضب و الكره بتزود من الطاقة السلبية و بتخليكى تحسي انك متعبة و مجهدة  حتى لو ماعملتيش اى مجهود جسدى ، اعرفى هنا نصايح من علماء النفس ازاي تسامحي شخص وتكملي حياتك

نشطى عقلك
نشطى عقلك

اعرفى معانا كمان 8 علامات هيدهالك جسمك تقولك ان عندك نقص فيتامينات..وازاي تعوضيه بالاكل

مقالات متعلقه

صحتك مهمة.. اعرفي 5 طرق لتقليل خطر الإصابة بـ الأزمات القلبية سهلة وفعالة في الوقاية

صحتك مهمة.. اعرفي 5 طرق لتقليل خطر الإصابة بـ الأزمات القلبية سهلة وفعالة في الوقاية

7 أكلات لتنظيف الجسم بشكل طبيعي بالأكل.. اعرفي ايه الأكلة المناسبة لكل جزء من الجسم

7 أكلات لتنظيف الجسم بشكل طبيعي بالأكل.. اعرفي ايه الأكلة المناسبة لكل جزء من الجسم

8 طرق سهلة  وبسيطة تخلصي بيهم جسمك من الإجهاد والتوتر

8 طرق سهلة  وبسيطة تخلصي بيهم جسمك من الإجهاد والتوتر