نصايح من علماء النفس ازاي تسامحي شخص وتكملي حياتك

ريهام محمود
ريهام محمود
13617

كلنا اكيد اتعرضنا لمواقف كتير في حياتنا اثرت علينا نفسيا سواء خيانة في علاقة, او كذب من صديق, اهمال من شخص احنا مهتمين بأمره وهو لا, او حتى معاملة سيئة في الشغل ومن زمايل العمل, والقايمة اكيد طويلة من الحاجات اللي ممكن تسيب جوانا اثر سلبي والم نفسي مش بنقدر نتخلص منه بسهولة وبيبقى تركيزنا وتفكيرنا كله في الشخص اللي سبب لنا الالم ده وفي اوقات كتير يمكن في اشخاص كتير مش بيقدروا يكملوا حياتهم وبيقفوا عن الموقف السيء اللي حصلهم, عشان كده النهاردة من خلال موضوعنا جايبين لكل بنات حوا نصايح من علماء النفس هتقولك ازاي تسامحي شخص وتكملي حياتك بشكل طبيعي جدا.

ازاي تسامحي شخص وتكملي حياتك:

– العواطف وردود الفعل:

اكيد رد الفعل اتجاه اي موقف بيختلف من شخص للتاني, في شخص ممكن يتوقف شوية ويفكر في الموقف وبعدين يكمل, واشخاص تانية بيكون الموضوع بالنسبة لهم مختلف والألم اكبر ومش بيقدروا يتخطوا الموقف بسهولة وبيلاقوا صعوبة انهم يكملوا حياتهم.

وممكن جدا تكون عواطف متأصلة من زمان جوه الشخص من معاملة سيئة من زمان وبالتالي بيكون صعب انه يتخلص منها, واحنا بطبيعة الحال وبشكل فطري للأسف ان الذاكرة دايما بتركز او بتسلط الضوء اكتر على الذكريات السيئة او المؤلمة وتقعد تمر قدامك الاحداث او الموقف اللي حصل وساب فيكي اثر نفسي سيء, ونتيجة لده بيحصل مشاكل نفسية كتير زي القلق والاكتئاب والخوف والعزلة والارق وغيرها من الاعراض النفسية اللي ممكن تستمر لفترة طويلة عند الشخص.

ولما تتعرضي او تواجهي كل المشاعر السلبية دي هنا في الحالة دي لازم تشوفي حل لصحتك النفسية وتعملي كل اللي تقدري عليه من وقت ومجهود عشان تتخلصي من المشاعر دي.

ازاي تسامحي شخص وتكملي حياتك 1
ازاي تسامحي شخص وتكملي حياتك 1

– قوة التسامح:

التسامح ممكن يكون هو الحل الوحيد تقريبا عشان تتخلصي من الألم والمشاعر السلبيه اللي جواكي ناحية اي شخص سبب ليكي اذى نفسي.

والتسامح مش معناه انك تنسي اللي عمله الشخص, ومش معناها بردو انك تعفي الشخص ده من افعاله, اختاري التسامح بدل من اختيار انك تطلعي مشاعرك السلبية انك تعاقبي الشخص ده او نفسك بانك تأذي نفسك نفسيا لانك مش قادرة تنسي او تسامحي والموضوع بيكون صعب في البداية.

لكن فكري دايما انك مش مسئولة عن افعال الاشخاص اللي حواليكي لكن انتي مسئولة عن نفسك وافعالك انتي وعن عواطفك وافكارك وتقدري تتحكمي فيها وتخففي الألم على نفسك, يعني انتي في النهاية اللي مسئولة عن التسامح, والاهم من ده ان انتي مسئولة عن سعادتك وراحة بالك.

ازاي تسامحي شخص وتكملي حياتك 2
ازاي تسامحي شخص وتكملي حياتك 2

– ازاي تقدري تسامحي ؟

الدكتور روبرت اينرايت هو دكتور رائد في الدراسة العلمية للتسامح بشكل خاص هيقولنا شوية نصايح ازاي نقدر نسامح.

1- التسامح ممكن:

عشان نسامح اي شخص لازم تؤمني ان التسامح شيء ممكن وانك لازم تعمليه او على الاقل تقبلي فكرة ان التسامح هو حل عملي للمشكلة.

2- التسامح اختيار:

مينفعش اننا نجبر حد على التسامح لازم يكون اختيار والشخص يروح له من نفسه من غير ضغط, وزي ما قولنا ان التسامح مش اننا نعفي الشخص من افعاله وننسى تصرفاته لكن اننا نعتبر الموقف ده درس اتعلمنا منه ويبقى في Move on في حياتنا ومنوقفش الحياة كلها على ده, ولازم نفهم ان التسامح ليه تأثير ايجابي على عواطفنا ومن هنا هنبدأ اننا نبص للتسامح بشكل صح.

ازاي تسامحي شخص وتكملي حياتك 3
ازاي تسامحي شخص وتكملي حياتك 3

3- اعملي قايمة:

اعملي قايمة واكتبي كل اسماء الاشخاص اللي اذيتك نفسيا من الطفولة لحد الوقت الحالي, وبعد ما تعملي القايمة حددي الاولويات عن طريق ترتيب الاسماء وخلي القايمة تبدأ بالاشخاص اللي ضررهم اكبر عليكي وبعدين الاقل.

ابدأي من اخر القايمة وسامحي الاشخاص من الاقل للاكتر, وخدي الوقت اللازم عشان تعالجي مشاعرك وانتي هتعرفي بنفسك امتى تنتقلي للمرحلة اللي بعدها وتفتحي صفحة جديدة في حياتك وتطوي الصفحة القديمة.

4- اتخلصي من غضبك:

شوفي نفسك كده وكمية الغضب اللي جواكي اتجاه شخص معين, وابدأي فكري في العواقب الجسدية من الغضب ده, بعد ما تشوفي اثار الغضب ده عليكي, هيجي السؤال هنا هل عايزة تفضلي كده وتأثري على نفسك بشكل سلبي نفسيا وجسديا ولا عايزة تعالجي نفسك وتطلعي من الحالة دي؟

5- الالتزام:

التزمي بالتسامح اكيد بعد ما شوفتي التأثير السلبي للغضب عليكي وانك عايشة مش سعيدة ده هيديكي دفعة او حافز انك تكملي في التسامح.

ازاي تسامحي شخص وتكملي حياتك 4
ازاي تسامحي شخص وتكملي حياتك 4

6- طريقة التفكير في الشخص:

وهنا في الخطوة دي بتعتمد على انك تغيري طريقة تفكيرك في الشخص وتفكري فيه بشكل جديد, اسألي نفسك كده هل الاشخاص دول كانوا بيأذوكي بكل الطرق؟ لو الاجابة اه على اي حال يبقى ممكن تفكري ان الاذيه دي كانت منحة ليكي مش محنة يعني درس اتعلمتي منه حاجة.

7- فكري في الحياة بشكل عام:

ممكن نبص لدورة الحياة كلها كده بشكل عام كلنا اتولدنا وبنعيش حياتنا بكل ما فيها وكلنا هنموت في النهاية يعني مافيش حاجة في الدنيا تستاهل نقف عندها او نوقف حياتنا عليها, ونبص للموضوع بشكل مختلف اننا بنتشارك في الانسانية مع الشخص ده وانه ممكن يكون هو مميز عند اشخاص تانيين وميقدروش يستغنوا عنه زي ما انتي مميزة عند الاشخاص اللي بيحبوكي بالظبط.

8- تنضيف قلبك:

سواء بارادتك او غصب عنك تصرفات الشخص اللي قدامك بتقسي قلبك وتخليكي شايلة مشاعر سلبية ناحيتة, وعشان تمارسي التسامح لازم تبدأي تطلعي كل المشاعر السلبية اللي جواكي, وتتخلصي من الغضب الغير صحي اللي انتي حاسه بيه.

ازاي تسامحي شخص وتكملي حياتك 5
ازاي تسامحي شخص وتكملي حياتك 5

9- التعامل مع الألم:

الألم في الوقت ده بيكون طبيعي جدا وهتحسي بمشاعر قوية جدا, لكن الألم ده هو اللي هيخليكي تقدري تكملي, الألم بيبني احترام الذات بمعنى انك قدرتي تشوفي الانسانية في الشخص اللي مشافش ده فيكي وقدر انه يأذيكي نفسيا, فلو انتي قدرتي تسامحي شخص هو متعاملش معاكي بنفس معاملتك واذاكي بأي شكل, في الحالة دي لازم تتأكدي انك اقوى مما انتي متوقعة.

10- احساس اكتر باللي حواليكي:

الدكتور روبرت بيقول كمان انه الاشخاص في مرحلة الألم دي بيكونوا اكتر احساس باللي حواليهم واكتر وعي, هتلاقيهم انهم اكتر صبر مع الاشخاص اللي بيمروا بيوم سيء, هيحسوا بمعاناة اللي حواليهم اكتر, واكتر وعي بألم اللي حواليهم وهيبقوا عايزين يخففوا عنهم كمان.

لكن اللي لازم تكوني متأكدة منه انه بعد فترة الألم دي هيبقى في فترة انعكاس لكل المشاعر السلبية وهتحسي فيها انك اقوى وانك سعيدة اكتر.

11- كرري العملية:

انتي عملتي القايمة في البداية , بعد فترة معينة ارجعي كده لنفس القايمة بعد تنفيذ كل الخطوات اللي قولنا عليها هتلاقي نفسك سامحتي الاشخاص اللي اذوكي اسرع مما انتي تتوقعي, وهتعيشي حياة اسعد واقوى واكتر رضا عن حياتك ونفسك.

ازاي تسامحي شخص وتكملي حياتك 6
ازاي تسامحي شخص وتكملي حياتك 6

8 علامات تقولك ان في شخص غيران منك..وازاي تصلحي سلوكهم وتتفادي غيرتهم

علامات تقولك ان في شخص غيران منك
علامات تقولك ان في شخص غيران منك

مقالات متعلقه

50 سؤال تسألهم لحبيبتك عشان تعرفها بشكل افضل

50 سؤال تسألهم لحبيبتك عشان تعرفها بشكل افضل

تفضلي سينجل افضل من المحاربة في علاقة غلط ، اعرفي السبب

تفضلي سينجل افضل من المحاربة في علاقة غلط ، اعرفي السبب

اهم اسرار الزواج الناجح ، وازاي تظهروا احترامكم لبعض

اهم اسرار الزواج الناجح ، وازاي تظهروا احترامكم لبعض