10 علاجات طبيعية تعمليهم في البيت هتخلصك من ألم الاسنان

مافيش حد فينا مش بيعدي عليه وقت مش بيتعرض لألم الاسنان وبيكون الالم صعب جدا ومش بنقدر نتحمله, وحسب الدراسات ان اكتر من 90% من الاشخاص بيعانوا من مشكلة تسوس الاسنان, والنهاردة من خلال موضوعنا هنقولك علاجات طبيعية لألم الاسنان تقدريها تعمليها في البيت بمكونات بسيطة, بس لو حامل او بترضعي او عندك اي حالة طبية ممكن تتأثر بالمكونات يبقى الافضل تستشيري دكتور الاول قبل ما تعملي اي وصفة.

علاجات طبيعية لألم الاسنان:

1- غسول المية المالحة:

المية المالحة تعتبر مطهر طبيعي, وكمان علاج سهل وفعال لألم الاسنان, كل اللي هتعمليه هتخلطي ½ معلقة صغيرة ملح في كوباية مية دافية, واستخدميه كمضمضة وغسول للفم, والطريقة دي كمان بتمنع التورم وبتنضف المنطقة اللي حوالين الاسنان.

2- مية الاكسجين:

مية الاكسجين تعتبر مسكن طبيعي للألم, وكمان بتساعد على علاج نزيف اللثة, اخلطي مية اكسجين بنسبة 3% مع نفس الكمية مية عادية, واستخدميها كمضمضة وغسول للفم زي طريقة المية المالحة.

3- القرنفل او زيت القرنفل:

القرنفل من اكتر المكونات المعروفة بفعاليتها في علاج ألم الاسنان, لانه بيحتوي على مادة الاوجينول اللي تعتبر مطهر طبيعي, ممكن تحطي كمية صغيرة من القرنفل المجفف على مكان الألم او تمضغي القرنفل عشان تستخرجي الزيت بتاعه, او ممكن تستخدمي نقطتين من زيت القرنفل على مكان الألم.

4- الضغط البارد:

الضغط البارد فعال لاي نوع من الالم, استخدمي كيس تلج او حطي تلج في كيس بلاستيك ولفيه بقماشة خفيفة, وحطيه على مكان الالم لمدة 15 دقيقة هيخدر الاعصاب في المنطقة دي وكمان هيقلل من التورم والالتهاب.

5- الثوم:

الثوم معروف بخصائصة الطبية, لانه بيساعد على قتل البكتيريا وبيسكن الألم, وافضل طريقة لاستخدامه انك تفرمية ناعم وتعملي منه عجينة وتحطيه على مكان الألم, او انك تمضغيه ببطء, ممكن تكرري الطريقة دي كل يوم لحد ما يختفي الألم.

6- اوراق الجوافة:

اوراق الجوافة هي مضادة للالتهابات ومضاد للميكروبات, وهي مش بتخفف بس ألم الاسنان كمان بتخفف قرح الفم وتضخم اللثة, ببساطة ممكن تمضغي ورقة او اتنين من ورق الجوافة لحد ما العصير بتاعها ينزل على الاسنان, او حطي كام ورقة جوافة في مية مغلية, وبعدين سيبي المية تبرد شوية لحد ما تبقى دافية, ضيفي لها رشة ملح صغيرة, واستخدمي الخليط ده كغسول للفم.

7- عشبة القمح او القلطة:

عشبة القمح او القلطة ليها خصائص مضادة للبكتيريا, وهي مش بس بتمنع الألم كمان بتمنع تسوس الاسنان, ولافضل نتايج امضغي العشبة بشكل مباشر, او اعصريها واستخدمي العصير كغسول للفم, بيساعد على ازالة السموم من اللثة وبيقلل من نمو البكتيريا.

8- البصل:

البصل بيحتوي على المواد الكيميائية النباتية اللي بتقتل الجراثيم المسئولة عن العدوى المسببة لألم الاسنان, وافضل طريقة لاستخدامه, اقطعي قطعة من البصل وامضغيها على جنب الفم اللي فيه الألم, ده بيخلي العصير بتاعه يدخل جوه السنة, ولو الالم شديد ومش قادرة تمضغي حاجة ممكن تحطي قطعة البصل على مكان الألم وتمسكيها بصوباعك.

9- زيت السمسم:

زيت السمسم بيقلل من تسوس الاسنان وكمان من نزيف اللثة وريحة الفم الكريهة, وبيساعد على تنضيف الفم من البكتيريا الضارة المسئولة عن معظم مشاكل الاسنان المختلفة, خدي 1 معلقة صغيرة من زيت السمسم واعملي بيها مضمضة لمدة 20 دقيقة في الفم كله وبعدها اتخلصي من الزيت واشطفي الفم بمية دافية او ممكن تشطفية بمية مالحة, كرريها كل يوم الصبح على معدة فاضية, وممكن تستبدلي زيت السمسم بزيت عباد الشمس او زيت جوز الهند.

10- جوزة الطيب:

جوزة الطيب بتحتوي على خصائص مضادة للتسوس, بتساعد على منع تسوس الاسنان, وعلاج تسوس الاسنان الناتج من البكتيريا, اطحني جوزة الطيب واخلطي معاها شوية من زيت القرنفل, وحطي الخليط على مكان الألم, وسيبيه 10 دقايق وبعدها اشطفيه بمية دافية, كرري الطريقة من 3 – 4 مرات في اليوم, وممكن تستخدمي زيت جوزة الطيب تحطي منه كام نقطة على مكان الألم.

10 بدائل طبيعية لمعجون الاسنان