حاجات في مظهرك ممكن تطلعك بشكل مش جذاب
كريستيان ديور صاحب دار ازيار ديور قال ان اساسيات المظهر الجيد هو البساطة والذوق الرفيع, لو اعتمدتي عليهم هتطلعي بلوك حلو من غير ما تصرفي فلوس كتير على مظهرك, لكن في بعض الاحيان بنات كتير بتنسى الاساسيات دي وبتقع في غلطات تخلي مظهرها مش حلو, عشان كده النهاردة من خلال موضوعنا هنقول لكل بنات حوا حاجات في مظهرك ممكن تطلعك بشكل مش جذاب, وممكن تكون بسيطة جدا لكن في النهاية بتأثر على اللوك بتاعك وبتدي انطباع سيء.
حاجات في مظهرك ممكن تطلعك بشكل مش جذاب:
1- الالوان الباهتة:
اللون الاسود من الالوان الانيقة جدا لكن مشكلته لما بيتغسل كتير ممكن يفقد لونه او اللون يبهت وميبقاش لون اسود مثالي, ولو لبستيه بالشكل ده اكيد هتطلعي بلوك مش جذاب, وده اكيد مش بس على اللون الاسود لكن بينطبق على كل الالوان الزاهية اللي ممكن تبهت من كتر الغسيل.
الحل: عشان تحافظي على الهدوم السودا او الزاهية افضل حاجة تغسليها بمية باردة عشان تحافظي على اللون, وممكن تضيفي لمية الغسيل شوية خل او قهوة او شاي, واكتر الخامات المعرضة اكتر ان الوانها تبهت او تروح بسرعة هي الكتان او الاسيتات, لكن خامة الصوف او النايلون من الخامات اللي بتحافظ على لونها لفترة اطول.
2- لون ابيض مصفر:
اللون الابيض زي الاسود ممكن يكون ليه تأثير ايجابي على اللوك بتاعك في حالة لو كان ابيض مثالي او ناصع, لكن لو الابيض مصفر ومش ناصع او عليه بقع عرق صفرا اكيد هيكون ليه تأثير سلبي على شكلك.
الحل: لما تيجي تغسلي اي هدوم بيضا عندك ممكن تضيفي لمية الغسيل شوية مية اوكسجين او كربوناتو او عصير ليمون هتساعد على تبييض الملابس, ولو اللون الاصفر قوي ومطلعش باي طريقة يبقى المفروض انك تتخلصي من القطعة دي ومتلبسيهاش.
3- طريقة تني كم القميص:
تني كم القميص فوق كذا طبقة فوق بعض هتديكي لوك حلو وشبابي لكن رفع الكم كله لفوق من غير تنيه هيأثر على اللوك بتاعك وهيبقى شكله مش حلو.
طريقة تني الكم بالطريقة الصح: فكي زراير القميص واتنيه طبقات فوق بعض ممكن تعملي من تنية لاتنين فوق بعض.
لو اسورة القميص بلون مختلف ممكن تعملي طريقة التنية الايطالية.
4- Harem Pants:
الستايل ده من البنطلونات طلع موضة الايام دي وفي بنات كتير بيلبسوه, لكن في الاحوال هو اختيار مش موفق.
الحل: لو انتي مصممة تلبسي الستايل ده او حباه يبقى الافضل تلبسي عليه شوز رياضي او صندل, وتنسقي معاه من فوق تيشرت او Tank.
5- قشرة الشعر على اللبس:
اثار قشرة الشعر على الهدوم بتخلي الشكل يطلع مش حلو وبتأثر بشكل سلبي جدا على اللوك بتاعك.
الحل: القشرة معناها ان في حاجة غلط لازم تعالجيها, ياما يكون سببه ان جلد فروة الراس جاف اوي, او نقص فيتامينات معينة في الجسم, الافضل انك تروحي لدكتور متخصص تعرفي سبب المشكلة عشان تقدري تعالجيها.
شوفي من هنا 4 وصفات لعلاج قشرة الشعر.
6- اكسسوارات كتير:
لبس اكسسوارات كتير ولو كان مع مكياج بيلمع كمان او بالوان فاقعة اوي, هيخلي اللوك بتاعك يبقى اوفر ومبهرج زيادة عن اللزوم.
الحل: كوكو شانيل صاحبة دار ازياء شانيل بتنصح انك تشيلي الاضافة اللي انتي حطتيها اخر حاجة قبل ما تنزلي من البيت لان في العادة هي دي الاضافة اللي بيكون مالهاش لازمة او مش ضرورية في اللوك بتاعك, وحاولي يكون في تناسق في الوان الاكسسوارات ومتلبسيش قطع كتير كبيرة مع بعض.
شوفي من هنا 10 قواعد اساسية لاختيار الاكسسوارات بطريقة صح.
7- مقاس بنطلون غلط:
اكيد الصورة اللي قدامنا بتشرح اكتر من اي كلام, ان مقاس البنطلون الغلط هيطلع اللوك بتاعك سيء جدا.
الحل: لازم تشتري جينز بمقاس مناسب ليكي, وحاولي تتجنبي ستايل البنطلونات ال Low waist عشان تقدري تتحكمي في وضع العمود الفقري بحيث انك تقدري تطولي او تقصري الجسم من فوق او من تحت حسب شكل جسمك وتعملي توازن في الشكل العام للجسم.
8- المكياج القديم:
اكيد مافيش اسوأ من ماسكارا سايحة ومتشققة وروج متشقق على الشفايف وحواجب مرسومة بشكل سيء, كل الحاجات دي بتظهر لو المكياج بقاله فترة طويلة على البشرة, وغير انه هيطلع شكلك مش جذاب كمان هيبين وشك شكله مرهق.
الحل: افضل حاجة لو لقيتي المكاج بقى بالشكل ده انك تغسليه, وعشان تخلي المكياج يدوم فترة اطول خصوصا مكياج العيون استخدمي برايمر لتثبيت المكياج.
9- التفاصيل الصغيرة:
الروج اللي على السنان, نتش او قطع صغير في الهدوم, بواقي اكل لازقة على سنانك, كل دي تفاصيل صغيرة ولكن بتأثر على شكلك وبتبقى ملحوظة للي قدامك.
الحل: عشان نتجنب كل الاخطاء دي اعتمدي على قاعدة بسيطة جدا انك قبل ما تنزلي من البيت على طول بعد ما تكوني شربتي او اكلتي وعملتي كل حاجة تبصي لنفسك في المرايا لمدة دقايق تشوفي لو في اي حاجة محتاجة تتظبط.
وعشان تعرفي ان النصايح دي قد ايه مهمة برغم بساطتها, افتكري ردة فعلك انتي لما بتشوفي حد مثلا على هدومه قشرة شعر او بنت على سنانها روج وبيكون انطباعك سيء عنهم فتأكدي ان ده انطباع اللي قدامك عنك لو انتي وقعتي في نفس الغلطات.
اخطاء موضة كلنا بنقع فيها ! واعرفي ازاي تختاري لبسك صح
