حيل سريعة ورخيصة عشان تعتني بالشوز بتاعك وترجعيه كانه جديد ولسه شرياه

ريهام محمود

في

3163

كتير بنتعرض انه يحصل اي حاجة للشوز, من بقع او خدش او غيرها من الحاجات اللي ممكن تكون بسيطة لكن بتشوه شكل الشوز, في الحالة دي ياما بتوديه لمكان يتصلح او بتشتري غيره, لكن النهاردة من خلال موضوعنا هنقولك حيل تصلحي بيها الشوز وطرق بسيطة تقدري تعمليها بنفسك في البيت وفي نفس الوقت مش مكلفة.

حيل تصلحي بيها الشوز:

1- امسحي الشوز بقشرة الموز:

عشان تلمعي الشوز بطريقة بسيطة وسهلة جدا, هاتي قشرة الموز وافركي الشوز بالجزء اللي جوه من القشرة, وبعدين امسحيه بمنديل.

2- الجومة لتنضيف نعل الشوز:

لو عايزة تنضفي نعل الشوز وترجعيه لونه ابيض تاني, بكل بساطة امسحي كل الاماكن اللي عايزة تنضفيها بالجومة هتلاقيها شالت كل الاتربة من عليه ورجع لونه ابيض تاني.

3- لمنع احتكاك الشوز بالجلد:

لو الشوز بتاعك لسه جديد او بيضايقك وبيعور رجلك, ممكن تحطي على الرجل من ورا لاصق من الشفاف عشان تمنعي احتكاك الشوز بالجلد.

4- نضفي الشوز القطيفة بالمبرد:

الشوز القطيفة او الشمواه من الخامات اللي بتلقط التراب بسرعة جدا, وعشان تنضفيه بكل بساطة استخدمي مبرد الضوافر الخشب, مشيه على الشوز بشكل خفيف من غير ضغط هيلقط كل التراب اللي عليه.

5- منظف الزجاج للاحذية الجلد:

الاحذية الجلد ممكن تنضفيها بطريقة بسيطة جدا, وهي انك ترشي عليها منظف زجاج وتمسحيها بمنديل او قطعة قماش هتلاقيها رجعت تلمع تاني.

6- لازالة الخربشة من الشوز:

لو في اي خربشة على الشوز, استخدمي الحيلة دي بسيطة وفعالة جدا, بكل بساطة امسحي مكان الخربشة بالفازلين.

7- عشان توسعي رقبة البوت:

لو البوت الرقبة بتاعته ضيقة, ممكن ترشيه بسبراي بيساعد على التوسيع وممكن تلاقيه في محلات الاحذية او ترشي كحول, وبعدين لفي ورق جرايد وحطيه جوه رقبة البوت وخليه سميك عشان يساعد على توسيع الرقبة, وممكن بدل الجرايد قطعة خشب ملفوفة بقماش, او هدوم قديمة او فوط, وسيبيه في البوت لمدة يوم او اتنين, وممكن تكرري العملية دي مرتين او تلاتة وكل مرة تزودي سمك الجرايد لحد ما تلاقي مقاسه بقى مظبوط عليكي, وبعد ما تشيلي الجرايد ممكن تلبسيه تتمشي بيه في البيت عشان يساعد على التوسيع اكتر.

8- ازالة الخدوش من الجلد:

في منتج هتلاقيه في محلات الاثاث اسمه Liquid Leather امسحي بيه مكان الخدوش.

9- لتضييق الشوز:

لو الشوز واسع وبيطلع من رجلك, ممكن تحلي المشكلة بحيلة بسيطة ساعات لما بنشتري شوز جديد او حتى مع الاجهزة الجديدة بيبقى معاه Foam خفيف كده زي اللي باين قدامنا في الصورة ده, هاتيه وحطيه في الشوز من ورا وقصية على قد المكان.

10- تصليح السوستة:

لو السوستة معلقة معاكي بكل بساطة افركي فيها شمعة هتتفتح معاكي بسهولة.

11- ازالة بقع الملح من الاحذية الجلد:

بقع الملح اللي بتحصل في الاحذية الجلد بتبقى عبارة عن بقع بيضا كده بتتكون على الجلد, ممكن تعالجيها بطريقة بسيطة وفعالة, اخلطي خل مع ضعف الكمية مية وبفرشة سنان قديمة خدي من الخليط وامسحي اماكن البقع.

12- الشمع لنعل الشوز:

لو نعل الشوز ناعم اوي وبيزحلقك, ممكن تعملي عليه من تحت شمع على شكل شرايط جنب بعض زي ما هو باين في الصورة كده عشان تمنع انك ممكن تتزحلقي بيه.

13- التخلص من الريحة الكريهة للشوز:

عشان تتخلصي من اي روايح كريهة في الشوز او رجلك بتعرق كتير, رشي على رجلك شامبو جاف او رشيه جوه الشوز نفسه عشان يمتص اي ريحة, او ممكن تستبدلي الشامبو الجاف بالبيبي بودر هتقوم بنفس المهمة.

14- عشان تمنعي رجلك تتزحلق من الشوز:

ساعات كتير بنلبس شوز وخصوصا الستايل المفتوح من قدام الرجل بتتزحلق منه ومش بتبقى ثابتة, عشان تحلي المشكلة دي بحيلة بسيطة جدا قبل ما تلبسي الشوز رشي رجلك بمثبت الشعر هيساعد على تثبيت رجلك جوه الشوز من غير ما تتزحلق.

15- تنضيف الاحذية البيضا:

الطريقة دي تعتبر من اكتر الطرق الفعالة لتنضيف الاحذية البيضا, اعملي خليط من الكربوناتو ومية الاوكسجين والمية بحيث يبقى عندك خليط قوامه متجانس مش سايل ولا سميك, حطي الخليط على الشوز وسيبيه كام ساعة وبعدين امسحيه.

16- ازالة البقع من الشوز الجلد:

لو الشوز الجلد عليه اي بقعة, امسحيها بقطعة قماش فيها كحول طبي.

17- للنعل الناعم:

طريقة تانية ممكن تعمليها لو النعل ناعم وبيزحلقك, افركي النعل بورق صنفرة هيخلي النعل اخشن.

18- التخلص من الروايح الكريهة في الشوز:

طريقة تانية كمان للتخلص من اي ريحة كريهة في الشوز, ببساطة حطي جوهه الشوز كيس شاي مش مستخدم هيمتص اي روايح كريهة.

19- عشات تخلي الشوز مريح:

عشان تخلي الشوز مريح اكتر على الرجل وانتي لبساه وخصوصا الشوز اللي بالكعب, ممكن تستخدمي الحشوة السيليكون بتاعة الصدر, برغم انه موجود نعل سيليكون مخصوص للاحذية لكن لو مش متوفر قدامك ممكن تستخدمي بدالها حشوة الصدر, هتحسي براحة اكتر وانتي لابسة الشوز.

20- عشان تحافظي على شكل البوت:

لما تيجي تشيلي البوت عشان تحافظي على شكله, ممكن تحطي جوه الرقبة بتاعته ازازة كبيرة عشان تحافظ على شكلها.

21- لازالة البقع الدهنية والشحم:

لو الشوز القطيفة او الشمواه عليه اي بقع دهنية او شحم, رشي على البقعة شوية دقيق شوفان وسيبيه شوية عشان يمتص البقعة, وبعدين شيليه من على الشوز هتلاقي البقعة اختفت تماما.

22- استخدمي البلسم لحماية الشوز:

امسحي الشوز بقطعة قماش عليها كمية بسيطة من بلسم الشعر, الطريقة دي مش بس هتلمع الشوز وترطب الجلد بتاعه كمان هتحافظ عليه وهتعمل زي طبقة واقية على الشوز.