9 طرق بسيطة باستخدام زيت الخروع لعلاج ال Stretch Marks
كتير من البنات بيعانوا من مشكلة ال Stretch Marks او علامات التمدد اللي طبيعي بتتطور مع مرحلة البلوغ والحمل, وبتظهر كمان بسبب فقدان الوزن السريع او كمان زيادة الوزن, وبالرغم انها ممكن يكون علاجها صعب احيانا لكن اكيد مش مستحيل وممكن يكون العلاج من خلال طرق بسيطة جدا, وده اللي هنعرفه النهاردة مع بعض هنقولك 9 طرق لعلاج ال Stretch Marks بزيت الخروع.
– ليه زيت الخروع فعال في علاج ال Stretch Marks:
1- زيت الخروع يعتبر مصدر غني لحمض الريسينوليك والاحماض الدهنية دي مفيدة جدا وبتساعد على الحفاظ على صحة البشرة.
2- يعتبر زيت الخروع مرطب طبيعي ممتاز جدا, لانه بيساعد على حماية الرطوبة في خلايا البشرة وبيحافظ عليها رطبة.
3- زيت الخروع فيه خصائص قوية جدا في اختراق البشرة وده بيساعد على ترطيب البشرة بعمق.
4- بيحتوي على خصائص مضادة للبكتيريا اللي بتساعد على ان علامات التمدد تبقى خالية من البكتيريا وده بيساعد على اخفائها.
5- زيت الخروع بيساعد كمان على انتاج الكولاجين والايلاستين اللي بيساعدوا ان البشرة تفضل مرنة وصحية, وده بدوره هيساعد على منع ظهور علامات تمدد جديدة وهيساعد على شفاء العلامات القديمة.
– طرق لعلاج ال Stretch Marks بزيت الخروع:
1- مساج الزيت السخن:
كل اللي هتحتاجيه 2 معلقة كبيرة من زيت الخروع, في طبق صغير سخني زيت الخروع لحد ما يبقى دافي, حطي الزيت على علامات التمدد مع التدليك, بمجرد ما تحطي الزيت على كل علامات التمدد عندك سيبيها 30 دقيقة, وبعدها اغسليه بمية دافية, كرريه من 3 – 4 مرات في الاسبوع.
زيت الخروع يعتبر مصدر غني لمضادات الاكسدة اللي بتساعد على اصلاح الجلد, والتسخين بيسمح للزيت انه يخترق الجلد بشكل اعمق وده بيساعد مضادات الاكسدة على علاج الياف الكولاجين الممتدة والمكسورة.
2- زيت الخروع والبطاطس:
المكونات:
عصير ثمرة بطاطس.
2 معلقة كبيرة زيت خروع.
الطريقة:
اخلطي عصير البطاطس مع زيت الخروع وقلبيهم مع بعض كويس, وحطيه في التلاجة كام ساعة, بعدها حطي الخليط وهو ساقع على علامات التمدد, سيبيه لمدة 30 دقيقة, وبعدها اغسليه بمية دافية, كرريه من 3 – 4 مرات في الاسبوع.
الخليط ده بيحسن مرونة الجلد وبيوفر الترطيب العميق للمناطق المصابة وده بيساعد على اصلاح البشرة وبيقلل من ظهور علامات التمدد.
3- زيت الخروع وزيت جوز الهند:
المكونات:
1 معلقة كبيرة زيت خروع.
1 معلقة كبيرة زيت جوز هند.
الطريقة:
اخلطي الزيوت مع بعض, حطي الخليط على علامات التمدد ودلكيها لحد ما تحسي ان الزيت بقى دافي على بشرتك, سيبيه لمدة 30 دقيقة, وبعدها اغسليه بمية دافية, كرريه من 3 – 4 مرات في الاسبوع.
زيت جوز الهند من اكتر الزيوت اللي بتخترق البشرة بعمق جدا وبيساعد على زيادة قدرة زيت الخروع انه يتسرب للبشرة من جوه, وده بيساعد على اصلاح الطبقات الداخلية للبشرة, وده بدوره بيساعد على علاج علامات التمدد.
4- زيت الخروع والقرنفل:
المكونات:
من 5 – 6 حبات قرنفل.
2 معلقة كبيرة زيت خروع.
الطريقة:
اطحني القرنفل لحد ما يبقى مسحوق ناعم وضيفيه لزيت الخروع, سخني الخليط لمدة دقايق لحد ما لونه يبدأ يتغير, سيبيه يبرد وبعدها دلكي بيه علامات التمدد لمدة 15 دقيقة, بعدها سيبيه لمدة 30 دقيقة, واغسليه بمية دافية, كرريه كل يوم.
زيت القرنفل يعتبر من المكونات الفعالة اللي بتساعد على علاج علامات التمدد.
5- زيت الخروع والالوفيرا:
1 معلقة كبيرة جل الالوفيرا.
1 معلقة كبيرة زيت خروع.
الطريقة:
اخلطي جل الصبار مع زيت الخروع وقلبيهم مع بعض, سخنيهم على النار لمدة ثواني لحد ما يبقى الخليط دافي, ادهني علامات التمدد بالخليط وسيبيه طول الليل واغسليه الصبح, كرريه يوميا.
الالوفيرا غني بفيتامين E ومضادات الاكسدة اللي بتساعد على اصلاح البشرة وعلامات التمدد من الجلد, وحمض الريسينولك اللي موجود في زيت الخروع بيمنع اي التهاب ممكن يحصل في علامات التمدد.
6- زيت الخروع والكركم:
المكونات:
1 معلقة كبيرة زيت خروع.
½ معلقة صغيرة كركم.
الطريقة:
اخلطي المكونات مع بعض وقلبيهم لحد ما يبقى عندك خليط ناعم, ادهني الخليط على علامات التمدد مع التدليك, سيبيه لمدة ساعة او فترة على قد ما تقدري, وبعدها اغسليه بمية دافية, كرريه يوميا.
الكركم بيحتوي على مضادات الاكسدة ومركبات بتساعد على العلاج وبتحسن نسيج البشرة وده بيساعد على علاج علامات التمدد, وكمان الكركم من المكونات اللي بتساعد على تفتيح البشرة.
7- زيت الخروع مع الكيس البلاستيك:
المكونات:
2 معلقة كبيرة زيت خروع.
كيس بلاستيك.
اربة مية سخنة, او ازازة مية سخنة.
الطريقة:
سخني زيت الخروع لحد ما يبقى دافي شوية, ادهني علامات التمدد بزيت الخروع ودلكيه لمدة من 10 – 15 دقيقة, بعد ما تخلصي التدليك لفي المكان بالكيس البلاستيك, حطي الاربة السخنة او ازازة المية السخنة على علامات التمدد وانتي حاطة الكيس لمدة 30 دقيقة, بعدها فكي الكيس واغسلي المكان بمية دافية, كرريه من 3 – 4 مرات في الاسبوع.
الطريقة دي بتساعد على ترطيب البشرة بعمق وده بيساعد على تحسين مرونته وعلاج العلامات.
8- سكراب زيت الخروع والسكر:
المكونات:
1 معلقة كبيرة زيت خروع.
1 معلقة كبيرة سكر.
الطريقة:
اخلطي السكر مع زيت الخروع, دلكي علامات التمدد بالخليط لمدة 5 دقايق, بعدها سيبيه على البشرة لمدة 15 دقيقة كمان, واغسليه بعد كده بمية دافية, كرريه من 2 – 3 مرات في الاسبوع.
التقشير المنتظم بيحافظ على البشرة صحية لانه بيساعد على ازالة الجلد الميت من على سطح البشرة, وبيساعد على ترطيب الجلد عشان كده يعتبر مثالي جدا للاشخاص اللي بيعانوا من علامات التمدد.
9- زيت الخروع والشوفان:
المكونات:
1 معلقة كبيرة زيت خروع.
1 معلقة صغيرة شوفان.
2 معلقة كبيرة زيت زيتون.
الطريقة:
اخلطي كل المكونات مع بعض, اعملي سكراب بالخليط على علامات التمدد لمدة 5 دقايق, بعدها سيبيه على البشرة لمدة 15 دقيقة كمان, وبعدين اغسليه بمية دافية, كرريه من 2 – 3 مرات في الاسبوع.
كمان السكراب ده بيساعد على تقشير البشرة وترطيبها وعلاج علامات التمدد.
– هياخد وقت قد ايه عشان تشوفي النتايج؟
علامات التمدد طبيعي بتاخد وقت شوية عشان تروح بشكل كامل, ولكن مع الاستخدام المنتظم لوصفات زيت الخروع, هتلاحظي نتيجة ملحوظة بعد كام اسبوع من الاستخدام, وهتشوفي نتايج واضحة جدا خلال شهرين من بداية الاستخدام.
16 استخدام جمالي لزيت الخروع للبشرة والشعر والضوافر
