8 علامات هيدهالك جسمك تقولك ان عندك نقص فيتامينات..وازاي تعوضيه بالاكل

ريهام محمود

في

7941

على الرغم من ان فيه علاجات كتير في الصيدلية ممكن تعوض نقص الفيتامينات, الا انه في ناس كتير جدا على مستوى العالم كله بيعانوا من نقص فيتامينات, ولكن ده مش سبب اننا ناخد كميات من الفيتامينات من غير ما نعرف اثارها الجانبية, عشان كده افضل حاجة تعوض نقص الفيتامينات وبينصح بيها الاطباء هي انك تمشي على نظام غذائي متوازن يدي جسمك كل الفيتامينات اللي محتاجها من غير ما يسبب له اي ضرر, والنهاردة من خلال المقال بتاعنا هنقولك علامات تقولك ان عندك نقص فيتامينات, وازاي تعوضي نقص الفيتامينات ده بالاكل.

علامات تقولك ان عندك نقص فيتامينات:

1- تساقط الشعر:

السبب: سبب تساقط الشعر بيكون نقص في فيتامين B7 “البيوتين”, وده ممكن يجي من اكل كمية كبيرة من البيض لان بياض البيض بيحتوي على الافيدين اللي بيمنع قدرة الجسم على هضم البيوتين.

العلاج: دخلي في نظامك الغذائي كمية كبيرة من البيوتين, وهنلاقيه في اللوز, فول الصويا, البطاطس سواء المهروسة او اللي في الفرن, الموز, اللحمة, الكبدة, الخميرة, صفار البيض, الجبنة, الخضروات الورقية, القرنبيط, المشروم, المكسرات, والفول السوداني.

2- تشنج العضلات:

السبب: التشنج المتكرر في العضلات ده معناه نقص في الكالسيوم والمغنسيوم والبوتاسيوم, وده ممكن يحصل بشكل خاص بعد ممارسة التمارين الرياضية لان كتير من المعادن بتخرج من الجسم مع العرق.

العلاج: زودي من اكل الموز, التفاح, القرع, المكسرات وبشكل خاص اللوز والبندق, اللبن, الجبنة, الخضروات الورقية, السمك, البقوليات زي الفاصوليا والفول واللوبيا والعدس, البامية, البسلة, التين, الشوكولاتة الغامقة, البطاطس, الطماطم, الافوكاو.

3- طفح جلدي:

السبب: كمان ده بيكون سببه نقص فيتامين B7 اللي هو البيوتين, اجسامنا عادة بتخزن الكتير من الفيتامينات القابلة للذوبان في الدهون ” A, E, K, D” ولكن فيتامينات B-group بتكون محتاجة باستمرار لتجديدها او استعادتها للجسم.

العلاج: جنب المكملات الغذائية الغنية بالبروتين اللي ممكن تشتريها من الصيدلية, دخلي البيوتين في نظامك الغذائي.

4- تنميل الاطراف:

السبب: ده سببه نقص في فيتامين B9, B12, B6 “حمض الفوليك” الفيتامينات دي بتأثر على الكتل الغذائية اللي بتستخدم لانتاج خلايا دم سليمة وضرورية لنقل الاوكسجين للخلايا وبالتالي مع نقص الفيتامينات الاوكسجين مش بيوصل بشكل كافي للاطراف وبيحصل التنميل.

العلاج: زودي من اكل المأكولات البحرية, الفراخ, الفاصوليا, الفواكة الحمضية, الافوكادو, الخبز الكامل, الحبوب الكاملة, الخضروات الورقية الخضرا.

5- البثور وحب الشباب على الوركين والايد:

السبب: ظهور البثور وحب الشباب على منطقة الوركين والايد سببه نقص فيتامين A, D, والاحماض الدهنية.

العلاج: حاولي تقللي من استهلاك الدهون غير المشبعة, وزودي من اكل سمك السلمون, المكسرات, الكبدة, المشمش المجفف, وفيتامين A اللي موجود في الخضروات زي الجزر والفلفل الاحمر الحلو, الخس, والخضروات الغامقة زي الجرجير والكرنب.

6- لون اصفر في بياض العين:

السبب: سببه نقص في فيتامين B12.

العلاج: زودي من اكل اللحوم الحمرا, الكبدة, السمك, الفراخ, كبدة الفراخ, اللبن, البيض, الجبنة, السلمون, التونة, اللحمة الضاني.

7- انسجة الاسنان المتضررة:

السبب: ده بيكون سببه نقص في فيتامين D واظهرت الابحاث ان الاشخاص اللي بيعانوا من نقص فيتامين D بيعانوا دايما من التهاب اللثه.

العلاج: كلي الاكلات الغنية بفيتامين D وكمان الاكلات الغنية بالكالسيوم والفوسفور لانها مهمة لصحة الاسنان, زي منتجات الالبان, الارز البني, الطماطم, الفول, الاسماك, الفواكة الحمضية, العنب.

8- تشققات في زوايا الفم:

السبب: تشقق زوايا الفم معناها نقص في فيتامين B12, B2, B3, الغنية بالحديد والزنك.

العلاج: حاولي تاكلي فراخ اكتر, واسماك خصوصا السلمون, البيض, الفول, والمكسرات, والمتخصصين بينصحوا انك تجمعي ما بين الاكلات دي والخضروات لان فيتامين C بيساعد على مكافحة العدوى وبيحسن عملية التمثيل الغذائي للحديد وبيساعد على امتصاصه.

في النهاية مهم انك تفتكري العلامات دي وانها بتنبهك على نقص الفيتامينات في جسمك واللي تقدري تعوضيها ببساطة من خلال تغيير نظامك الغذائي لنظام متوزان فيه كل الفيتامينات اللي محتاجها الجسم, وممكن كمان ان العلامات دي ميكونش ليها علاقة بنقص الفيتامينات, يعني مثلا ممكن يكون حب الشباب بسبب حساسية, وتنميل الاطراف ممكن يكون سببها مشاكل في الرقبة, عشان كده ممكن نستشير دكتور عشان تتأكدي ان مافيش مشكلة غير نقص الفيتامينات وفي الحالة دي تقدري تعوضيه بالاكل زي ما قولنا في المقال بتاعنا.