اكتر 10 كذبات ممكن تتقال من الشريك في العلاقة

سواء الراجل او البنت في العلاقة احيانا بيضطروا للكدب في بعض الاوقات, عشان تنقذي نفسك من محادثة او حوار انتي مش مستعدة ليه, او من احراج, او حتى تخافي من رد فعل مش مريح او عنيف من الطرف التاني, وايا كان السبب فبيضطر كل طرف يكدب على التاني, والنهاردة من خلال موضوعنا هنقولك اكتر كذبات بتتقال من الشريك.

اكتر كذبات بتتقال من الشريك:

1- انا كويسة/كويس:

اكيد اوقات كتير بنسمع الكلمة دي من الشريك, واللي ممكن نعتبرها كذبة بيضا هي واحدة من اكتر الكذبات في العلاقة, لكن المفروض ان الحاجة الوحيدة اللي ميكدبش فيها الزوجين على بعض هي المشاعر, لازم يصرحوا بمشاعرهم الحقيقية لبعض لما طرف يكون متضايق يقول للتاني,  وممكن تكون الكدبة لانك انتي مش عايزة تصارحي نفسك بمشاعرك او اللي انتي حاسه بيه او تكوني عايزة تتجنبي انك تتسألي عن سبب الزعل فبتكتفي بكلمة انا كويسة وفي الحالتين معظم الاشخاص كدبوا كدبة بيضا مرة او اتنين او اكتر في العلاقة.

2- حبيتي/حبيت كام مره:

غالبا معظم الاشخاص بيكدبوا في النقطة دي ومش بيحبوا يصرحوا هما حبوا او ارتبطوا كام مرة خصوصا لو كانت اكتر من مرة, لان دايما بنبقى عايزين نحسس الشريك اللي معانا دلوقتي انه مميز ومختلف فبنتجنب ذكر التجارب السابقة, والكدبة دي معظم الاشخاص تقريبا بيكدبوها.

3- حب ام واب الشريك:

معظم الاشخاص بيكدبوا في مشاعرهم الحقيقية ناحية ام واب الشريك, وغالبا بيعلموا كده عشان يحافظوا على السلام الاسري او ما بين افراد العيلة, او انهم مش بيشوفوا انه مالوش لازمة يصرحوا عن مشاعرهم الحقيقية او انه مش هيغير حاجة من الوضع.

4- المسائل المادية:

المفروض ان الازواج ميكدبوش على بعض في المسائل المادية ويكون في نقاش وحوار مفتوح بينهم وشفافية بين الاتنين لما يتعلق الامر بالفلوس, لان احيانا الزوجة بما انها هي اللي بتكون اكتر عن ميزانية البيت تشتري حاجة مثلا وتقول سعر مختلف عن اللي اشترتها بيه, اكيد ده غلط جدا لازم تكون في مصارحة وصدق في صرف الفلوس.

5- شكلك حلو:

دي تعتبر كدبة بيضا صغيرة ممكن تتقال عشان منجرحش مشاعر الطرف التاني او نضايقه, يعني ممكن يكون الفستان شكله مش حلو عليكي اوي بس هيفضل في الحالة دي يقولك ان شكلك حلو عشان ميجرحش مشاعرك بس وبردو الوضع ينطبق عليكي معاه, ودي تقريبا من اكتر الكذبات اللي ممكن تكون بتتقال في العلاقات.

6- انك مش بتفكري/بتفكر في الشريك القديم:

اكيد لما بنكون مرتبطين وبننفصل بتبقى في ذكريات وحاجات كتير في العلاقة ممكن نفتكرها غصب عننا من وقت للتاني, وده بيحصل عند كتير من الاشخاص يعني امر طبيعي ان ممكن من وقت للتاني نفتكر المشاعر والذكريات دي, وبنضطر نكدب ونقول اننا مش فاكرين المشاعر دي او مش بتمر علينا من وقت للتاني عشان منخليش الشريك يغير او يضايق.

7- انه بيحب طبيخك:

رايه في اكلك دي بردو تعتبر كدبة بيضا ومن الكدبات اللي في كتير من الاشخاص بيقولوها, اكيد لما تكوني عاملة اكلة وتسأليه ايه رايك فيها مش هتبقي عايزة تسمعي انها وحشة اكيد هتبقي مستنية منه يمدح فيها ويقولك ان طعمها يجنن, لانه لو قال عكس كده ممكن الموضوع ينتهي بخلاف وهيضطر انه يتعامل مع النتايج.

8- بتتفقي/بيتفق معاكي:

لو الشريك دخل في حوار او جدال مع حد هتقفي في صفه حتى لو مش متفقه معاه في رايه, في الحالة دي هتكدبي عشان تدعمي موقفه بس قصاد الشخص التاني, لان الدعم والتضامن من الحاجات المهمة جدا في اي علاقة.

9- الرضا اثناء العلاقة الحميمية:

في العلاقة الحميمية ما بين الزوجين ممكن كل طرف بردو يكدب على الطرف التاني عن رضاه اثناء العلاقة وكل طرف يوصل للتاني انه كان مبسوط ومستمتع جدا وممكن تكون الحقيقة عكس ده او مش بالدرجة اللي بتتقال بالظبط, لكن في الموضوع ده الافضل المصارحة بين الزوجين ويبقى منفتحين اكتر للنقاش فيه.

10- الكدب عن الشكل:

ساعات كتير بيمر اوقات على اي حد بيكون شكله مش حلو او مرهق, ولو هو سألك او انتي سألتيه عن شكلك اكيد هيكون الرد انه شكلك حلو, والكدب في الحالة دي بردو تعتبر كدبة بيضا لان كل طرف مش بيبقى عايز يضايق التاني, وبيفضل يقول كلام يرفع من معنوياته.

في النهاية الكدب مش عادة كويسة في اي علاقة, الافضل ان كل طرف يقول الصدق مع انه يحط في الاعتبار ان الحقيقة دي متجرحش الطرف التاني او تضايقه, وفي النهاية مافيش حد مثالي, ومعظم الكدبات اللي قولناها تقريبا هي كدبات عشان تحافظ على السلام في العلاقة وتجنب اذيه مشاعر الطرف التاني, فلو لقيت او لقيتي نفسك بتقولوا الكدبات دي في العلاقة متقلقوش واعرفوا انك مش لوحدكم.

8 حيل هتساعدك تكشفي بيهم الشخص الكذاب