11 سر وحيلة جمالية من موديلز فيكتوريا سيكريت بيحافظوا بيها على جمالهم
اكيد كلنا لما بنشوف موديل فيكتوريا سيكريت وبنسأل نفسنا هما ازاي بيحافظوا على جمالهم بالشكل ده بالرغم اننا ممكن نكون بنحاول اننا نمشي على نفس القواعد او روتين العناية بتاعهم لكن النتيجة مش بتطلع زيهم, وده لان في اسرار لسه منعرفهاش, عشان كده النهاردة احنا جايبين لكل بنات حوا اسرار جمالية من الموديلز عشان تقدري توصلي لنفس النتيجة.
اسرار جمالية من الموديلز:
1- ماسك الدهب:
حتى لو انتي مش بتعتني ببشرتك بشكل كافي او مهملة فيها بقالك فترة ماسك الدهب يعتبر هو الماسك المنقذ اللي هيصلح بشرتك ويديها نضارة بشكل سريع من اول استخدام, تقريبا كل الموديلز بيستخدموا ماسك الدهب قبل اي عرض ليهم عشان بشرتهم تبان صحية ومتألقة, وبنرشح لكم ماسكات دهب ممكن تستخدموها.
– ماسك Peter Thomas 24K Gold Mask.
– ماسك Gold Radiance Precious Youth Serum – Pond’s.
– ماسك Gold Elixir Glace -Terry.
– ماسك Lasio.
2- يوم Free:
طبعا كلنا بنشوف الموديلز قد ايه محافظين على جسمهم ورشاقتهم ودايما بيمشوا على انظمة غذائية صحية وتمارين, لكن هما كمان بياخدوا يوم فري ياكلوا فيه اي حاجة هما عايزينها, وده يعتبر جانب مهم جدا في اتباع اي نظام غذائي لانه هيقلل من التوتر الذهني اللي ممكن يحصل بسبب انك مقيدة نفسك على طول بنوعية اكل معينة ومش عارفة تاكلي اللي نفسك فيه, لكن لازم تحطي في الاعتبار ان اليوم الفري او الوجبة دي مش معناها ان نظامك الغذائي انتهى وانك تستمري في اكل الاكلات الغير صحية.
3- وش طبيعي وفريش:
لو هنلاحظ هنلاقي ان اغلب الموديلز بره عروض الازياء تقريبا بيبعدوا عن المكياج خالص وبيخلوا وشهم طبيعي وفريش, لان هما بيتعرضوا لاضاءة ومكياج كتير اثناء العروض, عشان كده بيفضلوا وهما بعيد عن الاضواء يكونوا بطبيعتهم من غير مكياج عشان يريحوا بشرتهم, لان المكياج باستمرار ليه تأثير سلبي على البشرة وبيأدي لظهور التجاعيد المبكرة, وبيسد مسام البشرة, وده معناه ان كل ما حطيتي مكياج اكتر عشان تغطي عيوب البشرة هتحتاجي مكياج اكتر مع الوقت لان العيوب هتزيد مش هتقل, عشان كده نصحيتهم ليكي انك متحطيش المكياج باستمرار او طول الوقت.
4- شرب كمية مية مظبوطة:
دايما بنسمع ان كمية المية لكل شخص في اليوم هي 8 كوبايات مية على الاقل, لكن الحقيقة ان كل جسم مختلف وليه كمية مية مختلفة, والمفروض ان الشخص اللي بيعيش في مناخ معتدل يعني مش حر اوي انه يشرب 30 مل من المية لكل كيلو جرام.
وعشان تقدري تعرفي كمية المية اللي جسمك محتاجها بالظبط اضربي وزنك في 30 , وبعدين قسمي الناتج على 1000 هيطلع لك عدد اللترات اللي جسمك محتاجها في اليوم.
او اضربي وزنك في 30 , وبعدين اقسمي الناتج على 250 مل, هيطلع لك كام كوباية المفروض تشربيها في اليوم.
5- اختيار الفيتامينات الصح:
مهم جدا تختاري الفيتامينات بشكل صح اللي محتاجها جسمك, يعني لو انتي ماشية على نظام غذائي ولو نباتية او غير نباتية, ضروري انك تضيفي فيتامين B12 لروتينك الغذائي اليومي سواء عن طريق الفيتامينات من الصيدلية او الاكل وهنلاقيه الفيتامين موجود في اللحوم الحمرا, الكبدة, السمك, الفراخ, اللبن, البيض, الجبن, ولو بتعيشي مثلا في بلد مافيهاش شمس كتير يبقى لازم تاخدي فيتامين D وهنلاقيه موجود في المصادر الغذائية الحيوانية, وزيوت كبد السمك, والاسماك الدهنية زي التونة والسالمون, المشروم, عصير البرتقان, صفار البيض, كبدة البقر, منتجات الالبان, منتجات فول الصويا, حبوب الفطار.
6- وقت الحلاقة:
ممكن كتير من البنات مفكروش قبل كده ان وقت الحلاقة لازالة الشعر الزيادة ممكن يكون مؤثر, لكن افضل وقت للحلاقة هو بعد الضهر او ما لا يقل عن نص ساعة بعد ما تصحي من النوم, لان بعد النوم بيكون الجلد متورم وده ممكن يخلي الشعر ميتشالش كله ويسبب ظهور الشعر تحت الجلد, وبرغم ان السويت يعتبر افضل وسيلة لازالة الشعر, لكن احيانا مش بتبقى مناسبة للكل فلو انتي مضطرة تستخدمي مكنة الحلاقة يبقى حطي في اعتبارك النصيحة دي.
7- متعمليش تمارين وانتي حاطه مكياج:
اكبر غلطة ممكن تعمليها انك تمارسي التمارين الرياضية وانتي حاطه مكياج لان العرق والمكياج هيختلطوا مع بعض, وهتكون النتيجة ان مسام البشرة هتتسد وممكن تأدي لظهور الحبوب والبثور وتعملك مشاكل في بشرتك.
8- استخدمي التلج على البشرة:
عشان تحافظي على بشرتك مشدودة وفريش وشكلها صحي, واحدة من موديلز فيكتوريا سيكريت بتنصحك باستخدام التلج, دلكي مكعب تلج على بشرتك كل يوم الصبح.
9- تقليل انتفاخات العين:
للتخلص من انتفاخات العين, قطعي شريحتين من البطاطس وحطيهم تحت العين لمدة من 10 – 15 دقيقة هتقلل من الانتفاخات واكياس العين.
10- قللي كل المكياج وركزي على العيون:
اتجاهات المكياج بتتغير بشكل مستمر, ويعتبر افضل اتجاه مكياج للسنة دي هو الوش الطبيعي مع التركيز على مكياج العيون بس واظهارها.
11- لتجنب تلطيخ العين:
عشان تتجنبي تلطيخ العين بالماسكارا, سيبي الماسكار تنشف كويس ما بين الطبقات, يعني حطي طبقة واستني شوية لما تنشف تماما وبعدين حطي الطبقة التانية, وافضل طريقة انك تستخدمي كارت على الجفون وانتي بتحطي الماسكارا عشان تتجنبي التلطيخ.