طرق عمل ميست للبشرة Face Mist لترطيبها وتجديدها والحفاظ على المكياج فترة اطول
ميست البشرة Face Mist من الحاجات الممتازة جدا اللي ممكن تستخدميها طول السنة, والميست ليه فوايد كتير انه بيحافظ على رطوبة البشرة لو بشرتك جافة, بينعش البشرة ويجددها لو بشرتك شكلها مجهد ومرهق, والميزة الاهم فيه انه بيحافظ على المكياج لفترة اطول, والنهاردة من خلال موضوعنا هنقولك طرق عمل ميست للبشرة في البيت بمكونات بسيطة.
طرق عمل ميست للبشرة:
1- ميست الشاي الاخضر:
الميست ده غني جدا بالمواد المضادة للاكسدة ومناسب جدا للبشرة الدهنية او المعرضة لحب الشباب.
المكونات:
2 كوب مية مغلية.
2 كيس شاي اخضر.
من 2 – 3 نقط زيت فيتامين E “اختياري”.
الطريقة:
حطي اكياس الشاي في المية المغلية وسيبيها منقوعة لمدة ساعة, وبعدها شيلي اكياس الشاي من المية وصبيها في ازازة ببخاخ وضيفي لها زيت فيتامين E ورجيها كويس, وكده يبقى الميست جاهز للاستخدام, حطيه في شنطتك وانتي بره البيت ورشي منه على الوش عشان تجدديها كل ما تحتاج.
2- ميست جوز الهند والصبار:
مية جوز الهند تعتبر مرطب طبيعي للبشرة, وبتساعد على تجديد البشرة, وبتمنع الشيخوخة والتجاعيد, والصبار مهديء طبيعي مناسب لكل انواع البشرة.
المكونات:
مية جوز الهند.
جل الصبار.
1 معلقة صغيرة زيت لوز حلو.
الطريقة:
اخلطي كميات متساوية من مية جوز الهند وجل الصبار, وبعدين ضيفي لها زيت اللوز الحلو, وصبي الخليط في ازازة ببخاخ.
3- ميست الفانيليا والبابونج:
البابونج مريح ومهديء للبشرة, وبيقلل من الالتهابات, والفانيليا ليها تأثير منعش للبشرة.
المكونات:
1 كيس شاي بابونج.
من 2 – 3 نقط زيت الفانيليا.
نقطتين من زيت الجوجوبا.
الطريقة:
ضيفي كيس البابونج لكوباية مية مغلية, سيبيه منقوع فيها لمدة ساعة, املي ¾ الازازة بشاي البابونج, ضيفي لها زيت الفانيليا وزيت الجوجوبا, واملي باقي الازازة بمية مقطرة, ورجيها, وكده يبقى الميست جاهز للاستخدام.
4- ميست الخيار:
الخيار مفيد جدا لترطيب البشرة, ومية الورد بتساعد على تقليل المسام الواسعة, وده بيخلي الميست ده مفيد ومناسب جدا للبشرة الدهنية.
المكونات:
من 1 – 2 ثمرة خيار.
مية ورد.
الطريقة:
اغسلي الخيار وابشريه, واضغطي على البشر بتاعه خدي منه العصير, قيسي كمية عصير الخيار اللي طلعت عندك وضيفي عليها نص الكمية مية ورد, صبي الخليط في الازازة.
5- ميست مية الورد:
مية الورد بتنعش البشرة وبتحافظ على توازن الحموضة في البشرة, بتهدي البشرة وبتزيل الاجهاد.
المكونات:
½ كوباية مية ورد.
1 معلقة كبيرة من زيت الجوجوبا.
الطريقة:
امزجي المكونات مع بعض, وصبيها في ازازة ببخاخ للاستخدام.
6- ميست اللافندر والنعناع:
النعناع ليه تأثير مهديء للجلد, واللافندر ليه خصائص علاجية للبشرة.
المكونات:
1 كيس شاي نعناع.
من 2 – 3 نقط زيت اللافندر.
الطريقة:
انقعي كيس شاي النعناع في كوباية مغلية لمدة ساعة, لما تبرد خالص صبيه في الازازة وضيفي له زيت اللافندر ورجي الخليط.
7- ميست الالوفيرا واللافندر:
المكونات:
1 معلقة كبيرة من زيت اللافندر.
1 معلقة كبيرة من زيت الورد.
جل صبار الالوفيرا.
مية.
الطريقة:
املي نص الازازة او ¾ بالمية ضيفي لها زيت اللافندر وزيت الورد, املي باقي الازازة بجل الصبار, ورجي الخليط.
احفظي اي نوع من الميست بعد ما تحضريه في التلاجة لحد ما تيجي تستخدميه, ممكن تحتفظي بيه لحد 10 ايام.
طريقة استخدامه ممكن تحطي منه اثناء اليوم او بعد ما ترجعي البيت, او ترشيه يوميا على البشرة قبل النوم.