10 عادات أكل صحية بيعملوها البنات اللى مابيحتاجوش يعملوا دايت أبدا

آية حسان

في

4039

الدايت مش دايما بيجيب نتيجة، او ممكن يجيب نتيجة بس ماتدومش وده لانه عاداتنا اليومية و عادات الاكل ليها دور كبير سواء فى خسارة/ زيادة الوزن او الحفاظ عليه، ولانه فى بنات كتير مابتحتاجش تعمل دايت رغم انهم بياكلوا اللى هما عايزينه بس مابيتخنوش و بتبقى محتارة ازاى بيعملوا كده ، فى المقال ده هنقولك .. اعرفى معانا 10 عادات أكل صحية بيعملوها البنات اللى مابيحتاجوش يعملوا دايت أبدا

10 عادات أكل صحية بيعملوها البنات اللى مابيحتاجوش يعملوا دايت أبدا ..

1- مش كل يوم كيك :

الكيك والمعجنات فى اعياد الميلاد و المناسبات بس، مش كل يوم كيك ، ودى اول عادة لازم تكتسبيها و تنفذيها .. ابعدى عن الدوناتس و السينابون و الكيك و الجاتوه و ماتأكليهومش الا لو فى مناسبة زى عيد ميلاد مثلا، وحتى فى المناسبة دى تاكلى منهم كميات قليلة و باعتدال علشان تقللى من وزنك و بعد كده تثبتيه علشان كده اختارى الحلو بتاعك كويس و استغنى عن الحاجت الزيادة اللى ممكن تاكليها بشكل موسيمى خليها فى مناسبتها بس، زى الكحك مثلا .. اكل الكحك فى العيد وبس. و احتفلى بعيد ميلادك بكيك ، لكن مش فى اى عيد ميلاد تاكلى كيك.

2- بيتكلموا كتير على الاكل :

ده صحيح ، الكلام على الاكل خصوصا لو قاعدة مع اصحابك او زمايلك فى الشغل وفى مواضيع مسلية او مضحكة بتتكلموا فيها وانتوا بتاكلوا هيقلل من كمية الاكل اللى هتدخليها جسمك و يخليكى تاكلى اقل بكتير من الكمية المعتادة و فى نفس الوقت هتشبعى برده ، وكمان حاولى تأكلى ببطء و لقيمات صغيرة ، فى تجربة عملوها مجموعة من الباحثين طلبوا من مجموعة من الناس تاكل بولة آيس كريم فى 5 او 30 دقيقة ، لقوا انه الناس اللى اكلوا معالق صغيرة ببطء شبعوا واستهلكوا كميات اقل بكتير من اللى اكلو كميات كبيرة . علشان كده حاولى ماتأكليش لوحدك او قدام التليفزيون لانه هيخليكى تاكلى كميات اكبر من العادى.

3- مابيضيعوش وقتهم على الاكل الـ low fat :

الاكلات او المنتجات الى بيبقى مكتوب عليها low-fat او low-calorie بتبان كويسة نظريا. لكن المشكلة هى انهم بيبقوا غنيين جدا بالكربوهيدرات اللى بعد كده جسمك بيحولها لسكر و فى النهاية لدهون و بالتالى وزن زائد ، علشان كده الفكرة كلها زى ما هنقول دلوقتى و هنأكد عليكى اكتر من مرة ، حاولى تأكلى أكل صحى قليل او خالى من الدهون و ماتضيعيش وقتك على الاكلات المصنعة و الجاهزة .

4- مفيش حاجة اسمها مفيش أكل :

اكبر غلط هو انك تحرمى نفسك من حاجات بتحبيها او تمشى قاعدة ” مفيش اكل كذا ” ، الابحاث بتقول انه عند الستات اللى بيحبوا الشوكولاتة لما تم حرمانهم منها لمدة اسبوع بقى عندهم cravings وشهية اكبر للشوكولاتة و كلوا كمية اكبر لما اتحرموا منها عن الكمية الطبيعية اللى كانوا بياكلوها و هما مش ممنوعين منها، وفى دراسة تانية فى 2010 اكدت انك لو مثلا منعتى نفسك من اكل الشوكولاتة وحاولتى ماتفكريش فيها هتفكرى فيها اكتر ، علشان كده ماتحرميش نفسك من الحاجات الصغيرة دى، لكن حاولى تقللى الكمية و تاكلى منها على فترات متباعدة.

5- بيناموا كويس :

لما تبقى مشغولة اول حاجة بتستغنى عنها و بتقع منك هى ساعات النوم كاملة، لكن لو كنتى عايزة تحافظى على نظام غذائى صحى يبقى لازم تحافظى على ساعات نومك و تنامى كويس اوى، فى ابحاث بتقول انه للنوم الصحى اولوية فى الحفاظ على وزن مثالى، وده لانه قلة النوم ليها تأثيرات هرمونية بتتسبب فى زيادة الوزن و بتخلى يبقى فى شهية اكتر للأكل الدهنى و الـ junk food ، وكمان قلة النوم مش هتخلى عندك طاقة للتمرينات و الـ workouts الضرورية للحفاظ على جسم صحى.

6- مابيقسوش على نفسهم اوى :

لو ضعفتى فى مرة وكلتى تشيز برجر و فرايز ماتقسيش على نفسك اوى، عادى انك بين كل فترة والتانة يبقى نفسك ف الاكل ده ، طالما الموضوع باعتدال وفى فترات بعيدة ماتقيش على نفسك وماتحرميش نفسك من حاجة ، سامحى نفسك و كملى على نظامك الصحى عادى ، لانه فى ابحاث فى جامعة واترلو فى كندا بتقول انه جلد الذات فى موضوع الاكل وعدم الثقة بالنفس و الاحساس بالذنب ممكن يسبب اضطرابات فى الاكل او eating disorder وه ممكن يخليكى تاكلى كميات اكبر من غير حساب، وبالتالى يزيد وزنك .. ده بالضبط اللى احنا مش عايزينه يحصل .

7- بيبعدوا عن الدايت صودا :

السكر الصناعى ساعات بيكون حل لما تكونى بتعملى دايت وعايزة تبعدى عن السكر العادى، ورغم انه فى دراسات بتقول ان السكر الصناعى او المحليات الصناعية مابتأثرش على الوزن سواء بشكل ايجابى او سلبى ، لكن فى دراسات تانية بتقول برده انه المشروبات الصناعية المحلاه بسكر صناعى او ” الخالية من السكر” ممكن تسبب زيادة الوزن لانها بتدى احساس للجسم بيشبه احساس الجوع. علشان كده واحدة من اكبر الخدع هى الدايت صودا، وبتعتبر واحدة من عادات أكل صحية بيعملوها البنات اللى مابيحتاجوش يعملوا دايت أبدا هى انهم بيبعدوا عن الدايت صودا تماما او لو قدرتى ابعدى عن الصودا بكل أنواعها، لانه الدايت صودا بتجهز الدماغ انه يبعت اشارات باحساس اكبر بالجوع و بعد كده ممكن تسبب ادمان الصودا اكتر ، وكمان انك تطلبى دايت صودا مع الاكل ده ممكن يخليكى تعتقدى انك وفرتى كالوريز ممكن تاكلى بيها اكتر و ده مش صحيح .

بيبعدوا عن الدايت صودا

8- بيدخلوا المطبخ :

الاكل الصحى مش ممل ابدا لو جربتى تعمليه بنفسك و تحولى مكونات عادية لطبق صحى عملتيه بايدك لذيذ وكله فوايد، ضيفى لاكلاتك الاعشاب و التوابل علشان تضيفى بيهم نكهه لأى أكله هتعمليها و تستبدلى بيهم الدهون ، فى دراسة من جامعة دنفر فى امريكا بتقول انه التوابل زى الفلفل الاحمر الحامى بيعززوا من الميتابوليزم اوعملية حرق الجسم للدهون وده بيساعدك تحرقى كالوريز زيادة بعد كل اكله، علشان كده ضيفى توابل زى البابريكا و الشطة و الفلفل الحامى لمعظم وجباتك.

9- مابيعدوش الكالوريز:

فى فرق كبير بين انه جسمك بيستهلك 1000 كالورى من الـ junk food فى وجبة واحدة او انه بيستهلك او بيحرق 1000 كالوري من اكل اليوم كله، علشان كده حاولى تبعدى عن انك تكونى بتعدى الكالوريز فى كل حاجة ، لانه عد الكالوريز فى كل حاجة ممكن يتحول لهوس و يبقى بيخليكى بتشيلى الهم قبل ما تأكلى اى و كل حاجة و ده مش صحى، بدل ما يعملوا كده .. البنات اللى عندهم عادات أكل صحية بتخليهم مايحتاجوش يعملوا دايت ابدا بيحاولوا معظم الوقت انهم يملوا أطباقهم بأكلات صحية و يبعدوا عن الحاجات اللى عارفين انها فيها دهون بزيادة زى اللحوم الدسمة و الاكل المقلى و الفواكهه كثيرة السعرات الحرارية زى الموز والافوكادو مثلا ، وبيركزوا على اكل البروتين الصحى الموجود فى الاسماك والدجاج والخضروات.

10- بيستهلكوا السكر بذكاء :

ببساطة السكر مش مفيد للصحة او لوزن الجسم بأى حال، و الجسم بيقدر يتعامل مع كمية محدودة جدا من السكر، علشان كده لو استهلكتى منه كميات كبيرة الجسم بيخزنه فى صورة دهون، بس ده مش معناه انك تقطعى السكر تماما ، لكن حاولى تفهمي جسمك و تعرفى حدوده، يعنى لو حسيتى بانتفاخ مثلا لو كلتى كام بسكوتة او قطعة حلويات فيها سكر كتير يبقى حاولى تقللى من كمية السكر او تبعدى عن النوع ده من الحلويات بالتحديد لانه فى النهاية الاكل المفروض يحسسك براحة و يحسن من صحتك مش العكس.