بتحبى الحلويات؟ اعرفى 8 نصايح سهلة و طرق تقللى بيهم استهلاكك من السكر .. ..
السكر بيعتبر مكون أساسي فى كتير من اكلات المصريين و فى كوبايات شاى كل يوم و القهوة و النسكافيه اللى مابنستغناش عنهم، لكن تعرفى انه استهلاكنا الزايد للسكر ممكن يأثر على صحتنا بشكل سلبى؟ مش بس انه هيتسبب فى زيادة الوزن لكن كمان له تأثيرات و مضاعفات سيئة على الصحة بشكل كبير، علشان كده فى المقال ده بنات حوا هتقدملك حلول مبتكرة تقدرى تقللي بيها استهلاكك من السكر او على الاقل تسيطرى عليه، اعرفى معانا 8 نصايح سهلة و طرق تقللى بيهم استهلاكك من السكر ..
بتحبى الحلويات؟ اعرفى 8 نصايح سهلة و طرق تقللى بيهم استهلاكك من السكر .. ..
1- قللى من المأكولات والمشروبات اللى بيدخل فى تكوينها سكر :
معظم كميات السكر اللى بتدخل جسمنا كل يوم بيبقى ليها مصدرين أساسيين، المصدر الاول هو: الصودا، عصاير الفاكهه، الشاى و القهوة بسكر، و مشروبات الطاقة او الـ energy drinks. اما المصدر التانى فبيبقى الكيك بأنواعه، البسكوتات، الحلويات و المعجنات، و الـ candy bars والشوكولاتات بأنواعها.و الابحاث بتقول انه 90% من السكر اللى بناكله بيكون بسبب المصادر دى و الاغذية المصنعة، علشان كده لازم تقللى من المأكولات والمشروبات اللى بيدخل السكر فى تكوينها.
2- ماتتجنبيش كل أنواع السكر :
فى اغذية كتيرة بيكون السكر مكون طبيعى فيها ” يعنى سكر طبيعى مش صناعى ولا سكر أبيض” ، زى مثلا اللاكتوز الموجود فى الزبادى او الفركتوز الموجود فى الفاكهة ، وكميات قليلة من السكر الطبيعى الموجود فى الجزر مثلا . اكيد انتى مش محتاجة تقطعى السكر من المصادر الطبيعية اللى زى دى لانه الاغذية دى طبيعية و بتعتبر صحية جدا، وده لسببين: الاول هو انك مش الطبيعى تأكلى بزيادة كميات من الفاكهة او الخضار فبالتالى كميات السكر اللى ممكن تاخديها منهم هتبقى ضمن الحدود الطبيعية، السبب التانى هو انه الاغذية دى ليها فوايد كتيرة منها انها غنية بالألياف والفيتامينات و المعادن و مضادات الأكسدة المهمة لصحتك.
3- اشربي قهوة سادة :
وقت شرب القهوة بيعتبر عند ناس كتير هو الوقت اللى بيزودوا فيه كميات السكر حتى عن المعلقتين اللى بياخدوهم فى الطبيعى مثلا، خصوصا لو كان وقت القهوة ده فى نص يوم شغل لانه فى اعتقاد شائع كده بيقول نزود السكر علشان يدينا طاقة ونصحصح، علشان كده حاولى تشربى قهوتك سادة او بسكر قليل جدا جدا علشان تقللى من استهلاكك للسكر كل يوم، فى الاول ممكن كل حاجة يبقى طعمها مر و مش حلو، لكن مع الوقت هتتعودى و هتدوقى كل حاجة بطعمها الطبيعى و هتحسيه أحلى كتير “وده عن تجربتى الشخصية”. ولو عايزة يبقى فى نكهه فى قهوتك جربى تضيفيلها الفانيلا او البندق او اللوز مثلا.
4- خدى بالك من استهلاكك للعسل :
العسل بيعتبر من المصادر الطبيعية الاساسية للسكر وده لانه مابيتمش تصنيعه او تكريره ، لكن خدى بالك انه العسل ممكن يخدعك، وده لانه معلقة واحدة من عسل النحل بتساوى حوالى 4 معالق من السكر العادى و تقريبا نفس كمية الكالوريز، علشان كده لازم تاخد بالك من استهلاكك للعسل الابيض او الأسود.
5- استمتعى بالسكر لكن بطريقة صحية :
طريقة معنا كمان من طرق تقللى بيهم استهلاكك من السكرهى انك تجربى تبعدى شوية عن المشروبات اللى بتتطلب سكر كتير فى تكوينها واستبدليها بالمشروبات اللى ممكن تستمتعى بيها و يبقى طعمها من غير اضافة سكر، جربى وصفة الميلك شيك فانيليا بدون لبن او سكر nondairy vanilla milkshake ، المكونات :
نص ثمرة موز مقشرة و مجمدة.
نص كوباية أناناس مجمد.
نص كوباية من زيت اللوز بالفانيليا غير محلى.
معلقة أكل من خلاصة الفانيليا.
من 3 لـ 5 مكعبات تلج.
اضربيهم كلهم مع بعض فى الخلاط لحد ما يوصلوا للقوام اللى تحبيه و بكده استمتعى بمشروب لذيذ خالى من السكر و فيه 120 كالورى بس!
6- اشربى مية كتير :
فى دراسة حديثة بتقول انه الناس اللى بيقدروا يزودوا من معدل شربهم للمياة كل يوم بيقدروا مع الوقت يقللوا استهلاكهم للسكر بمقدار من معلقة واحدة لحد 4 معالق.
7- أقرأى معلومات الأكل كويس :
طريقة تانية من طرق تقللى بيهم استهلاكك من السكر هى انك لما تيجى تشترى حاجة حلوة او candy bar اتأكدى انك تقري المعلومات المكتوبة عليه كويس وانه مايزيدش كمية السكر اللى فيه عن 12 جرام، ولو بتشربى hot chocolate سريع التحضير مثلا أتأكدى برضه انه مافيهوش اكتر من 8 جرام من السكر، والزبادى بالنكهات او زبادى الفواكه مايكونش فيه اكتر من 20 جرام، والتزمى بالكميات دى علشان يبقى استهلاكك للسكر تحت السيطرة ، وبطبيعة الحال لو كلتى علبتين زبادى مثلا يببقى انتى كده دخلتى لجسمك ضعف كمية السكر.
8- راجعى الأكل الحلو اللى بتحبيه :
آخر طريقة معانا من طرق تقللى بيهم استهلاكك من السكر هى انك تعملى list بأكلاتك المفضلة اللى بتحتوى على سكر ومابتقدريش تستغنى عنها، وحطى خطة لأكلها والتزمى بيها، يعنى مثلا لو كنتى بتحبى تاكلى حلويات شرقية او كيك مثلا كل يوم بعد الغدا او العشا، اختارى 3 أيام فى الاسبوع تأكلى فيهم الصنف الحلو وباقى أيام الاسبوع تاكلى فيها فاكهه.
اعرفى معانا كمان 12 علامة تقولك انك بتاكلي سكر كتير