نصايح وأفكار ازاى تستعدى لشغلك الجديد ..

شغلك الجديد يعنى بداية جديدة  ولايف ستايل جديد، يعنى بتظبطى مواعيد و سير يومك على مواعيد وظروف الشغل، خصوصا لو الشغل لسه فى اوله وبيبقى فى شوية لغبطة فى الاول فى ازاى هتظبطى البيت و الخروجات مع الشغل و طلباته وحاجات كتير ممكن تشغل بالك و تفكيرك فى البداية، بس ماتشيليش هم .. فى المقال ده بنات حوا هتنصحك و تعرفك ازاى تستعدى لشغلك الجديد ..

نصايح وأفكار ازاى تستعدى لشغلك الجديد ..

1- ظبطى أمورك فى البيت :

بنقصد انه لو كان عندك اولاد خصوصا لو أطفال صغيرين ممكن تبقى محتاجة تجيبيلهم baby sitter او تشوفيلهم حضانة مناسبة ، وضرورى تعملى ده قبل ما تبدأى الشغل، او لو فى اى حاجة تانية محتاجة تظبطيها بخصوص ظروف البيت فى الفترة اللى بتبقى موجودة فيها فى الشغل.

2- لو الشغل بعيد، اعرفى طريقك والمواصلات كويس :

اتأكدى انك عارفة طريق الشغل كويس وحاولى تروحى تجربى الطريق مرة قبل اول يوم شغل ليكى، خصوصا لو كان الشغل بعيد او فى اكتر من مواصلة هتركبيها، او لو فى اكتر من طريق للشغل، حاولى تعرفيهم كلهم  وتجربيهم علشان تعرفى الطريق الاسهل و الاسرع وتروحى اول يوم فى ميعادك من غير تأخير. 

3- جهزى لبسك :

اختارى لبسك لأول يوم فى اشغل بعناية و جهزيه من قبلها علشان مش هيبقى فى وقت كفاية تحضري كل حاجة قبل ماتروحى الشغل وطبعا مش هينفع تتاخرى من أول يوم، وافتكرى  انه لبس الخروج العادى مش دايما مناسب للشغل وانك ممكن تلبسي formal او semi formal ، شوفى معانا هنا ازاى تعملى لوك سمارت للشغل Creative Office Looks على طريقة Jacey Duprie 

4- ظبطى مواعيدك :

رتبى و ظبطى اى مواعيد اساسية او مهمة عندك على اساس مواعيد شغلك، بنقصد انه فى اول اسبوعين شغل ماينفعش تطلبى اذن او اجازات، علشان كده لو عندك ميعاد دكتور مثلا او خروجة مع اصحابك او زيارات مهمة حاولى تظبطى مواعيدها على انها تبقى فى الويك اند بس او بعد مواعيد الشغل، وكمان مهم قبل اول يوم ليكى فى الشغل انك تظبى مواعيدك مع الكوافير علشان تظبطى نفسك و تظبطى مكياجك وشعرك قبل اول يوم علشان تروحى فى احلى صورة ممكنة وتبقى واثقة من نفسك.

5- نامى كويس :

لو كنتى خلال فترة البحث عن شغل مش مهتمة بمواعيد نومك وبتسهرى، حاولى دلوقتى تعدلى النظام ده وتنامى فى مواعيد مناسبة علشان تقدرى تصحى لشغلك فى اول يوم ، وكل يوم، وابدأى جهزى نفسك من قبل استلامك للشغل بأسبوعين مثلا بانك تتدربى على النوم والصحيان على مواعيد الشغل بعد كده ، ولو ماعندكيش الوقت ده حاولى تبدأى تعودى نفسك على المواعيد الجديدة فى اقرب وقت ممكن ، ده هيساعدك تبقى مرتاحة و تنامى كويس قبل اول يوم شغل و ده مهم جدا و هيفرق معاكى.

6- جهزى الحاجات اللى ممكن تحتاجيها فى أول يوم شغل :

اتأكدى انه معاكى كل الادوات اللازمة لأول يوم شغل، notepad واقلام علشان تسجلى ملاحظاتك فى اول اسبوع، والمعلومات والنقط الاساسية اللى هتحتاجى تعرفيها وتركزى عليها ” ممكن تستغنى عنهم لو بتحبى تسجلى الملاحظات على موبايلك”، خدى معاكى اكلك لأول يوم لحد ماتعرفى اذا كانت الشركة بتوفر غدا للموظفين ولا هتجيبى معاكى اكلك كل يوم ، دايما خلى معاكى شنطة او briefcase يبان شكلنا professional .

7- لو هتشتغلى من البيت :

لو كنتى هتشتغلى freelancer من البيت، اتأكدى ان كل الحاجات اللى هتحتاجيها لشغلك موجودة حواليكى، الحاجات او الادوات دى بتشمل laptop يكون سليم وشغال ، خط نت كويس، طابعة او سكانر لو بتحتاجيهم،اقلام ، ورق و الحاجات دى، وحاولى دايما تخصصى فى البيت مساحة شغل تبقى زى مكتبك علشان يبقى شغلك دايما منظم و سريع.

8- اسألى عن الشركة اللى هتشتغلى فيها:

آخر نصيحة معانا فى ازاى تستعدى لشغلك الجديد هى انك مع كل الحاجات اللى ممكن تبقى محتاجة تعمليها قبل اول يوم ليكى فى الشغل الجديد، مهم جدا انك ماتنسيش  تعملى research وتدورى ورا الشركة اللى انتى رايحة تشتغلى فيها وتعرفى عنها معلومات اكتر، الموضوع بسيط جدا بأنك ممكن تبصى على website الشركة اكتر من مرة وتقلبى فيه كويس علشان تكونى فكرة عامة، ولو ليكى صديقة مثلا تعرف حد شغال فى الشركة دى ممكن تطلبى منها ترتبلكم ميعاد تشربوا فيه قهوة مع بعض علشان يكلمك عن الشركة و يعرفك عليها أكترو كمان تحسي براحة شوية لما تبقى رايحة اول يوم وانتى عارفة حد هناك.

اعرفى معانا كمان 5 دروس مهمة تتعلميها من أول وظيفة full time ليكى