Makeup Remover اعملى بنفسك فى البيت مزيل مكياج بمكونات طبيعية للبشرة اللى بتعانى من حبوب الشباب
مزيلات المكياج الصناعية و اللى فيها مركبات كيمائية اكيد بتدى نتيجة فعالة فى ازالة المكياج لكن مع الوقت بتبقى قاسية جدا على بشرتك و ممكن تتسبب فى تهيج البشرة و ظهورالالتهابات و الاحمرار، و ده بيتسبب فى جفاف البشرة و خشونتها لانه اكيد المركبات الكيميائية دى بيبقى ليها بعض التأثيرات السلبية على الزيوت الطبيعية اللى بيفرزها الجلد لترطيب وتغذية البشرة، علشان كده بننصح دايما انك تعوضى ده بانك تعملى ماسكات طبيعية لتغذية البشرة فى البيت، وفى المقال ده بنات حوا هتقولك على وصفتين سهلين لعمل Makeup Remover مزيل مكياج بمكونات طبيعية فى البيت خصوصا لو كنتى من اصحاب البشرة الحساسة او لو كنتى من اصحاب البشرة اللى بتعانى من حبوب الشباب ..
Makeup Remover اعملى بنفسك فى البيت مزيل مكياج بمكونات طبيعية للبشرة اللى بتعانى من حبوب الشباب ..
الطريقة الاولى : وصفة مزيل مكياج اللبن و الخيار :
مزيج الخيار و اللبن مفيد جدا للبشرة ، لانه بيعتبر مزيج فعال فى ازالة المكياج، وكمان بيرطب البشرة و بيهديها و بيساعد فى تقليل الهالات السوداء و انتفاخات العين.
المكونات :
خيارة.
لبن
كوباية
هون
برطمان للتخزين.
الخطوة الاولى :
قطعى الخيارة نصين و قشريها.
الخطوة الثانية :
باستخدام الهون اهرسي الخيار كويس اوى، ولو مفيش هون ، استخدمى اى آداة تقيلة مش مشكلة.
الخطوة الثالثة :
بعد ما تتأكدى انه الخيار اتهرس كويس، ضيفى عليه معلقتين أكل من اللبن ، او ممكن تكترى من كمية اللبن حسب رغبتك.
الخطوة الرابعة :
بعد ما تخلطى اللبن مع الخيار المهروس كويس اوى، حطى المزيج ده فى كوباية او ازازة او ممكن تستخدمى برطمان محكم الغلق للتخزين و بيتيه فى التلاجة علشان يسقع، مزيل المكياج ومرطب البشرة الطبيعى ده صالح للاستخدام لحوالى 3 او أربع أيام علشان كده حاولى ماتعمليش منه كمية كبيرة فى المرة الواحدة.
وعلشان تستخدميه، بلى قطنة من الميكس ده وبدأى امسحى بيها وشك علشان تشيلى المكياج بشكل كامل.
الطريقة التانية : وصفة مزيل مكياج الجوجوبا و فيتامين E والزيوت العطرية :
تانى وصفة معانا من مزيل مكياج بمكونات طبيعية هى وصفة مزيل مكياج زيت الجوجوبا ، الزيوت العطرية بشكل عام او زيت الزيتون بتعتبر من الزيوت المغذية جدا للبشرة ومابتسببش ليها اى ضرر ، وكمان مش هتقفل المسام بشكل كامل لكن هتساعدك تخليها اصغر..
المكونات :
زيت الجوجوبا ، ” لو مش متاح ممكن تستخدمى بدل منه زيت الزيتون.”
كبسولات فيتامين E .
زيوت عطرية ” زى زيت شجرة الشاى ، زيت الروزمارى اواى نوع تانى متاح. ”
ازازة للتخزين.
الخطوة الاولى :
صبى مقدارمعلقة اكل من زيت الجوجوبا فى الازازة ، وممكن تستخدمى اكتر من معلقة واحدة لو تحبى لانه زيت الجوجوبا بطبيعته خفيف جدا و مابيسببش اى دهون .
الخطوة الثانية :
افتحى كبسولة او اتنين من كبسولات فيتامين E وضيفى محتوياتها على زيت الجوجوبا وامزجيهم مع بعض.
الخطوة الثالثة :
ضيفى قطرات بسيطة اوى من الزيت العطرى المفضل عندك، زيت شجرة الشاى مثالى لعلاج البشرة المصابة بحبوب الشباب ، اما زيت الروزمارى مفيد جدا فى محاربة علامات تقدم سن البشرة.
مش هتحتاجى تحتفظى بالوصفة دى فى التلاجة، الزيوت هتمتزج ببعضها وتتقل مع مرور الوقت فى درجة حرارة الغرفة العادية، بعد كده بللى قطنة بالمزيج ده و استخدميها فى ازالة المكياج بالطريقة العادية.
اعرفى معانا كمان 11 غلطة بنعملها فى ازالة المكياج