طريقة ازالة الشعر من تحت الابطين بالشمع بطريقة سهلة وبشكل صحيح

منطقة تحت الابطين تعتبر من الاماكن المتعبة جدا في ازالة الشعر منها, ده غير ان الشعر بيطلع في المنطقة دي بسرعة, عشان كده النهاردة من خلال موضوعنا هنقولك طريقة ازالة الشعر من تحت الابطين بطريقة سهلة وبشكل صح من غير ما تسبب لك اي مشاكل في الجلد.

طريقة ازالة الشعر من تحت الابطين:

– التحضير قبل ازالة الشعر:

1- اول حاجة طول الشعر لازم يكون مناسب للازالة, لان الشعر لو طويل اوي هيسبب لك الم, ولو صغير اوي مش هيطلع معاكي بالشمع ومش هتقدري تنضفي المنطقة بشكل كامل من الشعر, وبالتالي لو الشعر طويل اوي قصيه شوية بحيث يكون طوله مناسب ولكن مش قصير اوي زي ما قولنا.

2- اعملي سكراب قبل ازالة الشعر بيوم عشان تزيلي الجلد الميت واي اوساخ قبل الازالة, ده هيسهل عليكي عملية الازالة وهيخلي الالم اقل.

3- الافضل تغسلي المنطقة بالمية الدافية قبل الازالة عشان هتلين الشعر وهيبقى اسهل وانتي بتشديه, بعدها جففي الجلد كويس جدا لان مينفعش تستخدمي الشمع على جلد رطب, لانه مش هيلزق كويس على الجلد, وممكن ترشي بيبي بودر عشان تساعد على تجفيف المنطقة من اي رطوبة.

4- لو بتعاني من الم من ازالة الشعر, ممكن تستخدمي كريم مخدر من الصيدلية قبل الازالة عشان يخفف الالم, او استخدمي وصفات طبيعية لتخفيف الالم قبل ازالة الشعر.

– نصايح لازالة الشعر بطريقة صح:

1- اول حاجة شدي الجلد كويس بايدك اثناء الازالة عشان تضمني ان الشمع يشيل الشعر كله وان مافيش شعر ما بين تنيات الجلد.

2- ايا كان الشمع اللي بتستخدميه سواء العادي اللي عملاه في البيت او شرايط الشمع الجاهزة, افرديه على البشرة في اتجاه نمو الشعر.

3- اسحبي الشمع عكس اتجاه الشعر في حركة واحدة, هيطلع معاكي الشعر بسهولة, واعملي جزء جزء صغير عشان تتحكمي اكتر فيه وتشيلي الشعر كويس.

4- بعد ازالة الشعر الافضل تلبسي ملابس واسعة عشان ميحصلش اي تهيج في الجلد بسبب الاحتكاك في الملابس الضيقة.

5- عشان تخففي الالم وتمنعي اي التهاب او احمرار او حكه في الجلد, بعد ازالة الشعر على طول افركي مكعب تلج على المنطقة.

6- جل الالوفيرا من الحاجات المرطبة جدا للجلد, ممكن تدهني المنطقة بعد الازالة بجل صبار الالوفيرا.

7- ممكن تعملي سكراب للمنطقة بعد ازالة الشعر بيوم, عشان تنضفي الجلد من اي شعر تحت الجلد.

8- بعد ازالة الشعر متستخدميش اي عطور او مزيلات عرق او اي منتجات من النوعية دي على المنطقة الا بعد مرور كام يوم عشان متسببش اي تهيج للجلد.

9- في اكتر من طريقة لازالة الشعر من تحت الابطين اما بكريم الازالة, او الحلاقة بالمكنة, او بالشمع, وكتير من البنات بيفضلوا الحلاقة والكريم عن الشمع لان الم اقل, لكن الشمع افضل حاجة للازالة لانه بيشيل الجلد كله من الجذور من غير مشاكل في الجلد تقريبا, لكن الكريم او الحلاقة ممكن يسبب غمقان وتشققات وتجاعيد للجلد لكن المشاكل دي مش هيعملها الشمع, كمان الشعر بياخد وقت اطول بكتير في النمو مرة تانية مع الشمع اكتر من الوسائل التانية, مع الشمع هياخد وقت من 4 – 6 اسابيع على ما يطلع تاني لكن مع الحلاقة هتلاقي بعد كام يوم بدأ يظهر تاني.

10- متعرضيش المنطقة  للشمس او الحرارة بعد الازالة, متعرضيش البشرة لحمام بخار مثلا لان ليها تأثير جانبي على الجلد وممكن يسبب التهاب, الافضل انك تعمليه بالليل عشان تضمني انك مش هتعرضي المنطقة للشمس.

11- عشان تزيلي الشمع مع على الجلد بعد الازالة افركيه باي نوع زيت ممكن زيت بيبي جونسون او زيت زيتون, وبعدها مية باردة.

– طريقة عمل الشمع لازالة الشعر من تحت الابطين:

المكونات:

2 كوب سكر.

¼ كوباية مية.

¼ كوباية عسل ابيض او اسود حسب اختيارك.

¼ كوباية عصير ليمون.

الطريقة:

– اخلطي كل المكونات مع بعض, حطيهم في حله او طاسة على النار, ولما يغلوا قللي النار لاقل حاجة وسيبيهم مع بعض على نار هادية لحد ما يتحول الخليط للون البني الغامق, بعدها ارفعيه من على النار وسيبيه يبرد لحد ما يبقى نفس درجة حرارة الغرفة, ويبقى سمكه معاكي اتقل شوية من العسل.

– كده يبقى الشمع جاهز عندك للاستخدام ممكن تستخدمي ايدك, او معلقة عشان تفردي بيها الشمع, والطريقة دي تنفع للاستخدام لاي منطقة في الجسم.

– كمية الشمع اللي هتفضل بعد ما تخلصي ممكن تخزنيها في برطمان محكم الغلق في مكان جاف وبارد عشان تستخدميها تاني بعد كده, ممكن يقعد معاكي كذا اسبوع من غير ما يبوظ.

لو عايزة تعملي شمع سميك اللي هو شبه السويت بنعمله بايدينا يبقى هتضيفي 2 كوباية سكر زي ما احنا كاتبين في المكونات, لو عايزة شمع ناعم او سايل اللي بنستخدم فيه شرايح للازالة يبقى ضيفي كوباية واحدة بس سكر, ولو معندكيش شرايح ازالة جاهزة هاتي اي تيشيرت قطن قديم عندك قطعيه لشرايح واستخدميه.

ممكن تشوفوا الطريقتين بالفيديو:

اعملي بنفسك لوشن بعد ازالة الشعر الزائد لبشرة ناعمة جدا