أسوأ 10 حاجات بتعمليهم لشعرك بيتسببوا في ضرره وتلفه..وازاي تتجنبيهم

بقلمريهام محمود فيشعر visibility1047

اكيد عشان نحصل على شعر صحي وناعم اولا التغذية السلمية والاهتمام والعناية بيه سواء بمنتجات الشعر المختلفة او بالماسكات عشان نحافظ عليه رطب وصحي, لكن برغم اننا ممكن نكون بنهتم بالنواحي دي لكن من ناحية تانية بنتعامل مع شعرنا بطريقة غلط ممكن تكون بطريقة غير مقصودة لكن في النهاية بتضر شعرنا, عشان كده النهاردة من خلال موضوعنا هنقول لكل بنات أسوأ حاجات بتعمليها بتضر شعرك وممكن تتسبب في تلفه وتقصفه وجفافه عشان تتجنبيها وتحافظي على شعرك صحي.

أسوأ حاجات بتعمليها بتضر شعرك:

1- بتستني فترة طويلة على ما تقصيه او تساوي الاطراف:

لو بتعاني من انقسام اطراف الشعر, وشعرك مجعد ومش متساوي, ودايما بيتشابك في بعضه, ده معناه انك اتاخرتي عليه جدا في انك تقصيه او تساوي اطرافك خصوصا لو انتي بتحبي الشعر الطويل فاكيد هتحاولي تبعدي عن القص باي طريقة, لكن لو قصيتي الاطراف بشكل منتظم هتحافظي عليه من الانقسام والتكسر وهينمو بشكل اقوى وصحي اكتر.

أسوأ حاجات بتعمليها بتضر شعرك
أسوأ حاجات بتعمليها بتضر شعرك

2- بتصبغي شعرك بنفسك:

في بنات كتير بيصبغوا شعرهم بنفسهم في البيت, انتي ممكن تعملي ده لو انتي محترفة في الموضوع وعارفة انتي بتعملي ايه بالظبط وعارفة كل الخطوات صح, لكن غير كده الافضل انك تروحي لصالون التجميل تصبغيه, لانه لو باظ منك هتضطري بردو في النهاية تروحي لصالون التجميل ولكن اصلاحه هيبقى اصعب.

الحل: انك تصبغيه عند المتخصصين من البداية.

أسوأ حاجات بتعمليها بتضر شعرك
أسوأ حاجات بتعمليها بتضر شعرك

3- بتسرحي شعرك وهو مبلول:

الشعر وهو رطب او مبلول بيكون حساس وضعيف جدا ومعرض اكتر للتكسر, ممكن تعملي تجربة صغيرة كده عشان تشوفي بنفسك, بعد ما تغسليه امسكي كام شعراية كده في ايدك وحاولي تكسريهم هتلاقيهم بيتكسروا معاكي بسهولة مقارنة بالشعر وهو ناشف, استخدام الفرشة على الشعر بيعمل نفس الشيء بيكسر الشعر لكن بقى مش شعراية ولا اتنين لكن مئات الشعرات.

استخدام الحرارة على الشعر سواء المكوى او السيشوار, بيخلي المية تتبخر بشكل كبير وبتأدي في النهاية لتكسر الشعر, وبتتسبب في جفافه وبتضره بشكل عام.

الحل: اننا بعد ما نغسل الشعر نسيبه ينشف قبل ما نستخدم الفرشة او المشط, وقبل السيشوار او المكوى استخدمي حامي من الحرارة.

أسوأ حاجات بتعمليها بتضر شعرك
أسوأ حاجات بتعمليها بتضر شعرك

4- استخدام فرشة مش نضيفة:

الجلد الميت اللي موجود في فروة الراس بيتراكم مع الوقت على الفرشة حتى لو انتي مش شايفة الجلد الميت على الفرشة بالعين المجردة, لكن هو موجود ويعتبر بيئة خصبة جدا لنمو البكتيريا بجميع انواعها, والبكتيريا دي بتتنقل لفروة الراس لو مغسلتيش الفرشة بانتظام.

الحل: انك تغسلي الفرشة بانتظام, او تحطي عليها منديل قبل ما تيجي تسرحي شعرك دخليه في سنان الفرشة وبعدين تسرحي بيها, وبعد ما تسرحيه اتخلصي من المنديل.

أسوأ حاجات بتعمليها بتضر شعرك
أسوأ حاجات بتعمليها بتضر شعرك

5- غسل الشعر عدد مرات كتير وبمية سخنة اوي:

الغدد اللي موجودة في فروة الراس بتنتج زيوت طبيعية ضرورية جدا بتغذية وصحة الشعر, واستخدام المية السخنة اوي على الشعر هتزيل الزيوت دي وتخلي الشعر جاف وهش, كمان غسل الشعر عدد مرات كتير هيسبب لك نفس المشكلة, ومصففين الشعر بينصحوا بغسل الشعر مرتين في الاسبوع, او تلات مرات في حالة لو شعرك دهني اوي.

الحل: متغسليش شعرك كل يوم, واستخدمي لغسله مية دافية بس.

أسوأ حاجات بتعمليها بتضر شعرك
أسوأ حاجات بتعمليها بتضر شعرك

6- مش بتستخدمي بلسم او بتستخدميه بدل الشامبو:

الشامبو والبلسم هي منتجات ليها فوايد مختلفة للشعر, يعني مينفعش يبقى واحد منهم بديل للتاني, لان الشامبو للتنضيف, والبلسم للترطيب.

الحل: استخدام الشامبو الاول لتنضيف الشعر, وبعدها نستخدم البلسم للترطيب.

أسوأ حاجات بتعمليها بتضر شعرك
أسوأ حاجات بتعمليها بتضر شعرك

7- مش بتغيري منتجات الشعر لما شعرك يتغير:

دلوقتي بقى في كتير من منتجات الشعر اللي موجودة في السوق منها للشعر التالف, والمصبوغ, والرقيق, والخشن, وانواع تانية كتير جدا كل واحد فيهم فيه مكونات مختلفة بتعتمد على المشكلة اللي بيعاني منها الشعر, واحيانا الشعر بيتغير مع الوقت فلو شعرك طبيعته اتغيرت يبقى ضروري تغيري المنتج اللي بتستخدميه لمنتج تاني مناسب ليه اكتر, لو شعرك دهني استخدمي الشامبو الخاص بالشعر الدهني ولو جاف يبقى شامبو للشعر الجاف وهكذا.

الحل: متستخدميش نوع شامبو لنوع شعر تاني غير شعرك لانك مش هتستفادي منه.

أسوأ حاجات بتعمليها بتضر شعرك
أسوأ حاجات بتعمليها بتضر شعرك

8- بتسرحي شعرك كتير ومن الجذور:

لو بدأتي تسرحي شعرك من الجذور هتلاقي في النهاية اتجمعت عقدة كبيرة في اطراف الشعر, وسحب الشعر او انك تحاوليه تسلكيه بالعافية ده بيضعف الجذور, ولما تسرحيه عدد مرات كتير كمان هيسبب نفس المشكلة ويضعف جذور الشعر, يعني متسرحيهوش لو مش محتاج يتسرح.

الحل: ابدأي سرحي الشعر من الاطراف واطلعي بالتدريج على الجذور, الطريقة دي هتسلك الشعر من غير ما تضعفه او تكسره.

أسوأ حاجات بتعمليها بتضر شعرك
أسوأ حاجات بتعمليها بتضر شعرك

9- بتلمي شعرك كتير:

لو بتلمي الشعر اوي باستمرار زي تسريحة ديل الحصان ده هيأدي في النهاية لتلفه, لانك حرفيا انتي بتسحبي الشعر من جذوره, وكمان اتجنبي استخدام ربطات الشعر اللي فيها معدن.

الحل: اربطي الشعر او لميه بس مش كل يوم.

أسوأ حاجات بتعمليها بتضر شعرك
أسوأ حاجات بتعمليها بتضر شعرك

10- التعرض للشمس كتير:

لو شعرك بيتعرض للشمس كتير دي من الحاجات اللي بتضره جدا, لان مش بس البشرة اللي محتاجة حماية من الشمس كمان الشعر لانه لما بيتعرض للاشعة فوق البنفسجية بتتسبب في جفافه, وبتأدي لانقسام اطراف الشعر.

الحل: هو انك تلبسي قبعة او سكارف.

أسوأ حاجات بتعمليها بتضر شعرك
أسوأ حاجات بتعمليها بتضر شعرك

ضيفي ال 3 مكونات دول للشامبو واتخلصي من تساقط الشعر نهائيا

طريقة طبيعية لعلاج تساقط الشعر
طريقة طبيعية لعلاج تساقط الشعر