7 حاجات على السوشيال ميديا ممكن تأثر على حبك وتقديرك لنفسك

بقلمريهام محمود فيعلاقات visibility835

وسائل التواصل الاجتماعي بقت حاجة اساسية في حياتنا كلنا ومبقناش نقدر نستغنى عنها بشكل يومي وبنشارك عليها تقريبا كل لحظات حياتنا, واكيد السوشيال ميديا زي ما ليها مميزات كتير كمان ليها عيوب كتير ممكن تأثر علينا بشكل سلبي, وده اللي هنعرفه النهاردة من خلال موضوعنا هنتعرف على التأثير السلبي للسوشيال ميديا على شخصيتنا من خلال 7 حاجات ممكن تأثر على حبك وتقديرك لنفسك وتخليكي تحسي بعدم ثقة في النفس.

التأثير السلبي للسوشيال ميديا على شخصيتنا:

1- الاعلانات:

الاعلانات ليها تأثير كبير جدا على حياتنا, ممكن يكون في كتير مننا بيحاول يتجنب الاعلانات سواء في التليفزيون او في المجلات لكن على السوشيال ميديا هتقابلك الاعلانات في كل مكان قدامك, والاعلان بيكون متصمم عشان يخليكي تفكري بطريقة معينة او يوجهك, يعني مثلا تشوفي اعلان براند معين وفي نفس الوقت انتي مش هتقدري تشتريه وبالتالي ده بيسبب لك احباط, وطبعا مع كتر الاعلانات قدامك الاحساس ده بيبدأ يزيد معاكي.

التأثير السلبي للسوشيال ميديا على شخصيتنا
التأثير السلبي للسوشيال ميديا على شخصيتنا

2- الحياة المثالية:

في دراسة عملها باحثين فرنسيين لقوا فيها ان كل ما تقضي وقت اكبر على الفيس بوك ومقارنة نفسك بالاخرين ده بيزود الاكتئاب, سواء من اعلانات العلامات التجارية المختلفة او حياة المشاهير وبننسى دايما ان الحاجات دي بتكون متنظمة بعناية جدا عشان تطلع بالشكل المثالي ده ومش بتكون دي الحقيقة, حتى حياة الاصدقاء او العيلة اللي بتظهر قدامك مثالية جدا دي بتبقى القشرة الخارجية بس لان كل واحد اكيد هينشر على الفيس بوك او سائل التواصل بشكل عام احسن ما عنده وهيداري السلبيات, يعني ممكن يكون حد ناشر بوست فرحان جدا او بيحتفل بحاجة واحنا بناخد بالمظهر بس وبنشوف ان حياته مثالية جدا وبننسى ان ممكن يكون بيواجه مشاكل تانية في حياته مخبيها, عشان كده دايما مناخدش بس بالشكل الخارجي لانه بيكون مداري وراه حاجات كتير.

التأثير السلبي للسوشيال ميديا على شخصيتنا
التأثير السلبي للسوشيال ميديا على شخصيتنا

3- عرض كل حاجة خاصة بينا:

البروفايل او صفحاتنا على وسائل التواصل الاجتماعي تعتبر انعكاس لهويتنا او شخصيتنا, من خلال الوظيفة, الصور اللي بنشيرها والبوستات, والانشطة الخاصة بينا اللي بنشاركها, وده بيخلينا هدف للمسوقين على الانترنت انهم يستغلوا نقظة ضعف كل واحد ويسوق له الحاجة اللي عارف انه ممكن يشتريها, وده بيظهر في الاعلانات اللي بتيجي قدامنا هنلاقي ان نوعية الاعلانات اللي بتظهر لكل واحد على حسب هو دايما بيدور على ايه او بيدخل على ايه بيبدأ الموقع يحلل كل ده ويظهرلك المنتجات اللي تناسبك, وده هيخلينا دايما في مكان اننا نساوي قيمة واحترام الذات مع الاشياء والحاجات المادية اللي ممكن ميكونش ليها قيمة, وانك عايزة بس الحاجة دي تكون عندك وتنزلي صورتها وتعرفي كل اصحابك وعيلتك انها عندك مش اكتر من كده.

التأثير السلبي للسوشيال ميديا على شخصيتنا
التأثير السلبي للسوشيال ميديا على شخصيتنا

4- اللايكات:

جزء من هدف استخدامنا لوسائل التواصل الاجتماعي هو لفت الانتباه وانك تاخدي اهتمام من اللي عندك على الصفحة, فأكيد لما تنزلي حاجة على الفيس بوك ومتلاقيش الاهتمام ده من تفاعل او لايكات على البوست بتاعك ده هيخليكي تضايقي وتحسي باحباط, لانك بتساوي الاهتمام ده بحبك وتقديرك لنفسك, وهتبدأي تسألي نفسك ايه الغلط ليه محدش اتفاعل ليه مجاش لايكات كتير, بس لازم نعرف ان في بوستات كتير بتكون فيها نسبة لايكات وتفاعل مزورة من المعلنين والمسوقين على الانترنت عشان كده لازم منقارنش نفسنا بالنوعية دي من البوستات ونحس باي احباط.

التأثير السلبي للسوشيال ميديا على شخصيتنا
التأثير السلبي للسوشيال ميديا على شخصيتنا

5- علاقات مزيفة:

وسائل التواصل الاجتماعي ممكن تدينا احساس زائف بالانتماء والترابط في علاقات غير واقعية, وده مع الوقت هيخليكي تفقدي التواصل المباشر والصداقات الحقيقية وتبقي معتمدة بس على تواصل الانترنت, واكيد ده مش معناه ان مافيش علاقات او صداقات حقيقية على الانترنت, لكن معناه ان الانترنت مفتوح اكتر او فيه مجال اكبر للعلاقات المزيفة او الكدابة.

التأثير السلبي للسوشيال ميديا على شخصيتنا
التأثير السلبي للسوشيال ميديا على شخصيتنا

6- البرامج التعليمية:

من اكتر الحاجات المنتشرة على السوشيال ميديا هي الفيديوهات التعليمية سواء من العلامات التجارية المختلفة, او من اشخاص بينزلوا فيديوهات بيعلموكي دروس في حاجات مختلفة سواء في الطبخ او الميك اب او غيرها, ومشكلة الفيديوهات دي انها بتبين لك كل حاجة سهلة وممكن تعمليها ببساطة جدا ولما انتي تيجي تنفذيها في الواقع مش بتطلع زي الفيديو لان ببساطة هما بيكونوا محترفين فبتطلع معاهم مثالية جدا ومظبوطة لكن بتفشل معاكي لان انتي مبتدئة ومش خبيرة فيها.

التأثير السلبي للسوشيال ميديا على شخصيتنا
التأثير السلبي للسوشيال ميديا على شخصيتنا

7- الانقطاع عن الحياة العاطفية:

القعدة مع الاصحاب او الاهل والدردشة واننا نقضي وقت حلو, نمارس هواية, نخرج نستمتع بالطبيعة, نتعلم حاجة جديدة, كل ده تقريبا مبقاش موجود لان بقت حياتنا كلها تقريبا على السوشيال ميديا, حتى لما بنشارك في الحياة الواقعية او بنعمل اي نشاط بقينا بنعمله بس عشان ننزله على السوشيال ميديا ونلفت الانتباه وناخد الاهتمام ولايكات وكومنتات مش اكتر من كده, والحياة بالاسلوب ده ليها عواقب ونتايج سلبية زي اضطرابات  الاكل, والاكتئاب, وعدم النوم كويس.

التأثير السلبي للسوشيال ميديا على شخصيتنا
التأثير السلبي للسوشيال ميديا على شخصيتنا

في النهاية نصيحتنا ليكي انك تحاولي تبعدي عن الانترنت شوية وتخصصي وقت ترجعي فيه للحياة الطبيعية الواقعية والتواصل المباشر مع اصحابك واهلك.

التأثير السلبي للسوشيال ميديا على شخصيتنا
التأثير السلبي للسوشيال ميديا على شخصيتنا

4 حاجات متعمليهاش على السوشيال ميديا لو عايزة تحافظي على علاقاتك

حاجات متعمليهاش على السوشيال ميديا
حاجات متعمليهاش على السوشيال ميديا