10 حاجات لازم تعمليهم كل يوم قبل الساعة 10 الصبح عشان تحسني يومك

معظم الناس بيقوموا الصبح من النوم يلبسوا وينزلوا للشغل او للدراسة او لاي مشوار من غير ما يبدأو اليوم بشكل صح وده بيكون ليه تأثير على باقي اليوم, عشان كده النهاردة هنقولك عادات صباحية المفروض تعمليها كل يوم قبل الساعة 10 الصبح هتفرق جدا معاكي باقي اليوم وهتحسن يومك وتخليكي منتجة اكتر وحاسه بشعور افضل طول اليوم.

عادات صباحية لتحسين اليوم:

1- التأمل:

التأمل او حتى التنفس اللي البسيط ممكن يساعد كتير من الناس على انهم يبدأو يومهم بهدوء اكتر وبشكل افضل, يعني بدل ما تفتحي موبايلك او ايميلك او تدخلي على مواقع التواصل الاجتماعي اول ما تصحي من النوم, خدي كام دقيقة الصبح للتأمل في هدوء, اليوم بيكون مليان بكتير من النشاطات والحاجات اللي المفروض نعملها والتأمل هيخليكي تبدأي وانتي هادية اكتر, وهتساعدك على زيادة انتاجك وتركيزك, وهتزود طاقتك وهتخليكي حاسه بتفاؤل طول اليوم.

2- الامتنان والشكر على اللي عندك:

لازم تبدأي يومك بطريقة ايجابية وتحسي بالامتنان والشكر على كل اللي عندك, لان ده هيخليكي مرنة اكتر مع الضغوط والحاجات اللي ممكن تقابليها في يومك, وهتساعدك انك تحطي كل مشكلة تقابلك في حجمها الطبيعي من غير ما تكبريها او تحسي بالاحباط بسرعة.

3- حددي اولوياتك:

اكيد كلنا بنبقى عايزين نعمل حاجات كتير خلال اليوم وييمكن اليوم يخلص من غير ما نلحق نخلص كل اللي ورانا, عشان كده وانتي بتحطي خطة يومك اختاري اهم 3 حاجات عايزة تخلصيهم ودول يبقى ليهم الاولوية عندك, لانك لما هتلاقي نفسك على اخر اليوم خلصتي الحاجات المهمة هتحسي انك انجزتي وعملتي حاجة.

4- حطي جدول زمني:

حطي جدول زمني او وقت معين لكل حاجة عايزة تعمليها عشان متاخديش الوقت كله في حاجة واحدة بس وتلاقي الوقت اتسرق منك من غير ما تخلصي كل اللي وراكي, ده هيساعدك انك تحققي اهدافك وكمان ممكن تلاقي وقت فراغ خلال اليوم.

5- رطبي جسمك:

جسمك لما بتصحي من النوم بيكون في حالة جفاف ومحتاج ترطيب, عشان كده شرب المية اول حاجة لما تصحي من النوم من الحاجات المهمة جدا, والمفروض انك على نص النهار تكوني شربتي نص كمية المية اللي جسمك محتاجها, ده هيساعد على تنضيف الجسم من السموم, وهيخليكي تحسي بالجوع بشكل اقل, وهتقلل الصداع خلال اليوم.

6- تمارين التمدد:

خلي تمارين التمدد من روتينك الصباحي كل يوم, لان الدراسات اظهرت ان تمارين التمدد بتساعد على زيادة مرونة الجسم, وتحسين الدورة الدموية, والتقليل من التوتر طول اليوم, وتحسين حالة الجسم بشكل عام.

7- اسمعي موسيقى:

بدء اليوم بموسيقى حلوة وممتعة مش بس هيساعدك انك تبقي نشيطة ويصحصحك لكن كمان هيخليكي تحسي بشعور ايجابي جدا طول اليوم, واثبتت الدراسات ان الموسيقى بتساعدك تحسي بشعور جيد وبتساعد على تنظيم المزاج والوعي الذاتي, ومش بس هتساعد على تحسين حالتك المزاجية لكن ممكن تزود انتاجيتك وادائك خلال اليوم, وكمان هتساعدك تنامي بشكل افضل.

8- ابتسمي:

ابدأي يومك بابتسامة, اول ما تقومي الصبح بصي لنفسك في المرايا وابتسمي, هيكون ليها تأثير ايجابي جدا على يومك كله, هتخليكي طول اليوم حاسه بشعور حلو وهتزود ثقتك في نفسك.

9- نضفي بعدك اول بأول:

ممكن يكون معظمنا بيبقى مستعجل الصبح ومش بنضف او بنرتب ورانا, يعني ممكن ترمي الهدوم في اي حته وتسيبي الاطباق وراكي ومترتبيش السرير, لكن ده كله ممكن يأثر على تحقيق او انجاز الحاجات الاكبر خلال اليوم لانك ما بدأتيش يومك انك تنجزي الحاجات البسيطة او الصغيرة, كمان بعد ما ترجعي البيت هتبقي تعبانة وهتكسلي انك تعملي الحاجات دي وبالتالي الحاجات هتتراكم عليكي وهيبقى صعب عليكي تعمليها بعد كده, عشان كده الافضل انك تنضفي وراكي اول بأول.

10- اعملي المهام الصعبة الاول:

ممكن يكون معظمنا بيفكر انه يعمل المهام السهلة الاول ونقول عشان نخلص منها بسرعة, لكن بالعكس المفروض انك تقومي بالمهام الصعبة الاول عشان تبقي لسه في كل نشاطك وطاقتك ده هيخليكي اكتر انتاجية وتحسي بسعادة اكبر انك خلصتي الحاجات الصعبة وقدرتي تنجزيها خلال اليوم وده هيخلي يومك افضل واسهل مع مرور الوقت, وكمان ده هيساعدك انك توقفي عادة التسويف او انك تأجلي انجاز او عمل اللي وراكي.

11 عادة بسيطة هتغير حياتك للافضل