حيل جمالية للبشرة والشعر والمكياج لتحسين مظهرك بأسهل واسرع الطرق

ريهام محمود

في

2697

دايما كلنا في حالة بحث عن افضل النصايح والحيل الجمالية اللي ممكن نعملها عشان تسهل علينا روتين العناية اليومية بجمالنا, عشان كده النهاردة من خلال موضوعنا جمعنا لبنات حوا مجموعة حيل جمالية للبشرة والشعر والمكياج تقدري تحسني بيهم مظهرك بسرعة وسهولة.

حيل جمالية:

1- معجون الاسنان وصودا الخبز للرؤوس السودا:

لو بتعاني من الرؤوس السودا اخلطي كمية من معجون الاسنان مع صودا الخبز “الكربوناتو” وبفرشة اسنان جديدة ونضيفة خدي من الخليط وافركي بالفرشة المناطق اللي فيها رؤوس سودا خصوصا منطقة الانف والدقن والجبين لمدة دقايق, وبعدين اغسلي البشرة بمية دافية, الطريقة دي هتخلصك من الرؤوس السودا ومن الزيوت الزيادة في البشرة.

بس خلي بالك لو معجون الاسنان يكون مش مناسب للبشرة الحساسة, جربي الاول على جزء صغير من بشرتك عشان تتأكدي ان بشرتك مش حساسه منه.

2- رفع الرموش Eyelash lift:

لو بتحسي ان استخدام الماسكارا كل يوم مرهق لرموشك او عيونك حساسة من الماسكارا ممكن تستبدليها بتقنية رفع الرموش, ودلوقتي في كتير من مراكز التجميل بيعملوها, او ممكن تشتري مجموعة رفع الرموش اون لاين.

3- لتكبير ونفخ الشفايف:

في طريقة بسيطة جدا ممكن تنفخي بيها شفايفك وتخلي شكلها ممتليء, هاتي شوكة من العادية اللي بناكل بيها وابدأي وغز الشفايف بيها بالراحة, الحركة دي بتزود الدورة الدموية وبيخلي الشفايف شكلها حلو وممتليء, وبعدها تقدري تحطي الروج او ملمع الشفايف.

4- قصي القوصة بنفسك:

لو معندكيش وقت تروحي للكوافير وتقصي القوصة ممكن تقصيها بنفسك في البيت بطريقة سهلة, امسكي الجزء بتاع القوصة, ابرميه وقصيه بالمقص عند الطول اللي انتي عايزاه.

A post shared by @soslaying

5- الشريط اللاصق لعمل الشعر كيرلي:

استخدمي الشريط اللاصق السميك او الشكرتون لعمل الشعر كيرلي, قطعيه قطع واتنيه نصين يعني خلي الجزء اللي بيلزق لجوه, وبعدها استخدميه لفي عليه الشعر وثبتيه بالبنس, ونامي بيه وفكيه الصبح هتلاقي شعرك كيرلي.

6- مطابقة لون الروج مع المانيكير:

لما بتوفقي بين لون الروج والمانيكير وبتعمليهم نفس اللون اللوك بيطلع احلى كتير اكيد, لكن لو مش متوفر عندك لون مانيكير نفس لون الروج هتعملي ايه؟ ممكن تعملي حيلة بسيطة اوي, حطي على الضوافر الملمع او الروج اللي انتي مستخدماه وحطي فوقيه طبقتين Top coat, وبكده تبقي عملتي لون مانيكير نفس لون الروج بطريقة سهلة.

7- استخدمي الماسكارا كبديل لللآيلاينر:

لو اللآيلاينر بتاعك خلص وعايزة ترسمي عينك ومعندكيش وقت تجيبي ايلاينر, ممكن تستخدمي الماسكارا كبديل للايلاينر خدي من الماسكارا بفرشة الايلاينر وارسمي بيه العين زي ما هو باين قدامنا في الصورة كده.

8- تبييض تحت الابطين:

المفاجأة هنا ان منتجات ازالة الشعر للرجال ممكن البنات يستفادوا بيها جماليا, ممكن تستخدمي كريم نيفيا لازالة البقع الداكنة بعد الحلاقة للرجال لتفتيح منطقة تحت الابطين بسهولة.

9- حيلة للعيون المرهقة:

لو عينيكي مرهقة بسبب قلة النوم ولقتيها الصبح شكلها دبلان, ممكن تداري الارهاق بحيلة بسيطة جدا كل اللي هتعمليه ارسمي خط على طول الرموش اللي تحت من جوه بالكحل الابيض او البيج, هتديكي لوك فريش وهتداري الارهاق بشكل فوري.

10- ديل حصان مرفوع:

لو عايزة تعملي ديل حصان مرفوع وشكله حلو, ممكن تنفذي ده بطريقة سهلة جدا, استخدمي بنستين شعر حطيهم تحت ديل الحصان بشكل رأسي زي ما هو باين في الصورة قدامنا.

11- تخفيف احمرار وتورم البثور:

لو بتعاني من بثور منتفخة وحمرا, ممكن تجيبي قطعة قطن وتحطي عليها نقطتين من قطرة العين واضغطي بيها على البثور لمدة ثواني, هتلاقي الاحمرار والتورم خف.

12- التخلص من البيبي هير:

لو عاملة تسريحة شعر وفي بيبي هير طاير منها, ممكن تتخلصي منه بطريقة سهلة, استخدمي فرشة اسنان سرحي بيه الشعر وبعدها رشي على الشعر مثبت, او ممكن ترشي المثبت على فرشة الاسنان نفسها وتسرحي بيها الشعر.

13- اعملي رسمة كات ايز مثالية بالبنسة:

لو مش بتعرفي تظبطي رسمة الكات ايز بالحيلة دي هتقدري تظبطيها بسهولة جدا, هاتي بنسة شعر وحطي عليها ايلاينر سائل, وبعدين حطيها على زاوية العين واضغطي هتلاقي الرسمة اتطبعت, بعد كده كملي باقي الخط عادي.

14- استخدمي السيشوار مع اداة تني الرموش:

عشان خلي رموشك طويلة ومتنية لفترة اطول, استخدمي السيشوار على اداة تني الرموش, وسيبيها تبرد شوية وبعدين استخدميها على رموشك.

15- اعملي روج بألوان الشمع:

الوان الشمع بتاعة الاطفال اللي بيستخدموها في التلوين ممكن تستخدميها كروج, اختاري اي لون انتي عايزاه سيحيه على حمام مية مع زيت جوز الهند او اي زيت طبيعي تاني انتي تختاريه, وحطيه في علبة وكده يبقى جاهز عندك الروج تحطي منه بالفرشة, وممكن كمان بقى تلعبي بالالوان وتخلطي اكتر من لون مع بعض وتبتكري لون جديد.

16- مناديل التواليت لدهون البشرة:

لو بشرتك دهنية ممكن تستخدمي ورق تغطية التواليت لامتصاص الدهون الزيادة من البشرة, والورق ده هنلاقيه موجود في الهايبر ماركت.

17- حطي الماسكارا باستخدام معلقة بلاستيك:

في اغلب الاوقات لما بنيجي نحط الماسكارا بتلطخ الجفون حوالين الرموش, وعشان نتفادى ده ممكن نستخدم حيلة المعلقة, حطي المعلقة تحت الرموش وابدأي طبقي الماسكارا, مش هتلطخ حوالين العين وكمان هتخلي الرموش يطلع شكلها احلى وتبرزها اكتر.