طريقة سهلة لعمل السينابون رولز في البيت
كتير مننا عشاق للسينابون بس اكيد بنستصعب اننا نعمله في البيت او جربنا قبل كده نعمله بس معرفناش نظبطه ومطلعش زي اللي بنشتريه من بره, عشان كده النهاردة جايبين لكم طريقة عمل السينابون رولز بطريقة سهلة في البيت وهيطلع معاكي زي اللي بتاكليه بره.
– شوية نصايح قبل ما نعرف المكونات والطريقة:
1- ممكن تستخدمي الخميرة العادية او الخميرة الفورية, الفرق بس ان الخميرة الفورية بتتخمر اسرع من الخميرة العادية, يعني تقريبا العجينة مع الخميرة العادية بعد ما نغطيها عشان تتخمر هتحتاج نسيبها 20 دقيقة, ومع الخميرة الفورية هتحتاج 10 دقايق بس.
2- المكونات الجافة بعد ما تضيفيها مع بعض لما تيجي تخلطيهم في العجان متحطيش الكمية كلها مرة واحدة عشان متسببش فوضى حواليكي والدقيق كله يطلع بره حطي الخليط واحدة واحدة وخلي العجان على سرعة منخفضة في البداية وزودي السرعة بالتدريج.
3- لما تيجي تضيفي الدقيق عشان تظبطي العجينة, افتكري دايما ان كمية الدقيق ممكن تتغير حسب الرطوبة بتأثر على العجينة, يعني ضيفي الدقيق لحد ما العجينة تبقى لينة في ايدك.
4- لو العجينة لزجة شوية معاكي او بتلزق حاجة بسيطة متزوديش دقيق تاني واعملي حساب الدقيق اللي هتفرديه على الرخامة عشان تفردي عليه العجينة وابدأي في العجن والعجينة هتمتص الدقيق وهتتظبط معاكي.
5- لما تيجي تفردي العجينة سمك العجينة بتاعتك هي اللي هتحدد هتلفي الرولز كام لفة عشان متبقاش سميكة اوي, والافضل تخلي العجينة رقيقة وتلفيها كذا لفة ضيقة.
6- لما تخلصي مرحلة العجن وتحطي السينابون في الفرن راقبيه وخلي عينك عليه لانه مش بياخد وقت وبياخد لون بني بسرعة, ولو لقيتي الوش بتاعها اخد لون بني بسرعة وهي لسه مكملتش سوى, حطي على وشها ورق فويل عشان تبعديه عن الحرارة المباشرة وتحمي الوش من انه يتحرق.
7- ممكن لو عايزة تجهزي السينابون لتاني يوم اعجنيه وقطعيه ولفيه ورصيه في الصينية وغطيه بورق فويل وحطيه في التلاجة واعمليه تاني يوم, طلعيه من التلاجة وسيبيه بره شوية لحد ما يبقى زي درجة حرارة الغرفة وبعدين دخليه الفرن.
8- لو مش متوفر عندك عجان او ميكسر, ممكن تعجني العجينة بايدك عادي.
– طريقة عمل السينابون رولز:
مقادير العجينة:
– من 4 – 5 كوبايات دقيق.
– كيسين خميرة فورية “من 4 – 5 معالق صغيرة.
– 1 معلقة صغيرة ملح.
– ¾ كوب لبن.
– ½ كوب مية.
– ½ كوب زبدة سايحة.
– ½ كوب سكر.
– 1 بيضة.
مقادير الحشو:
– زبدة سايحة لدهن العجينة.
– ½ كوب سكر بني.
– 2 معلقة صغيرة قرفة.
الصوص icing:
– 1 ½ كوب سكر بودرة.
– 1 معلقة كبيرة زبدة.
– 1/8 معلقة صغيرة فانيليا.
– من 2 – 3 معلقة صغيرة مية سخنة.
الطريقة:
– لعمل العجينة في طبق او بولة كبيرة امزجي 1 ¾ كوباية دقيق مع الخميرة والملح, وخليهم على جنب.
– في حلة صغيرة سخني اللبن مع المية والزبدة والسكر على حرارة متوسطة مع التقليب المستمر لما المكونات كلها تمتزج مع بعض كويس, صبيه على خليط الدقيق وقلبيهم مع بعض لحد ما يبقى الخليط ناعم معاكي.
– ضيفي للخليط البيض و ½ كوباية دقيق وقلبيهم لمدة دقيقتين.
– ضيفي بالتدريج باقي الدقيق لحد ما العجينة تبقى لينة ” ممكن كوباية او اتنين”.
– غطي العجينة وسيبيها ترتاح لمدة 20 دقيقة.
– اول ما العجينة تخمر وتلاقيها ارتفعت, افرديها على شكل مستطيل بسمك تقريبا ¼ انش, ادهني العجينة بالزبدة, اخلطي الحشو اللي هو السكر البني والقرفة مع بعض ورشيهم على العجينة, وسيبي حوالي ½ انش على طول اطراف العجينة.
– لفي العجينة على شكل رول, وخلي اللفة ضيقة قدر الامكان, وبعدين قطعيها بالسكينة على شكل دواير, والكمية دي ممكن تقطعيها تقريبا ل 12 واحدة, رصيهم على صينية مدهونة زبدة, حطيهم في الفرن على درجة حرارة 375 لمدة من 15 – 20 دقيقة لحد ما لونها يتحول لدهبي.
– اخلطي مكونات الصوص السكر البودرة مع الزبدة والفانيليا والمية السخنة قلبيهم مع بعض لحد ما يبقى عندك خليط ناعم, بعد ما تطلعي السينابون من الفرن سيبيه يبرد شوية وحطي عليه الصوص من فوق, وممكن تضيفي مكسرات حسب الرغبة.
افضل طريقة لعمل البراونيز Fudgy Brownies اللذيذة والسهلة بالخطوات
