4 حاجات متعمليهاش على السوشيال ميديا لو عايزة تحافظي على علاقاتك

ريهام محمود
ريهام محمود
2238

تقريبا في اكتر من 3 مليار شخص بيستخدموا وسائل التواصل الاجتماعي في جميع انحاء العالم, ونتيجة لزيادة استخدام وسائل التواصل بالشكل الكبير ده اتغيرت الطرق اللي بنتواصل بيها مع اصحابنا, وعيلتنا, وزمايلنا في الشغل وحتى مع الناس اللي منعرفهاش قبل كده.

لو خدنا وسيلة تواصل زي الفيس بوك مثلا هنشوف هو قد ايه بقى مسيطر وداخل في حياتنا بشكل كبير ازاي, ونتيجة الاحصاءات ان تقريبا 90% من الاشخاص اللي عمرهم ما بين 18 – 29 سنة عندهم حسابات فيس بوك وده يعتبر رقم غير عادي ونسبة عالية جدا, وطبعا الفئة العمرية دي بيحصل في حياتهم تغيرات كتير زي بداية الكلية, التخرج, الارتباط, بداية حياة عملية جديدة, تغيير الوظيفة, الجواز, وهكذا وكل ده بيشاركوه على الفيس بوك.

فأكيد بعد ده كله مش غريب ان وسائل التواصل الاجتماعي بتأثر تأثير كبير جدا على حياتنا سواء على المستوى الشخصي او المهني, والنهاردة من خلال موضوعنا هنقول 4 حاجات متعمليهاش على السوشيال ميديا لو عايزة تحافظي على علاقاتك.

حاجات متعمليهاش على السوشيال ميديا:

1- متكتبيش بوستات عاطفية اوي:

سؤال سريع كده هل اتفهمتي غلط قبل كده من بوست كتبتيه ؟ اجابة معظمنا هتكون اكيد اه انه حصل ان بوست او اي حاجة كتبتيها اتفهمت بشكل غلط, وده بيحصل لان المعنى من ورا الرسالة المكتوبة مش دايما بيبقى واضح للكل, وكل واحد ممكن يفسرها بطريقة مختلفة على حسب تفكيره, والسوشيال ميديا بتحتاج انك تعبري عن اللي عايزة تقوليه بشكل مختلف عن المحادثة المباشرة اللي ممكن تستخدمي فيها كلمات ونبرة صوت ولغة جسد تفهم اللي قدامك المعنى اللي تقصديه بعكس الرسالة المكتوبة وبالتالي في النهاية ممكن تحصل مشكلة بسبب ان المعنى وصل غلط للطرف التاني.

وبالتالي من الافضل انك متكتبيش بوست وانتي في حالة عاطفية ضعيفة اوي يعني تكوني مريتي مثلا بموقف معين مأثر عليكي تقومي داخلة كاتبة بوست على طول ده مش صح, ومتكتبيش بردو رد او كومنت على بوست عاطفي اوي لشخص تاني ممكن تطلبي منه يوضح كلامه اكتر قبل ما تردي او تنشري اي حاجة.

حاجات متعمليهاش على السوشيال ميديا 1
حاجات متعمليهاش على السوشيال ميديا 1

2- افترضي ان الرسالة ممكن تكون مزعجة:

ساعات ممكن تكتبي مثلا بوستات جريئة او هزار موجهة لناس قريبة منك من الاصدقاء, لكن ممكن يجي عليها لايكات وكومنتات من اشخاص تانيين يضيع لك معنى او محتوى الرسالة ويخرجها بعيد عن الدايرة اللي انتي كنتي قصداها او موجهاها ليها وخصوصا ان وسائل التواصل مع الوقت بتقل فيها الخصوصية جدا, عشان كده الافضل انك تتجنبي الرسايل الموجهة دي اللي ممكن تسبب ازعاج.

حاجات متعمليهاش على السوشيال ميديا 2
حاجات متعمليهاش على السوشيال ميديا 2

3- متكتبيش الحاجات الشخصية:

نسبة كبيرة جدا من مستخدمين الفيس بوك او وسائل التواصل بشكل عام بيكتبوا كل حاجة في حياتهم الشخصية عشان يكسب مثلا تعاطف اللي حواليه او اهتمامهم باي شكل, يعني مثلا لو عندك مشكلة مع صديقة او زميلتك في الشغل او اي شخص تاني تبدأي تدخلي تكتبي اللي حصلك عشان تاخدي مساندة او دعم اللي حواليكي وتعاطفهم, وبغض النظر عن الدافع او هدفك, استخدام وسائل التواصل كمنفذ تطلعي عليه مشاكلك ده تصرف بيدل على عدم نضج شديد منك.

لو عندك مشكلة مع شخص معين افضل حاجة انك تعالجي المشكلة معاه بشكل مباشر, عن طريق مكالمة تليفون او مقابلة, بالطريقة دي مش بس هيبقى عندك فرصة احسن لحل المشكلة لكن كمان هتوقفي نفسك انك تغلطي.

حاجات متعمليهاش على السوشيال ميديا 3
حاجات متعمليهاش على السوشيال ميديا 3

4- مش بتضيفي زمايلك في الشغل:

لو علاقتك كويسة بزميلة في الشغل وصديقة كويسة ليها وفي نفس الوقت بتتعاملي بمسئولية اوي على الفيس بوك يعني مش بتعملي اي حاجة من اللي احنا قولناها فوق, لكن مع ذلك بكل الطرق بتخليها بعيدة انها تبقى صديقة ليكي على الفيس بوك ومش بتضيفيها, متعمليش كده لان ده ممكن يدمر علاقتك الحقيقية بيها.

ولو بصينا كده هنلاقي اننا ساعات كتير بنقبل اضافة ناس منعرفهمش خالص او نعرفهم معرفة سطحية بس, ممكن يكون في منهم كويسين لكن السؤال هنا هيكون هو “ليه” ؟ مش بتضيفي الاشخاص اللي انتي اصلا عرفاهم, واسألي نفسك ليه عملتي كده؟

حاجات متعمليهاش على السوشيال ميديا 4
حاجات متعمليهاش على السوشيال ميديا 4

في النهاية وسائل التواصل الاجتماعي لما نستخدمها بشكل صح وناضج ومسئول هتكون اداة او وسيلة هايلة للتواصل مع العيلة والاصحاب, لكن سوء استخدامها هو اللي ممكن يأدي لنتيجة عكسية ويدمر العلاقات.

– وممكن تاخدي النقط دي في الاعتبار وانتي بتستخدمي وسائل التواصل:

1- حياتك الشخصية خليها بعيد عن السوشيال ميديا.

2- خليكي انتقائية مع طلبات الصداقة متقبليش اي حد.

3- متنشريش اي بوستات لما تكوني في حالة سلبية او حالة نفسية سيئة.

4- افصلي بين حياتك الشخصية والعملية.

5- اكتبي بوستاتك بعناية واختاري كلماتك كويس عشان متتفهمش غلط.

6- والنصيحة الاخيرة هي مقولة مشهورة بتقول ” اذا كنت لا تستطيع ان تقول شيئا لطيفا, لا تقول اي شيء على الاطلاق”, يعني لو مش هتكتبي حاجة كويسة وايجابية ومافيش منها اي ازعاج يبقى الافضل متكتبيش حاجة.

حاجات متعمليهاش على السوشيال ميديا 5
حاجات متعمليهاش على السوشيال ميديا 5

نصايح وقواعد الأتيكيت في عالم الانترنت والسوشيال ميديا..اعرفيهم

نصايح و قواعد الأتيكيت فى عالم الانترنت و السوشال ميديا.. اعرفيهم
نصايح و قواعد الأتيكيت فى عالم الانترنت و السوشال ميديا.. اعرفيهم

مقالات متعلقه

50 سؤال تسألهم لحبيبتك عشان تعرفها بشكل افضل

50 سؤال تسألهم لحبيبتك عشان تعرفها بشكل افضل

تفضلي سينجل افضل من المحاربة في علاقة غلط ، اعرفي السبب

تفضلي سينجل افضل من المحاربة في علاقة غلط ، اعرفي السبب

اهم اسرار الزواج الناجح ، وازاي تظهروا احترامكم لبعض

اهم اسرار الزواج الناجح ، وازاي تظهروا احترامكم لبعض