مفيش بنت من بنات حوا مابيبقاش نفسها تطلع بلوك ممتاز وشيك من غير ولا غلطة فى كل مرة تخرج فيها او يبقى عندها مناسبة، والموضوع ده بيكلف وقت ومجهود وأكيد فلوس كتيرة، لكن للأسف ساعات كتير بتبقى النتيجة مش مرضية وبرده مش حلوة كفاية؟ احنا هنقولك فى المقال ده على أكتر الاخطاء المنتشرة اللى بتبقى سبب فى الموضوع ده، اعرفى معانا بالصور ..أخطاء بنعملها فى الموضة بتخلى اى لوك تعمليه يبان رخيص Common Fashion Mistakes!

بالصور ..أخطاء بنعملها فى الموضة بتخلى اى لوك تعمليه يبان رخيص Common Fashion Mistakes !

1- شنط كبيرة على المناسبة اللى انتى رايحاها : 

الشنط اللى حجمها كبير مفيش شك انها بتكون عملية جدا و بتقدرى تجمعى فيها كل الحاجات اللى بتحتاجيها طول اليوم فى مكان واحد، لكن أحيانا اختيار الشنطة اللى حجمها كبير بيكون اختيار خاطئ لانها مش دايما مناسبة للستايل اللى انتى عاملاه او للمناسبة اللى انتى رايحاها، فلو كنتى رايحة فرح او خارجة مع خطيبك او مثلا فى عزومة عشاء بالليل، خدى معاكى شنطة صغيرة او بورتوفيه على قد محفظتك و المفاتيح و الروج والموبايل مثلا، حاجة صغيرة على قد احتياجاتك الضرورية جدا. 

2- مابتعرفيش تظبطى القطع الفضفاضة : 

كلنا بنحب نلبس تيشيرت واسع و فضفاض و جيبة واسعه مريحة كده فى وسط النهار خصوصا فى الصيف، لكن ضرورى تاخدى بالك لو قررتى تلبسي قطعتين من الستايل الفضفاض مع بعض، علشان اللوك بتاعك مايبانش مبهدل ومش متناسق، الحل هوانك تلبسي قطعة بمقاسها المظبوط مع قطعة تانية فضفاضة علشان تعملى توازن بينهم وتبقى جمعتى بين الشياكة والراحة فى نفس الوقت. 

3- SHIRT مع جينز ؟ 

المشكلة اللى لحد دلوقتى مش عارفين نوصل لحل فيها، يا ترى لما تيجى تلبسي قميص مع جينز تدخلى القميص فى البنطلون ولا تسيبيه بره؟ والحقيقة انه الحل بسيط.. لو القميص طويل زيادة وشكله مش هيبقى حلو على البنطلون جربى تدخليه فى الجينز خصوصا لو هتلبسي معاه بلايزر او كارديجان، انما لو طوله مناسب وشكله حلو خليه بره. 

4- شوز مع BUSINESS OUTFIT : 

كل business lady محتاجة تهتم جدا بالـ outfits بتاعتها، خصوصا لو هتعملى  business outift بيبقى ضرورى انك تهتمى بنوع الشوز اللى هتلبسيه، لانه الشوز الفلات مش هيبقى شكله حلو مع اللوك الفورمال اللى هتعمليه و كمان مش هيديكى الاحساس بالثقة و الشياكة اللى بتحتاجيه اثناء اجتماعاتك او مقابلاتك المهمة ، علشان كده حاولى تتجنبيه، وحاولى تلبسي دايما heels حتى لو حجمها صغير علشان هتفرق كتير فى اللوك بتاعك. 

5- حمالات الـ bra بتبان :

وده بيعتبر واحد من اكتر الاخطاء المنتشرة اللى كلنا تقريبا بنعملها، حمالات البرا لو باينة او محسوسة حتى لو من تحت الهدوم ممكن جدا تبوظ اللوك بتاعك مهما كانت شياكته واناقته و المجهود اللى انتى بذلتيه فيه، علشان كده مهم تختارى البرا اللى تناسبك صح، ويفضل لو هتلبسي فستان كب او off shoulder تلبسي معاه strapless bra.

اعرفى معانا كمان 10 اخطاء كل البنات بتقع فيها مع الملابس الداخلية..وازاي تتجنبيهم