تمارين للوجه لبشرة منورة وصحية بشكل طبيعي
كلمة تمارين اكيد لما نقولها مرتبطة بشكل طبيعي اننا نحافظ على رشاقة جسمنا, لكن هل تعرفوا ان التمارين الرياضية مفيدة كمان لبشرة صحية, في بعض تمارين اليوجا والتمارين بشكل عام ممكن تساعد على صحة وتوهج البشرة, والتمارين بسيطة جدا ونتيجتها فعالة ومذهلة وهتلاحظي نتايج فورية, والنهاردة من خلال موضوعنا هنقولك مجموعة تمارين لبشرة صحية ومتوهجة.
تمارين لبشرة صحية:
1- التمرين الاول:
واحد من اكتر التمارين اللي ليها تأثير فعال على صحة البشرة لانها بتساعد على تدفق الدم بسرعة للبشرة وبيخليها صحية ومشرقة, بتعالج التجاعيد, بتقلل حب الشباب في خلال اسابيع من الانتظام عليها, وتعتبر بديل طبيعي للبوتوكس.
– اول حاجة اشبكي ايديكي الاتنين في بعض.
– انزلي على ركبك, اسندي راسك على ايديكي.
– ارفعي نص جسمك اللي تحت, واسندي على اطراف صوابعك.
– وبعدين ارفعي رجلك لفوق بالتدريج لحد ما تفرديها.
– لو هيكون صعب في الاول شوية, ممكن تسندي برجلك على الحيطة.
2- التمرين التاني:
التمرين ده يعتبر من تمارين التنفس بيحسن صحة الرئة وبيساعد جسمك انه يمتص اكسجين اكتر, وكمية الاكسجين الزيادة دي هتحافظ على تغذية بشرتك والحفاظ عليها صحية, بالاضافة كمان انه بيحسن وظيفة الجهاز الهضمي, وده كله بيظهر بشكل ايجابي على البشرة, وهيقلل كمان من حب الشباب, وهنلاقي اكتر من طريقة لعمل تمرين التنفس.
– اقعدي قعدة مريحة وربعي رجلك, استخدمي ابهام الايد اليمين سدي بيها فتحة الانف اليمين, واستنشقي بعمق من فتحة الانف الشمال وطلعي الزفير من اليمين, وبعدين اعملي نفس التمرين للجنب التاني, اقفلي فتحة الانف الشمال بالابهام الشمال, واستنشقي بعمق من فتحة الانف اليمين وطلعي الزفير من الشمال, كرري التمرين من 10 – 15 مرة لكل جنب.
– اقعدي على الارض قعدة مريحة مربعة رجلك, اتنفسي من 5 – 6 مرات للاستعداد, افتحي الفم على شكل حرف “O” خدي نفس من الفم وطلعيه من الانف, كرريه من 5 – 10 مرات.
– اقعدي على الارض قعدة مريحة, خدي شهيق وزفير بعمق من الفم, واثناء التنفس حاولي تشدي او تقبضي منطقة الحلق, وبعدين اقفلي الفم واستخدمي الانف للتنفس مع شد الحلق, كرري التمرين من 10 – 15 مرة.
– نامي على ضهرك وغمضي عينك, اتنفسي بشكل طبيعي ببطء للاسترخاء, خدي نفس عميق بحيث تملي بطنك هوا, واحتفظي بالهوا ده لمدة ثواني, وبعدين خدي زفير طلعي الهوا, الخطوة التانية خدي نفس املي البطن بالهوا, وبعدين خدي نفس تاني املى الرئتين, وبعدين طلعي الزفير من الرئة وبعدين البطن يعني فضي الهوا واحدة واحدة, الخطوة التالتة زودي استنشاق الهوا عشان تملي البطن والرئة والقلب, وبعدين طلعي الزفير من القلب وبعدين الرئة وبعدين البطن, كرري التمرين من 5 – 6 مرات.
3- التمرين التالت:
تمرين عضلات الوش مهم جدا عشان نحافظ عليها صحية لان التمارين بتساعد على زيادة كمية الدم وتنشيط الدورة الدموية, وبالتالي ده بيحسن من تجاعيد البشرة وبيأثر بشكل ايجابي على البشرة بشكل عام.
والتمرين بكل بساطة مدي الفم لقدام كأنك هتبوسي حد, وبعدين حاولي تبتسمي على قد ما تقدري, وخليكي على الوضع ده لمدة 10 ثواني وبعدين استرخي, كرريه يوميا لمدة دقيقة.
4- التمرين الرابع:
التمرين كويس جدا لو بتعاني من ترهل الجلد او الدقن المزدوجة هيساعدك تتخلصي منهم, كمان هيحسن من انتاج الكولاجين للبشرة, وهيحسن تدفق الدم وبالتالي هيساعد على علاج الترهل والتجاعيد.
التمرين بكل بساطة هتعملي شكل وش السمكة, هتشفطي الخدين لجوه وتخلي الشفايف زي وش السمكة, وبعدين فكي الوش وحاولي تبتسمي على قد ما تقدري لمدة 10 ثواني وبعدين استرخي, كرري التمرين من 1 – 2 دقيقة.
5- التمرين الخامس:
التمرين ده كمان بيزود الاكسجين وتدفق الدم وبالتالي بيساعد على تحسين البشرة, بيجدد خلايا البشرة بشكل افضل, بيبطيء عملية الشيخوخة.
– ضمي الفم على شكل حرف “O” كأنك هتصفري.
– وبعدين جربي تبتسمي وانتي وشك على نفس الوضع, وخليكي على الوضع ده لمدة 10 ثواني وبعدين استرخي.
– كرري التمرين لمدة دقيقة.
6- مساج الوجه:
واحدة كمان من الحيل اللي بتساعد على تحسين البشرة هي المساج او تدليك الوش بتخلي البشرة تتوهج وتبقى صحية بشكل طبيعي, لان التدليك بيحسن الدورة الدموية وبيحافظ على صحة ورطوبة البشرة, وممكن تستخدمي مع التدليك جل الالوفيرا عشان تزودي فاعلية المساج.
وعشان نعمل المساج بطريقة صح هنقولك شوية نصايح:
– متبالغيش في تدليك البشرة في الاتجاه المعاكس.
– ممكن تعملي المساج اثناء الانشطة اليومية بتاعتك, يعني ممكن وانتي قاعدة بتتفرجي على التليفزيون مثلا تعملي المساج لمدة 5 دقايق.
– استخدمي في التدليك الصوابع السبابة بس مش الكف كله, لان ده بيحفز نقط الضغط اللي بتأثر على البشرة.
– اعملي ضغط خفيف اثناء المساج ومتبالغيش في الضغط على البشرة.
– حاولي تشربي مية كتير لان ليها تأثير ايجابي جدا على البشرة.
– دخلي في نظامك الغذائي بشكل يومي الخضار الطازة والفاكهة عشان جسمك ياخد كل العناصر الغذائية اللي محتاجها وده هينعكس على البشرة بشكل ايجابي, كمان المية الموجودة في الفاكهة هتساعد على تغذية بشرتك من جوه.
– بعد التمارين دي بشرتك هتبقى في حالة تجديد, عشان كده متحاوليش بعدها على طول تقفلي المسام بالمكياج, ادي بشرتك وقت تستفاد بالتمارين.
– انتظمي على التمارين دي بشكل يومي وهتلاحظي فرق كبير جدا على بشرتك بعد فترة قصيرة, وهتحسي بتحسن البشرة وانها بقت صحية ومتوهجة ومنورة.
بالصور والخطوات: مساج الدقيقة والواحدة للوجه minute facial massage
