10 حاجات مهمة لازم تاخدي بالك منها لما تيجي تشتري هدوم جديدة
لما بتيجي تعملي شوبينج وتشتري اي حاجة جديدة في تفاصيل صغيرة ممكن تعدي عليكي ومتاخديش بالك منها لكن في الاخر بتفرق في مظهرك العام, والنهاردة من خلال موضوعنا هنقولك على نصايح موضة تاخدي بالك منها لما تيجي تعملي شوبينج المرة الجايه.
نصايح موضة:
1- مرونة وعرض الشوز:
لما بنيجي نشتري الشوز غالبا اول حاجة بنبص لها او بنركز عليها هي موديل الشوز او لونه لكن بنهمل مرونة الشوز وهيريحنا ولا لا في اللبس, عشان كده لما تيجي تشتريه حاولي انك تمسكيه في ايدك وتتنيه يمين وشمال وتشوفي مرونته عاملة ازاي وفي نفس الوقت بردو يكون فيه شوية مقاومة للتني والالتواء يعني ولا يكون ناشف اوي او طري زيادة عن اللزوم, وحاولي تلبسيه وتتمشي بيه على ارض صلبة وعلى السجاد عشان تشوفيه على الاتنين هيبقى عامل ازاي وهيريحك في كل الاحوال ولا لا, ولازم نهتم بعرض الشوز مش بالطول بس, اتأكدي ان في مساحة كافية انك تحركي صوابعك جوه الشوز شوية, ولو مقدرتيش تحركي صوابعك خالص جوه الشوز في الحالة دي يبقى كده ضيق جدا ومش مناسب وهيتعبك ومحتاجة مقاس اكبر.
2- البلوفر الكشمير:
البلوفر الكشمير لو ناويه تشتري واحد منه يبقى تاخدي بالك قبل ما تشتري من الخيوط بتاعته معظم البلوفرات الكشمير بتكون معمولة من غرزتين وده معناه ان الغرزة محكومة كويس واكتر سمك من اللي معمول من غرزة واحدة, ازاي تفرقي بينهم لما تيجي تشتري؟ اللي معمول بغرزة واحدة هنلاقي في غرزة اوسع من التانية شوية, لكن اللي معمول بغرزتين هنلاقي الاتنين متساويين زي ما هو باين في الصورة كده.
3- الطباعة متطابقة:
في الهدوم عالية الجودة هنلاقي ان الطباعة او الخطوط او النقشان متطابقة على الاكمام, لكن لو جودته مش عالية هتلاقي الخطوط او الطباعة مش متطابقة على الكتفين او الاكمام.
4- الطول المثالي للبنطلون الجينز:
اختيار البنطلون الجينز بالنسبة للبنات بيعتمد على حاجتين نوع الجينز وطوله, البنطلون المفروض يكون فوق عضمة الكاحل بالظبط, بالنسبة للجينز السكيني لازم يكون فوق الكاحل, والستريت جينز يغطي الجزء اللي فوق بس من القدم.
بالنسبة للرجالة البنطلون المفروض يكون طويل كفاية عشان يغطي الشراب, وبردو قصير كفاية بحيث انه ميغطيش الشوز يعني ولا طويل اوي ولا قصير اوي.
5- نوعية النسيج او الخامة:
اتأكدي دايما من نوعية النسيج وبصي على ال Label بتاعه وشوفيه مصنوع من اي خامة لان النسيج الصناعي غالبا بيكون ارخص وبيكون مخلوط مع نسيج طبيعي بنسبة معينة والخامة دي غالبا مش بتدوم كتير مع الغسيل المتكرر, امسكي الحاجة اللي هتشتريها وارفعيها للضوء عشاني تشوفي كثافة ووزن النسيج.
اخر حاجة اتأكدي من الهدوم من جوه ومن بره وشوفي التقفيل بتاعه لو تقفيل مش نضيف ولقيتي فيه خيوط طالعة من مكانها او مش متخيطة كويس او متخيط خياطات فوق بعض كذا مره دي تبقى علامات تخليكي متشتريش.
6- متثقيش في المقاس المكتوب:
لما بنيجي نشتري اكيد المقاسات بتكون مكتوبة على كل حاجة بس مش دايما المقاس المكتوب بيكون صح او هو المناسب لينا لان المقاسات بتختلف من حاجة للتانية, عشان كده لازم تقيسي وتجربي اكتر من حاجة لحد ما تلاقي الحاجة المناسبة ليكي ومقاسها مظبوط عليكي.
7- اختيار ملابس الشوبينج:
لو رايحة تشتري شوز يبقى وانتي خارجة من البيت البسي شوز سهل القلع واللبس عشان يسهل عليكي لما تيجي تقيسي في المحل, والبسي هدوم مريحة بردو تكون سهلة القلع واللبس ومريحة للشوبينج, والبسي الملابس الداخلية اللي انتي ناوية تلبسيها على الحاجة اللي هتشتريها عشان تشوفي الشكل العام كله قبل ما تشتري.
8- توقيت الشوبينج:
كلنا عارفين ان في اوقات من السنة بيكون في تخفضيات كتير وممكن نشتري فيها الحاجة بسعر اقل بكتير, حاولي تكوني عارفة ايام التخفيضات عشان تنزلي تشتري فيها وتستفادي بفرق السعر, وغالبا بتكون التخفيضات للربيع في مارس, وللصيف في يونيو, وللخريف في سبتمبر, وللشتا في شهر ديسمبر.
9- متشتريش اي حاجة على طول:
لو شوفتي حاجة عجبتك متشتريهاش على طول اول ما تشوفيها, ممكن تستني اسبوع وبعد الفترة دي تقرري على انتي فعلا عايزاها ولا مش هترجعي لها تاني, لان كتير بيحصل معانا نتيجة التسرع اننا نشتري حاجة نندم عليها عشان كده فترة الانتظار دي مهمة جدا, والمخططين الماليين اتفقوا تقريبا ان المفروض متصرفيش اكتر من 5% من مرتبك على الهدوم.
10- التكلفة لكل لبسه:
لو عايزة تحددي عايزة تشتري حاجة غالية اوي او تختاري حاجة ارخص, استخدمي طريقة التكلفة لكل لبسه, وهي عبارة عن مجموع سعر الملابس وغسلها او صيانتها مقسوم على عدد مرات لبسها بالتقريب خلال السنة, والمعادلة دي للهدوم اللي بتلبسيها بشكل منتظم والافضل انك تختاريها تكلفتها عالية شوية لان في المقابل هتبقى اعلى جودة وهتعيش معاكي وقت اطول, والعكس صحيح للحاجات اللي مش هتلبسيها بشكل منتظم اوي ممكن تجيبيها اقل شوية في السعر او ارخص.
اخطاء موضة كلنا بنقع فيها ! واعرفي ازاي تختاري لبسك صح
