نصايح ازاى تعملى make up مظبوط حتى وانتى مستعجلة الصبح

بقلمآية حسان فيجمال ومكياج visibility593

فى الصبح بنبقى مش قادرين نقوم من تحت الغطاء و كل يوم بيبقى نفسنا بس فى خمس دقايق كمان قبل ما نضطر نجهز نفسنا علشان ننزل للشغل او الجامعة ، و لانه النوم مهم جدا و اوقات كتير ما نقدرش نضحى بـ ولا دقيقة منه علشان نقوم بدرى و يبقى فى وقت كفاية للفطار او الرياضة او حتى روتين مكياج مظبوط، فى المقال ده احنا هنقولك على حل سحري يخليكى تعملى make up مظبوط علشان الايام اللى النوم فيها بيغلبك و بتصحى متأخر، فى المقال ده بنات حوا هتعرفك على نصايح ازاى تعملى make up مظبوط حتى وانتى مستعجلة الصبح .. 

نصايح ازاى تعملى make up مظبوط حتى وانتى مستعجلة الصبح

1- تنظيف و ترطيب البشرة : 

تنظيف و ترطيب البشرة بيعتبر خطوة مهمة و اساسية جدا فى اى روتين اهتمام بالبشرة و اى روتين مكياج، تنظيف البشرة هينقيها من اى اتربة او ميكروبات ممكن تسد المسام و بالتالى هتحافظ على بشرتك من ظهور الحبوب او الخشونة و الالتهابات،  وده هيخلى بشرتك تبان فريش و نقية. استخدمى منظف بشرة مناسب و أتأكدى انه مش هيسبب لك اى جفاف، و بعد التنظيف استخدمى مرطب علشان يعادل الترطيب فى بشرتك و يغذيها. 

2- الثلاثى الذهبى : 

فى الصبح مابيبقاش فى وقت اوى انك تعملى مكياج كامل، علشان كده  انسي الصبح انك تلحقى تعملى كونتور او توزعى الهايلايتر، و الايلاينر اللى هيطلع من غبر ولا غلطة! الحل كله فى انك تستخدمى ” الثلاثى الذهبى” ، او بنقصد تحددى أدوات معينة تستخدميها و تساعدك فى انك تحصلى على fresh look ، ادرسي بشرتك كويس و اعرفى ايه هى المنتجات اللى بتعتبر اساسية بالنسبة لها، و اكتفى باستخدام التلاتة دول بس الصبح، وبكده تبقى طبقتى قاعدة ” الثلاثى الذهبى ” او الـ golden trio . 

وهنا فكرة عن المنتجات التلاتة الأساسية علشان تختارى منها: 

فاونديشن التغطية المتوسطة : 

مهم يستخدموه اصحاب البشرة اللى فيها مشاكل او عيوب ومحتاجة تتغطى، حاولى تختارى فاونديشن بتغطية متوسطة الى جيدة علشان تقدرى بيه تدارى العيوب من غير ما تضطرى تصلحى مكياجك كل شوية. 

الكونسيلر : 

علشان تدارى بيه الهالات السوداء و المناطق الغامقة ، و تعملى بيه لوك فريش و منور، لو كانت العيوب فى بشرتك قليلة و الكونسيلر يقدر عليها ممكن تستغنى بشكل كامل عن الفاونديشن. 

البودر : 

البودر أساسي لو كنتى من أصحاب البشرة الدهنية و المختلطة علشان تتجنبى لمعان البشرة. 

قلم الحواجب : 

بتعتبر أقلام تصليح الحواجب فكرة مناسبة خصوصا فى الاستخدام السريع علشان تصلحى بيهم حواجبك، لكن لو كانت حواجبك مطبوطة او لو انتى عاجبك شكلهم الطبيعى يبقى ممكن تستغنى عن أقلام الحواجب خالص. 

الماسكارا : 

طريقة سريعة علشان توسعى عينيكى و تبرزيها أكتر و مش هتاخد منك أى وقت. 

نصيحة سريعة : 

بعد ما خدتى فكرة عن أدوات المكياج الاساسية، أبدأى أفحصى بشرتك كويس و افهميها علشان تعرفى ايه العيوب اللى هتبقى محتاجة تتدارى سواء كانت حبوب ، رؤوس سوداء ، علامات او بقع و اختارى الـ 3 حاجات اللى هيناسبوكى فى انهم يداروا العيوب دى أكتر. 

شوفى معانا كمان 16 نصيحة جمالية لو عملتيها هتخليكي زي نجمات هوليوود