11 عادة بسيطة هتغير حياتك للافضل

ريهام محمود
ريهام محمود
في
صحة
12900

ساعات عشان نعمل تغيرات ايجابية في حياتنا بنبقى محتاجين اننا نبص ببساطة كده لاسلوب حياتنا وروتينا اليومي ونشوف الحاجات اللي بنعملها كل يوم واللي ممكن نغيرها لحاجات تانية مفيدة من غير اي مجهود, والنهاردة ده اللي هنعرفه من خلال موضوعنا هنقول لكل بنات حوا على عادات مفيدة هتغير حياتك للافضل رغم بساطتها لكن ليها تأثير ايجابي جدا.

عادات مفيدة هتغير حياتك للافضل:

1- ابدأي يومك بكوباية مية بالليمون:

خليها قاعدة اساسية في روتينك اليومي كل يوم الصبح اشربي كوباية مية دافية مضاف ليها عصير ليمونة وشوية شطة صغيرين جدا, العادة دي هتخلي عملية التمثيل الغذائي بتاعتك تبدأ مع وجبة الفطار, عصير الليمون بيحتوي على فيتامين C اللي بيقوي المناعة, والشطة هتسرع من عملية التمثيل الغذائي او الحرق, بالاضافة لده كمان ان حالة الجلد هتتحسن بشكل كبير جدا مع الانتظام على العادة دي.

عادات مفيدة هتغير حياتك للافضل 1
عادات مفيدة هتغير حياتك للافضل 1

2- مكعبات تلج البابونج:

عادة تانية مفيدة جدا تدخليها في روتينك اليومي كل يوم الصبح, وهي مكعبات التلج اللي معمولة من مغلي البابونج, اغلي البابونج في مية بالطريقة العادية وصبيه في مكعبات التلج, واستخدمي كل يوم الصبح مكعب مرريه على بشرتك, هتساعد على منع التجاعيد, بيساعد على تجديد الجلد, هينعم الجلد ويخليه مخملي جدا.

عادات مفيدة هتغير حياتك للافضل 2
عادات مفيدة هتغير حياتك للافضل 2

3- خدي معاكي السناكس او الوجبات الخفيفة:

من اكتر الحاجات المضرة على الصحة بشكل عام هو الاكل الغير صحي او الجانك فود والحلويات الكتير, وعشان نقلل من الرغبة في اكل الحاجات الغير صحية بين الوجبات, دخلي العادة دي في روتينك اليومي وهو انك تاخدي معاكي سناكس صحي, ممكن فاكهة او مقرمشات صحية او زبادي, عادة الوجبات الخفيفة اللي خالية من الكربوهيدرات دي هتديكي نتايج واضحة وملحوظة جدا خلال شهر.

عادات مفيدة هتغير حياتك للافضل 3
عادات مفيدة هتغير حياتك للافضل 3

4- استخدمي خيط الاسنان:

حالة الاسنان بتعتمد بشكل مباشر على صحة جسمك, حتى ان العلماء اثبتوا بالابحاث العلاقة بين الاسنان وامراض القلب والاوعية الدموية, عشان كده مهم جدا اننا نهتم بصحة اسنانا, ومن العادات اللي هتساعدك على ده هي استخدام خيط الاسنان, لانه بيساعد على تنضيف وتطهير الفراغ اللي بين الاسنان اللي بيكون صعب الوصول ليه بالفرشة من اي بقايا اكل.

عادات مفيدة هتغير حياتك للافضل 4
عادات مفيدة هتغير حياتك للافضل 4

5- كلي تفاحة بعد كل وجبة:

اكيد من المفضل غسل الاسنان بالفرشة بعد كل وجبة لكن مع ذلك مش دايما ممكن اننا نغسلها بعد الوجبة, وبديل لده في حل بسيط جدا ولذيذ في نفس الوقت وهي اكل تفاحة بعد كل وجبة, هتساعد على تطهير الفم من اي بقايا اكل بين الاسنان, وهتساعد على تحسين الدورة الدموية في اللثة, وهتظبط مستوى الحموضة في الفم, واكل الفاكهة والخضار الطازة عموما هيحميكي من التهاب اللثة.

عادات مفيدة هتغير حياتك للافضل 5
عادات مفيدة هتغير حياتك للافضل 5

6- خدي شاور سخن وبارد يوميا:

الشاور السخن والبارد من الحاجات المفيدة جدا للصحة لو خلتيه من عاداتك اليومية كل يوم لمدة دقايق بس هيفرق معاكي جدا, لانه بيساعد على تعزيز الجهاز العصبي والاوعية الدموية, كمان يعتبر وقاية وعلاج من الدوالي.

عادات مفيدة هتغير حياتك للافضل 6
عادات مفيدة هتغير حياتك للافضل 6

7- خلي ازازة مية جنبك:

معظم الاشخاص مش بيلاحظوا انهم ممكن يكونوا بيعانوا من الجفاف او قلة المية, ولو قررتي انك تمشي على اسلوب حياة صحي يبقى اول حاجة لازم تتحط في قايمة اسلوب الحياة الصحي هي المية, ضروري انك تزودي في شرب المية, والقهوة والشاي والمشروبات الغازية اكيد خارج القايمة دي, خلي دايما ازازة مية جنبك او على مكتبك او في اي مكان تكوني فيه ازازة المية لازم تكون اساسية معاكي ده هيخليكي تشربي مية كتير من غير مجهود, وممكن تعملي تذكير على تليفونك انك تشربي مية كل ساعة, او تنزلي تطبيق يفكرك بشررب المية دلوقتي فيه تطبيقات لكده زي تطبيق Water drink reminder للاندرويد, او تطبيق Water quality للايفون.

عادات مفيدة هتغير حياتك للافضل 7
عادات مفيدة هتغير حياتك للافضل 7

8- كلي مكسرات:

كلي يوميا ما لا يقل عن 50 جرام مكسرات اي نوع, لانها غنية جدا بالاحماض الدهنية والاوميجا 3 اللي بتساعد على تعزيز نظام القلب والاوعية الدموية والشعر والضوافر, بالاضافة كمان ان المكسرات بتحتوي على السيلينيوم ومضادات الاكسدة وفيتامين E والمواد اللي بتقلل من مستوى الكوليسترول الضار والبوتاسيوم والكالسيوم والحديد والمغنسيوم والزنك باختصار المكسرات تعتبر مخزون من الفيتامينات والمواد المغذية.

عادات مفيدة هتغير حياتك للافضل 8
عادات مفيدة هتغير حياتك للافضل 8

9- نامي بالشراب:

في الصيف ممكن تلبسي شراب قطن وفي الشتا البسي صوف, خدي شاور قبل النوم وادهني رجلك بخليط من زيت جوز الهند مع كام نقطة من زيت النعناع ودلكي الرجل كويس بيه والكعوب لحد ما الجلد يتشربه كويس والبسي الشراب ونامي بيه, وهتلاحظي النتجة الفورية على طول تاني يوم الصبح, هتلاقي رجلك ناعمة جدا, وبعد شهر واحد هتنسي مشكلة الجلد الميت وخشونة وتشقق الكعبين مع الانتظام على العادة دي بشكل يومي.

عادات مفيدة هتغير حياتك للافضل 9
عادات مفيدة هتغير حياتك للافضل 9

10- اقري كل يوم:

القراءة لازم تكون عادة يومية لانها بتحسن الذاكرة, والتفكير, والخيال, واثبتت الابحاث ان القراءة ممكن انها تبطيء او حتى تمنع خالص مرض الزهايمر والخرف, وعشان تتعودي على القراءة بشكل اسرع ممكن تحطي كتاب في كل ركن في البيت, يعني في الحمام وفي المطبخ, جنب السرير, في شنطتك عشان تقري وانتي قعدة في اي مكان او في المواصلات, حاولي تقري يوميا من 15 – 20 دقيقة وبعد كده ابدأي في زيادة المدة.

عادات مفيدة هتغير حياتك للافضل 10
عادات مفيدة هتغير حياتك للافضل 10

11- اكلات صحية لجسم اقوى وصحي اكتر:

– لتقوية الرئتين: امضغي يوميا من 3 – 5 ورقات نعناع.

– لعلاج الاحتقان: ضيفي كام نقطة من زيت النعناع لطبق مليان مية سخنة واستنشقي البخار بتاعه.

– حاولي تدخلي الجنزبيل الخام لاكلاتك لانه مفيد جدا للصحة.

– لمشاكل الجهاز التنفسي والرئة: ضيفي 1 معلقة صغيرة من العرق سوس لكوباية مية سخنة وغطيه وسيبيه منقوع لمدة 10 دقايق وبعدين اشربيه.

– استخدمي الزعتر في اكلاتك لانه كمان من المكونات المفيدة جدا للصحة.

– حاولي تدخلي في اكلاتك اليومية الثوم والكركم والجريب فروت والرمان والتفاح والتوت الاسود.

عادات مفيدة هتغير حياتك للافضل 11
عادات مفيدة هتغير حياتك للافضل 11

10 طرق سهلة تزودي بيهم طاقتك من غير كافيين

طرق تزودي بيهم طاقتك من غير كافيين
طرق تزودي بيهم طاقتك من غير كافيين

مقالات متعلقه

10 نصايح صحية سهلة هيفرقوا معاكي

10 نصايح صحية سهلة هيفرقوا معاكي

10 نصايح ممكن تنقذ حياتك في يوم

10 نصايح ممكن تنقذ حياتك في يوم

7 عادات قوية هتحافظ على شبابك لفترة اطول

7 عادات قوية هتحافظ على شبابك لفترة اطول