حيل ونصايح لفترة الدورة الشهرية هتغير حياتك للابد
فترة الدورة الشهرية تعتبر من اصعب الفترات اللي بتمر على اي بنت كل شهر وبتبقى شايلة همها من الالم اللي بتتعرض له والعناية والنضافة دي, عشان كده احنا النهاردة هنقول لكل بنات حوا مجموعة حيل و نصايح لفترة الدورة الشهرية هتساعدك تعدي الايام دي وتحولها لفترة سهلة بالنسبة لك من غير قلق.
نصايح لفترة الدورة الشهرية:
1- اربه سخنة او شراب سخن:
من اكتر الحاجات اللي بتعاني منها معظم البنات خلال فترة الدورة الشهرية هي التقلصات وآلام البطن, وعشان تتخلصي منها ممكن تستخدمي اربة مية سخنة او ازازة او شراب حطي فيه كمية من الارز وحطيه يسخن في الميكروويف لمدة دقايق وحطيه على مكان الالم هيساعد على التقليل من التقلصات.
2- كاس الدورة الشهرية:
دلوقتي نزلت حاجة جديدة غير الفوط الصحية وهو كاس الدورة الشهرية, بيكون عبارة عن كاس صغير مصنوع من السيليكون وطبي وآمن جدا في استخدامه, وبيمنع التسرب تقريبا بنسبة 99%.
طريقة استخدامه بالفيديو:
3- ملابس داخلية للدورة الشهرية:
لو مع الخطوة اللي فاتت لسه حاسه بعدم امان وعايزة تأمني نفسك اكتر, ممكن تلبسي البانتي او الملابس الداخلية الخاصة بفترة الدورة الشهرية كحماية اضافية مع الفوط او كاس الدورة الشهرية, والنوعية دي من البانتي هنلاقيها في محلات الملابس الداخلية بتكون مصنوعة من كذا طبقة ومن خامة تمنع التسريب ومحكومة على الجسم عشان متتحركش مع النوم او مع نشاطك اليومي.
4- كلي الاكلات الغنية بالبوتاسيوم:
الاكلات الغنية بالبوتاسيوم بتساعد في تقليل التقلصات وبالتالي هتكون اختيارك المناسب للفترة دي عشان تعدي بسهولة, ومن اكتر الاكلات الغنية بالبوتاسيوم الموز حاولي تكتري من اكله في فترة الدورة, والافوكادو, والبطاطس, والبطاطا, والطماطم, والفاصوليا, والزبادي, وسمك السلمون, والسبانخ.
شوفي من هنا نصائح لتجنب اعراض ما قبل الدورة الشهرية.
5- ابعدي عن السناكس المالحة:
حاولي تبعدي في القترة دي عن السناكس او الوجبات الخفيفة المملحة لانها هتزود تورم الجسم, حاولي تعتمدي على الفواكه والاكلات اللي مش مملحة.
6- ابعدي عن الكافيين:
الكافيين بيزود التقلصات وتشنجات البطن وهيخليها اسوأ, عشان كده حاولي تستبدلي القهوة او النسكافية باي مشروب سخن تاني او بنوع قهوة منزوعة الكافيين.
شوفي من هنا 7 طرق للتخفيف من آلام الدورة الشهرية.
7- تطبيقات الدورة الشهرية:
دلوقتي في عصر التكنولوجيا والتطبيقات بقى في تطبيقات لكل حاجة في حياتنا, تقدري تنزلي تطبيقات لفترة الدورة الشهرية تساعدك تحسبي بدايتها هتكون امتى عشان تكوني مستعدة كويس للايام دي.
ومن التطبيقات اللي ممكن نستخدمها للاندرويد والايفون:
– تطبيق My Cycles.
– تطبيق MonthPal.
– تطبيق Pink Pad.
– تطبيق Period Tracker.
8- مستلزمات فترة الدورة الشهرية:
عشان متحسيش بالقلق دايما خليكي مجهزة قبل فترة الدورة الشهرية كل الحاجات الخاصة بيها, الفوط الصحية, مطهر ومنظف للمنطقة الحساسة او منتجات النضافة بشكل عام, وفي النهاية الحاجات دي بتبقى حسب اختيارك الشخصي او الحاجات اللي متعودة تستخدميها.
9- المسكنات:
لو التقلصات عندك بتكون صعبة اوي في فترة الدورة ممكن تاخدي مسكن يساعد في التخفيف من التقلصات ممكن كده تعملي بحث عن انواع المسكنات وتختاري واحد مناسب ليكي او ترجعي للدكتور الصيدلي يرشحلك نوع كويس.
10- اليوجا:
كتير من البنات مش بيحبوا ياخدوا مسكنات يبقى الحل الامثل ليكي في الحالة دي هو الرياضة, اليوجا تعتبر من افضل الاختيارات لفترة الدورة الشهرية لانها هتساعدك جدا على الاسترخاء وتخفيف التقلصات.