10 طرق بسيطة تعرفي بيهم ان الشخص اللي قدامك بيكدب عليكي

ريهام محمود
ريهام محمود
2066

ممكن تكوني بتتعاملي مع شخص يوميا ويكون بيكدب عليكي احيانا لكن انتي مبتعرفيش ده او مبتقدريش تحددي هو صادق ولا كداب, والنهاردة من خلال موضوعنا هنقولك ازاي تقدري تعرفي الشخص اللي قدامك ده بيكدب عليكي ولا لا من خلال 10 طرق تكشفي بيهم الشخص الكداب.

طرق تكشفي بيهم الشخص الكداب:

1- اجابته هتبقى غامضة:

لو سألتي الشخص اللي قدامك سؤال واداكي اجابة غامضة اوي دي تعتبر علامة على كدبة, مثلا سألتيه انه اخد حاجة معينة منك هيرد يقولك ازاي تفكري كده فيه انا معرفش اصلا ان انتي عندك الحاجة دي, يعني اجابته هتكون فيها لف ودوران, عشان كده حاولي متخليهوش يخرج عن الموضوع وتاخدي منه اجابة مباشرة بـ “نعم” او “لا” ودي هتبقى الحقيقة.

2- هيضحك:

لو الشخص اللي بتتكلمي معاه وبتحاولي تسأليه عن حاجة جاوب عليكي بضحكة في بداية الكلام في الغالب هيكون بيكدب وعايز يخدعك او يشتت تفكيرك, وتعتبر علامة غير مباشرة على الكدب وبيحاول انه يخلي المحادثة اقل جدية.

طرق تكشفي بيهم الشخص الكداب 1
طرق تكشفي بيهم الشخص الكداب 1

3- المبالغة في الصدق:

من علامات الكدب المبالغة في الصدق بمعنى انك لو سألتيه عن حاجة هتلاقيه بيحلف زيادة عن اللزوم وكتير عشان يأكدلك صدقه ويقولك ان عمره ما كدب عليكي وانه مالوش علاقة بالموضوع او الحاجة اللي انتي سألتيه فيها.

4- التعاطف:

ممكن التعاطف الزيادة يكون دليل على الكدب يعني لو مثلا سألتيه انه اخد حاجة معينة منك, هيرد يقولك انا حاسس بشعورك اوي لما حاجة تضيع منك او حد ياخد حاجة تخصك.

طرق تكشفي بيهم الشخص الكداب 2
طرق تكشفي بيهم الشخص الكداب 2

5- الاجابة على الاسئلة باسئلة تانية:

الشخص اللي بيكدب مش هيديكي ابدا اجابة مباشرة, هيحاول يرد على سؤالك باسئلة تانية, وافتكري دايما ان الاجابة على الاسئلة باسئلة هي علامة واضحة جدا على الكدب.

6- هيسكت شوية قبل ما يجاوب:

السكوت شوية قبل الاجابة وانه ميردش عليكي دي تعتبر علامة واضحة على الكدب وخصوصا لو انتي سألتي سؤال بسيط مش محتاج سكوت او تفكير, يعني لو الشخص سكت لمدة من 2 – 3 ثواني كده قبل ما يرد في الحالة دي يبقى كداب.

طرق تكشفي بيهم الشخص الكداب 3
طرق تكشفي بيهم الشخص الكداب 3

7- هيبرأ نفسه بشكل مبالغ فيه:

لو سألتي اللي قدامك مثلا انه اخد حاجة معينة تخصك هتلاقيه بيبالغ جدا انه يبرأ نفسه قدامك وهيقولك مثلا ازاي انا مش مصدق انك تفكري فيه بالشكل ده وهيبالغ في رد فعله جدا وهيبقى مندهش اوي عشان يقنعك انه مش بيكدب لكن دي تعتبر علامة على الكدب وفي الغالب هيكون هو اللي اخد اللي انتي سألتيه عليه.

8- هيكلمك بطريقة عدائية:

لو كلمك بطريقة عدائية او غلط فيكي دي تعتبر علامة على الكدب, او زي ما احنا بنقول كده “هيحاول يقلب الترابيزة عليكي” يعني مجرد ما انتي تتهميه بحاجة هيقولك انتي ازاي تفكري فيه بالشكل ده انتي كده بتهنيني, وفي الحالة دي حاولي انك تخلي المحادثة هادية اكتر وتسيطري عليها من غير خناق او توتر وبعدين اسأليه السؤال مرة تانية.

9- هيكرر السؤال:

لو الشخص اللي قدامك كرر سؤالك اكتر من مرة بعد ما قولتيه دي تعتبر علامة واضحة على الكدب.

10- تجنب الاجابة:

لو الشخص حاول تجنب الاجابة او حاول يغير الموضوع باي شكل في الغالب هيكون بيكدب عليكي وبيحاول بالطريقة دي يتوهك عن السؤال او الموضوع اللي بتكلميه فيه.

طرق تكشفي بيهم الشخص الكداب 4
طرق تكشفي بيهم الشخص الكداب 4

– كمان في تعبيرات للوش ولغة الجسد ممكن تقولك ان الشخص اللي قدامك بيكدب تعالوا نعرف بعضها:

1- لو الشخص اللي قدامك بيبلع ريقه كتير, او بيكح كتير, او تعبيرات وشه حاده, دي كلها علامات على الكدب وانه خايف يتكشف.

طرق تكشفي بيهم الشخص الكداب 5
طرق تكشفي بيهم الشخص الكداب 5

2- في الغالب الشخص لما بيكون هادي وفي حالته الطبيعية بتكون ملامح وشه مع حركات جسمه كلها متماثله او ماشية مع بعض, لكن في حالة الكدب هتلاقي الشخص فيه جزء من وشه او جسمه اكتر نشاط, وده معناه انه مش صادق او بيحاول يخبي حاجة جواه.

3- لما العين تتحرك من الجنب اليمين للشمال والعكس, في حالة ان الشخص اللي قدامك بيعمل الحركة دي وهو اصلا  مش شخص خجول فممكن يكون بيكدب عليكي.

4- لو بيودي عينه لفوق ناحية الزاوية اليمين.

طرق تكشفي بيهم الشخص الكداب 6
طرق تكشفي بيهم الشخص الكداب 6

5- لو حط الكف على الوش, او الجبين, او الرقبة, في الحالة دي هيبقى بيحاول يخبي حاجة.

طرق تكشفي بيهم الشخص الكداب 7
طرق تكشفي بيهم الشخص الكداب 7

6- حك الانف, او جفن العين, او شحمة الاذن.

7- هيبص لتحت مع هز الراس.

طرق تكشفي بيهم الشخص الكداب 8
طرق تكشفي بيهم الشخص الكداب 8

8- هيحط صوباعه في الفم, والحركة دي معناها ان اللي قدامك بيكدب بس بيحاول بدون وعي يقول الحقيقة بس مش قادر يقولها.

طرق تكشفي بيهم الشخص الكداب 9
طرق تكشفي بيهم الشخص الكداب 9

9- لو الشخص اللي قدامك صادق هتلاقيه لما بيضحك او بيبتسم عنيه بتضحك معاه يعني هتظهر التجاعيد اللي حوالين العين اثناء الضحك والعيون هتتقفل او تضيق شوية زي ما هو باين في الصورة اللي قدامنا كده, بعكس اللي بيكدب هتلاقي تعبيراته مش ماشية مع شعوره.

طرق تكشفي بيهم الشخص الكداب 10
طرق تكشفي بيهم الشخص الكداب 10

في النهاية لازم نخلي بالنا ونتأنى قبل ما نحكم على اللي قدامنا انه كداب يعني لو ظهرت علامة او اتنين من اللي احنا قولناهم لازم تسمعيه كويس وتتأكدي قبل ما تحكمي عليه, لو شوفتي بشكل اكيد 5 علامات على الاقل من اللي احنا قولناهم في سلوك الشخص اللي قدامك يبقى في الحالة دي هيكون في الغالب بيكدب عليكي.

8 حيل هتساعدك تكشفي بيهم الشخص الكذاب

علامات كشف الشخص الكذاب
علامات كشف الشخص الكذاب

مقالات متعلقه

اكتر 10 كذبات ممكن تتقال من الشريك في العلاقة

اكتر 10 كذبات ممكن تتقال من الشريك في العلاقة

ازاي قعدتك ممكن تكشف شخصيتك !

ازاي قعدتك ممكن تكشف شخصيتك !

7 عادات في لغة الجسد بيعملهم الاشخاص الناجحين .. اعرفيهم معانا

7 عادات في لغة الجسد بيعملهم الاشخاص الناجحين .. اعرفيهم معانا