7 اسباب مهمة ليه ممكن متخسريش وزن حتى مع الدايت..وازاي تحلي المشكلة دي

ريهام محمود

في

5477

لو شايفة انك بتعملي كل حاجة عشان تخسي من رياضة لنظام غذائي, لحرق سعرات حرارية ومع ذلك بردو لسه مش راضية عن النتايج او موصلتيش للنتيجة اللي انتي متوقعاها ومخستيش بشكل كافي, يبقى في الغالب في الحالة في اسباب تانية غير النظام الغذائي او مستويات النشاط عندك, وده اللي هنعرفه النهاردة من خلال موضوعنا هنقولك اسباب ليه مش بتخسي او بتفقدي وزن بشكل كافي, وازاي تحلي المشكلة دي.

اسباب ليه مش بتخسي:

1- التغيرات الهرمونية:

حياة المرأة كلها مليانة بالتغيرات الهرمونية من اول مرحلة البلوغ والحمل والولادة وانقطاع الدورة الشهرية, وكل المراحل دي بتأثر على عملية التمثيل الغذائي, وممكن يسبب في بعض الاحيان لزيادة الوزن, وعشان نحل المشكلة دي في خطوتين.

– الخطوة الاولى: انك تبدأي تعملي زيادة تدريجية في كمية وقوة النشاط البدني اللي بتعمليه في يومك, وفي بعض التمارين ممكن تكون كافية جدا لواحدة صغيرة في السن لكن مش كفاية بالنسبة لواحدة مثلا عندها 40 سنة عشان كده لازم تاخدي بالك وانتي بتختاري التمارين اللي هتمارسيها, وضرروي انك تحاولي على قد ما تقدري تنوعي في التمارين اللي بتمارسيها ما بين مثلا السباحة واليوجا والايروبكس, والتمارين الرياضية كلها بشكل عام, والقاعدة العامة ان كل ما تكبري في السن هتحتاجي انك تزودي نشاطك البدني اكتر.

– الخطوة التانية: ضروري نهتم بصحتنا ونعمل Check up كل فترة عند المتخصصين عشان نكتشف اي حاجة ممكن تحصل خلال فترة التغيرات الهرمونية.

2- اكل الفاكهة كتير:

الفاكهة تعتبر اكيد وجبة خفيفة صحية, لكن مع ذلك لازم نحط في الاعتبار ان في انواع من الفاكهة فيها سعرات حرارية عالية, وبتحتوي على نسبة عالية من السكر زي الجلوكوز, والفركتوز, والسكروز, ولما تاكلي فاكهة بكميات كبيرة اكيد ده هيسبب في زيادة الوزن او يخليكي متفقديش وزن, ولحل المشكلة دي.

– الخطوة الاولى: التقليل من الفاكهة وخصوصا اللي فيها نسبة سكر عالية.

– الخطوة التانية: افتكري دايما ان الانواع المختلفة من الفاكهة ليها قيمة غذائية مختلفة, يعني التنويع مهم ممكن تاكلي تفاح اخضر مع جريب فروت, رمان, اناناس, فيهم قيمة غذائية عالية وفي نفس الوقت سعرات حرارية قليلة.

3- المشاكل الصحية:

زيادة الوزن كمان ممكن تيجي من بعض المشاكل الصحية زي مشاكل الجهاز الهضمي, اللي ممكن يسبب تراكم السموم, والامساك, وتكيس المبايض اللي بتأثر على انتاج هرمون الذكورة, واداء الغدة الدرقية اللي بتأدي في النهاية لابطاء انتاج الهرمونات, ولحل المشكلة.

– الخطوة الاولى: دايما لازم يكون في فحص ذاتي لجسمنا ونشوف الحاجات اللي تعبانا ونعمل بيها قايمة.

– الخطوة التانية: بعد ما تحددي اللي تاعبك لازم تراجعي الدكتور المتخصص, عشان يحلل الاعراض ويحدد الاسباب ويبدأ في خطة العلاج.

4- تناول الادوية:

كل الادوية اللي بناخدها لاي حاجة هنلاقي ان فيها قايمة من الاثار الجانبية الكتير جدا, وللاسف ان كتير من الاشخاص بيتجاهلوا يقروا الاثار الجانبية لاي علاج قبل ما ياخدوه ويفكروا ان فايدة الدوا هتبقى مهمة اكتر من الاثار الجانبية المتوقعة, وفي بعض الادوية اللي ممكن تسبب زيادة الوزن زي مضادات الاكتئاب, حبوب منع الحمل, مضادات الهيستامين, مضادات الذهان, المنشطات, ولحل المشكلة.

– الخطوة الاولى: قبل ما تاخدي اي دوا ضروري جدا تقري الاثار الجانبية المتوقعة منه, ولما تاخدي منه لازم تاخدي بالك ايه التغيرات اللي حصلت لك بعد ما اخدتيه.

– الخطوة التانية: لو شاكه ان في اي علاج بتاخديه بيسبب لك زيادة في الوزن, ضروري ترجعي للدكتور وتطلبي منه يكتبلك دوا بديل ليه, لكن متحاوليش تبطلي علاج او تاخدي بديل من نفسك لان ده ممكن يكون فيه اضرار صحية عليكي.

5- الافراط في الاكل بسبب الحالة النفسية:

الحالة النفسية والعاطفية بتأثر علينا بشكل كبير جدا, كتير مننا بياخدوا الاكل كمكافأة او وسيلة لتلبية احتياجات مالهاش علاقة بالاكل نفسه, يعني مثلا الشوكولاتة لزيادة الشهوة الجنسية او للخروج من حالة اكتئاب, او الاكل بالنسبة لكتير ممكن يكون مضاد للاكتئاب لان الاكل اللي طعمه حلو او لذيذ بيدينا شعور كبير بالايجابية, لحل المشكلة.

– الخطوة الاولى: حاولي تعرفي الفرق ما بين انواع الجوع, يعني هل معدتك اللي محتاجة اكل ولا مخك؟ والقاعدة كده لو انتي محتاجة حاجة اوي وعايزة تاكلي منها كميات كبيرة ده اكيد هيكون معناه ان مش معدتك هي اللي جعانه وفي الحالة دي متمشيش ورا رغبتك المفرطة للاكل.

– الخطوة التانية: شوفي بديل غير الاكل, ومنع نفسك او انك تقولي لا مش هاكل مش كفاية لان مع الوقت اكيد مش هتقدري تقاومي وهتاكلي بردو, عشان كده لازم تفهمي اللي انتي محتاجاه بالظبط, يعني لو مثلا عايزة تحسني مودك بدل الاكل ممكن تروحي تتمشي في مكان, تاخدي حمام سخن, ترسمي, تتفرجي على فيلم, اعملي اي حاجة تستمتعي بيها في كل مرة تحسي انك عايزة تاكلي, اعملي حاجة Fun بدل الاكل.

6- الاجهاد والضغط والتوتر:

كتير من الناس ممكن يفكروا ان الاجهاد والضغط والتوتر ممكن يسبب انخفاض الشهية ويأدي لفقدان الوزن, لكن العكس تماما ممكن يحصل, لما الجسم بيكون تحت ضغط هيبدأ يفرز هرمون الكورتيزول اكتر وده الهرمون اللي بيزود من الشهية لان الجسم بيحس انه مشدود او مضغوط ومحتاج للطاقة لحمايته وبالتالي ده بيأدي لرغبة زيادة في الاكل, ولحل المشكلة دي.

– الخطوة الاولى: اتعلمي طريقة الاسترخاء وريحي جسمك, واعملي حاجة تخليكي تحسي بالهدوء والاسترخاء بشكل منتظم, ممكن تجربي ممارسة اليوجا.

– الخطوة التانية: لو مش قادرة تحددي الاسباب الحقيقية ورا الاجهاد او الضغط اللي انتي بتحسي بيه, ممكن ترجعي لدكتور نفساني يساعدك في ده.

7- قلة النوم:

كتير من الدراسات اثبتت ان في علاقة بين زيادة الوزن وقلة النوم, واثبتت الابحاث ان الاشخاص اللي مش بيناموا اكتر من 6 ساعات في اليوم ممكن وزنهم يزيد 11 كيلو في السنة اكتر من الاشخاص اللي بيناموا 7 ساعات على الاقل في اليوم, وساعة واحدة فرق ممكن يكون ليها تأثير كبير جدا على الوزن, لحل المشكلة.

– الخطوة الاولى: تغيير اولوياتك, واكيد هتلاقي ساعة زيادة تناميها, يعني لو بتقعدي على النت كتير, او بتنامي على الكنبة, او بتتفرجي على التليفزيون, ممكن تقللي من الحاجات دي وتنامي عدد ساعات كفاية.

– الخطوة التانية: اعملي جدول زمني انتظمي عليه, ونظمي وقتك ونامي في مواعيد ثابتة, ده هيساعدك جدا انك تنامي عدد ساعات كافية وتنامي كويس.