افكار ازاي تلبسي البالطو والبليزر المربعات بطريقة انيقة
كل سنة بتظهر اتجاهات جديدة في عالم الموضة, او موضات كانت قديمة بترجع تريندي تاني, زي موضة البالطو والبليزر المربعات من الحاجات اللي كانت قديمة جدا من ايام التمانينات ورجعت تاني موضة ل 2018.
وتقدري تنسقيهم في لوك بسيط جدا وانيق في نفس الوقت, ممكن تلبسيهم على جينز او بنطلون كلاسيك او بنطلون جلد ومعاهم بلوفر او تيشيرت, وممكن تضيفي لهم لمسة كده عشان تظهري اللوك اكتر وتلبسي سكارف او حزام جلد او اكسسوار يمشي معاه, وممكن تلبسي البليزر على جيبة ماكسي سادة لو انتي من محبات الجيبات.
ممكن تلبسيه بلوك كاجوال مع سنيكرز, او تلبسيه بلوك كلاسيك لخروجاتك بعد الضهر مع انكل بوت.
ومن اكتر الخامات المفضلة للستايل ده هو خامة الصوف بيبقى شكله شيك جدا وفي نفس الوقت بيدفي في الايام البرد ومريح في اللبس.
ولازم نخلي بالنا واحنا بنسق القطعة اللي تحت البالطو او البليزر المربعات انها تكون سادة, لانه مينفعش ننسق تحتها حاجة تكون برسومات او تصاميم كتير او مربعات بردو لان اللوك هيطلع اوفر جدا ضروري ننسق تحتها قطعة بلون واحد بس.
ومن اكتر الالوان التريندي جدا للبالطو والبليزر المربعات هي الوان الشتا الدافية اللي متعودين عليها زي درجات البني والبيج, والالوان المحايدة زي الرمادي والاسود في رمادي, كمان الالوان الزاهية والباستيل من الالوان الموضة جدا للبنات اللي بيحبوا اللوك المختلف والمميز هيناسبهم جدا الالوان دي.