5 طرق فعالة تقدري توقفي بيهم نوبات القلق والتوتر
القلق يعتبر دلوقتي من المشاكل الصحية العقلية اللي منتشرة بشكل كبير جدا على مستوى العالم, والقلق بيكون عبارة عن الخوف من المستقبل واننا مش عارفين ايه اللي مستنينا في الايام الجايه, وللاسف ده بيأثر علينا بشكل سلبي جدا لما تركزي عقلك كله في التفكير في المستقبل, وعادة الاشخاص بيعانوا من نوبات القلق دي بالليل قبل النوم بشكل خاص, في الوقت ده تبدأ كل الافكار السلبية والمقلقة تيجي في دماغنا, وتفضلي تفكري يا ترى ايه اللي هيحصل بكره؟ وازاي اقدر اتغلب على المشاكل دي؟ وده اكيد بيخليكي صعب تنامي وبيأثر عليكي صحيا بشكل سلبي, عشان كده النهاردة هنقولك على 5 طرق توقفي بيهم نوبات القلق بشكل فعال جدا.
طرق توقفي بيهم نوبات القلق:
1- كافحي الافكار اللي بتسبب لك القلق:
لازم نعرف ان القلق بيتغذى على نفسه يعني لو سمحتي للافكار السلبية انها تكبر في عقلك وتتراكم فكرة ورا التانية هينتهي بيكي الامر للجنون, وانتي الوحيدة اللي ليكي القدرة انك توقفي القلق ده, اول حاجة لازم تتعلمي انك توقفي الافكار السلبية, وتمرني مخك انه يبطل تفكير, يعني اول ما تحسي انك بدأتي تفكري اسألي نفسك كده هل الموضوع مستاهل ياخد كل التفكير والقلق ده كله منك؟ ووقفي التفكير عن الماضي والمستقبل وخليكي في الوقت الحاضر اللي انتي عايشة فيه, وحاولي تتصوري حياتك كده هيبقى شكلها ايه من غير مخاوف ولا قلق.
لوده منجحش معاكي وعرفتي توقفي الافكار السلبية, هاتي ورقة وقلم وابدأي اكتبي كل اللي في بالك وحاسه بيه, وايه اللي ممكن تعمليه لحل الوضع او المشكلة, طريقة الكتابة بتخليكي تقدري تحددي المشكلة اكتر وتعرفي كل ابعادها عشان تقدري توصلي لحل, وكمان الكتابة هتساعد انها توقف نمو الافكار السلبية في عقلك لانك هتخرجيها كلها على الورق, وممكن كمان تكتبي اهدافك وازاي عايزة تحققيها.
2- التأمل والتنفس:
التأمل يعتبر من اكتر الطرق المنتشرة والفعالة جدا للتخلص من نوبات القلق, لو مارستي التأمل بانتظام بشكل يومي هيساعد في تقليل التوتر والقلق, وهيحسن حياتك كلها بشكل عام, لو عندك نوبات قلق والتأمل مش الممارسة المفضلة ليكي او مش قادرة تعمليها ممكن تجربي تكنيك التنفس هيكون مفيد جدا للاسترخاء قبل النوم, لكن كمان تقدري تمارسي التنفس في اي مكان واي وقت اول ما تحسي انك تحت ضغط او قلقانة, ممكن تغمضي عينك وتاخدي اكتر من نفس ورا بعض ببطء, هتلاقي عقلك وجسمك اتحسنوا جدا.
3- اطلقي المواد الكيميائية المفيدة للمخ:
مجرد ما بتمارسي رياضة وجسمك بيبقى في حالة حركة, بيبدأ الجسم يطلق الاندروفين والسيروتونين ودي الانزيمات اللي موجودة في المخ ومرتبطة بمشاعر السعادة والمتعة, لانها بتساعد على تسخين الجسم كله وبتخفف من التوتر في العضلات, كمان المجهود البدني يعتبر وسيلة هايلة جدا للتركيز على الحاضر او اللحظة اللي انتي فيها بس, ممكن تمارسي رياضة المشي, الجري, ركوب العجل.
4- العلاجات العشبية:
جربي العلاجات العشبية الطبيعية اللي بتساعد على الاسترخاء وبتخفف من التوتر, زي شاي البابونج, شاي اللافندر او الخزامي, النعناع, الزنجبيل, الشاي الاخضر, شاي الجنسنج, هتساعدك جدا على تخفيف القلق والتوتر والعصبية وتخليكي تنامي بشكل اسرع وافضل بكتير.
5- اتجنبي الكافيين:
الابحاث اثبتت ان الكافيين بيزود من مستويات القلق والتوتر عند الاشخاص اللي بيعانوا من نوبات قلق مزمن, والكافيين يعتبر منبه ممكن يزود حالة العصبية, وبيسبب عدم انتظام ضربا ت القلب, ده غير انه بيسهر ومش هيخليكي تعرفي تنامي وده هيأدي بطبيعة الحال لزيادة القلق, عشان كده الافضل انك تستبدلي الكافيين بواحد من المشروبات العشبية اللي قولنا عليها هتكون افضل ليكي.