7 علامات بتقول انك بتعيشى أفضل علاقة فى حياتك

كلنا طول الوقت بنحتاج نشتغل على علاقتنا و ارتباطاتنا و نقويها علشان تبقى قوية وتتحمل اى مشاكل او ازمات، لانه الحب يستاهل اننا نتعب علشانه و نحافظ عليه، فلو عايزة تقيمى علاقتك و تعرفى ان كانت سعيدة ولا لاء، فى المقال ده اعرفى 7 علامات لو موجودة يبقى انتى بتعيشى أفضل علاقة فى حياتك..

7 علامات بتقول انك بتعيشى أفضل علاقة فى حياتك 

1- بتتكلمى عن اى حاجة فى دماغك  : 

العلاقات الصحية هى أساس كل حاجة، و علشان تبقى علاقتك مع خطيبك او جوزك صحية لازم تتواصلوا مع بعض و ماتخافوش تتكلموا و تعبروا عن أى حاجة فى دماغكم و اى حاجة بتحسوا بيها، قلة الكلام هى اللى بتولد الزعل و المشاكل و بتموت الحب، علشان كده لو لاقيتى نفسك بتقدرى تتكلمى معاه عن اى حاجة فى دماغك اعرفى انه انتى بتعيشي أفضل علاقة فى حياتك. 

2- مساحتك الشخصية موجودة : 

حتى لو كنتوا بتحبوا بعض جدا و بتشتاقوا لبعض ومش قادرين تبعدوا عن بعض ولا ثانية، مهم انه يبقى فى عندك مساحتك الشخصية اللى تقدرى فيها تقعدى مع نفسك تعملى حاجة بتحبيها، تخرجى لوحدك، تقرأى او تشوفى أصحابك و تقضى وقت معاهم من غير ما يكون شريكك فوق راسك طول الوقت، ونفس الكلام بالنسبه له هو كمان، علشان كده لو حاسين انه كل حد فيكم بيتمتع بمساحته الشخصية الخاصة بيه يبقى انتم علاقتكم صحية و ناجحة. لازم تدوا لنفسكم وقت انكم توحشوا بعض. 

3- مبسوطة بعلاقتكم زى ما هى : 

لازم تكونوا انتوا الاتنين مبسوطين بطبيعة علاقتكم زى ماهى، من غير ما يكون فى حد فيكم مش راضى عنها من غير ما يقول كده و بيخبى، او تكونى انتى متضايقة و مستنية انه مع الوقت علاقتكم تتغير للاحسن، مهم تكونوا راضيين طول الوقت عن علاقتكم و بتحبوها بكل تفاصيلها وانه لو قابلتكم مشكلة تشتغلوا مع بعض علشان تواجهوها و تحلوها، فلو ده بيحصل معاكى يبقى انتى فى علاقة سعيدة.

4- بتاخدوا كل قراراتكم مع بعض : 

فى العلاقات السعيدة لازم يكونوا الشريكين بياخدوا قراراتهم الحياتية مع بعض و بيفكروا فيها سوا مهما كانت كبيرة او صغيرة طالما مش قرارات شخصية و بتمسهم هما الاتنين. 

5- علاقتكم متوازنة : 

العلاقات الغير متوازنة بتسبب احساس كبير بالاحباط و الفشل و عدم الرضا، زى ما يكون مثلا فى طرف مسؤول عن كل أعمال البيت من غير ما الطرف التانى يساعده فى اى حاجة ، فى حين انه الطرف التانى شايل على كتافه هم توفير الفلوس و الحياة الكريمة، علشان كده مهم انكم تكونوا متشاركين فى كل حاجة و علاقتكم متوازنة و بتساعدوا بعض، توازن العلاقة واحدة من اهم العلامات لأى علاقة صحية و سعيدة. 

6- بتثقوا فى بعض : 

العلاقات القوية لازم تكون مبنية على الثقة، وبنقصد هنا الثقة بمفهومها الواسع بين الطرفين، يعنى تبقى واثقة فيه انه مش هيخونك ولا هيعمل الحاجات اللى بتضايقك و بتأذيكى عن قصد وانك تبقى واثقة انك تقدرى تتكلمى معاه فى كل و اى حاجة من غير ما تبقى خايفة انه يحكم عليكى او يفكر فيكى غلط. 

7- قريبين لبعض : 

لازم تبقوا قريبين من بعض بأى طريقة ممكنة، وتبقوا بتستمدوا من بعض الثقة و القوة و الدعم  وتفهموا وتحسوا ببعض فى كل حاجة، انكم تبقوا قريبين لبعض دى علامة على انه علاقتكم صحية جدا و سعيدة. 

شوفى معانا كمان الفيديو ده .. 

اعرفى معانا كمان 5 حاجات هتحصلك لما تقابلي توأم روحك