5 حاجات تخليكى تفضلى قوية و تكملى لو حاسة انك خلاص هتستسلمى !

بقلمآية حسان فيمنوعات visibility956

الاوقات الصعبة اللى بتمر علينا كتير، ومشاكل الحياة سواء فى الشغل او فى البيت مابتخلصش، ولانه ساعات كتير بنحتاج حاجة تفكرنا اننا اقوياء و نقدر نتحمل ، فى المقال ده بنات حوا هتقولك على  5 حاجات تخليكى تفضلى قوية و تكملى لو حاسة انك خلاص هتستسلمى !

5 حاجات تخليكى تفضلى قوية و تكملى لو حاسة انك خلاص هتستسلمى ! 

1- الابتلاء ساعات بيبقى هو الطريق للنجاح : 

علشان النهار يطلع لازم نشوف الليل، ولأننا مش هنقدر النجاح الا لما نمر بالفشل ونعرف قساوته يبقى لازم تعرفى انه كل مشكلة بتقعى فيها وكل ابتلاء هو اختبار لقدرة تحملك مش أكتر، و انه الضربات هى اللى بتعلم و بتقوى و هتخليكى أقوى. علشان كده لو حسيتى انه من كتر المشاكل كل الطرق بقت مسدودة وانه مفيش مخرج، ماتستسلميش ! 

2-  فاكرة الوقت اللى كنتى فاكراه مش هيعدى؟ اهه عدى و الازمة انتهت  :

أوقات كتير بنقلل من قدرتنا على تحمل المشاكل واننا نقدر نحلها، و بنتحيل انه الوقت الصعب ده مش هيعدى وانه الحزن و الازمة هيستمروا كتير، لكن الحقيقة هى العكس، الدراسات النفسية أثبتت انه الناس عندها قدرة انها تنجو من الازمات و تعدى الاوقات الصعبة فى وقت أقل بكتير من اللى هما بيتوقعوه، وده معناه اننا قدامنا وقت كتير اوى علشان نفهم مشاعرنا و نتعامل معاها صح، المهم انه ماتستسلميش للحزن، لانه كل يوم فى بكرة جديد و كل يوم معناه انك نجيتى و قدرتى تعدى يوم كمان، أنت اقوى بكتير مما تتخيلى. 

3- المشاكل مش هتوقفك،ساعات ممكن تدلك على الطريق الصح : 

حاجة  كمان من حاجات تخليكى تفضلى قوية لازم تفتكريها طول الوقت انه المشاكل ماتقدرش توقفك، بالعكس ده ممكن تكون هى العلامة اللى تخليكى تعرفى انه انتى محتاجة تغيرى الطريق اللى انتى ماشية فيه و تدلك على الطريق الصح ، خلينى أسألك سؤال، لما تقابلك مشكلة فى حياتك، ايه اول حاجة بتعمليها ؟ كتير مننا بيطلعوا زهقهم فى الاكل او فى الشوبينج او بيروحوا لأقرب صديق ليهم و يحكوله، المهم انه الحلول دى فى معظمها محاولات للهروب مش لحل المشكلة، مفيش مانع تتكلمى و تنفسي عن نفسك، لكن لما تهدى لازم ترجعى تانى تواجهى المشكلة و تفكرى فى حل ليها، لانه المشاكل موجودة ببساطة علشان تعرفنا انه الطريق اللى احنا ماشيين فيه ممكن يكون غلط و محتاج يتغير او محتاج طريقة جديدة للتعامل معاه. 

4 – لو حاجة ضاعت منك، فكرى فى كل النعم اللى باقية معاكى : 

اوقات الازمات عينينا مابتشوفش غير المشاكل و بتنسى كل الحاجات التانية الحلوة اللى فى حياتنا، علشان كده لما تضيع منك حاجة او تحسي انك فى ازمة او فى مشكلة كبيرة، خدى دقيقة و فكرى فى كل النعم اللى موجودة فى حياتك و ساعتها المشاكل دى هتحسي انها اقل كارثية و مش ضخمة اوى زى ما كنتى فاكرة الاول، احمدى ربنا على كل نعمة فى حياتك و الاوقات الصعبة افتكرى انه مسيرها هتعدى. 

5- ماتستسلميش علشان فصل  واحد سئ فى حياتك، القصة لسه مانتهتش : 

لما تحسي انه خلاص انتى بتقعى و الدنيا ضاغطة عليكى زيادة عن اللزوم ، افتكرى دايما انه علشان الماس يخرج من الفحم بيحتاج ضغط كبير جدا و لما يطلع للنور بيحتاج ضغط وشغل تانى كتير علشان يبقى مصقول و بيلمع و قيمته تعلى ، وانت ماسة ، علشان كده ماتستسلميش علشان فى فصل واحد سيء فى حياتك، القصة مليانة فصول و لازم ان شاء الله تبقى نهايتها سعيدة. 

شوف معانا كمان 7 علامات بتثبت انك ناجحة لو كنتى فاكرة عكس كده