انواع مختلفة من الجاكيت والسويتر لموضة الشتا
مع موسم الشتا طبعا بنلبس الملابس اللي تدفينا وفي نفس الوقت تكون مريحة وشكلها انيق وشيك, والجاكيت والسويتر من القطع الاساسية في موسم الشتا اللي منقدرش نستغنى عنها, عشان كده النهاردة من خلال موضوعنا جايبين لكل بنات حوا انواع الجاكيت والسويتر المناسبة لدرجات الحرارة المختلفة خلال موسم الشتا, وستايلات مناسبة لكل انواع الاجسام.
انواع الجاكيت والسويتر لموضة الشتا:
1- الجاكيت المبطن Quilted Jacket:
النوع ده من الجاكيت بيكون مبطن من جوه عشان يدفي في الايام البرد, وبيكون في منه اكتر من خامة زي الجلد, الصوف, البوليستر, والستايل ده من الجاكيت يمشي على الجسم الطويل النحيف, وممكن تنسقيها مع البنطلون الجينز او الجلد.
2- البليزر:
البليزر من القطع اللي لازم تكون موجودة في دولاب كل بنت, لانه من الستايلات الشتوية المريحة جدا وخصوصا للوك الفورمال اليومي للشغل, تقدري تنسقيه مع بنطلون او جيبة او حتى مع ليجينج بردو هيطلع شكله انيق.
3- ال Trench Coat:
ال Trench coat او البالطو الواقي من المطر من كل انواع الجواكيت الشتوية يعتبر من اكتر القطع اللي ممكن تعملي بيه لوك انيق جدا من غير اي مجهود ومناسب لكل الاوقات, وفي نفس الوقت وزنه خفيف مش تقيل, وممكن تنسقيه على البلوزات او السويتر, والستايل ده من البالطو هتلاقي منه خامة صوف اكتر سمك شوية وهيكون مناسب جدا للاماكن اللي فيها برد اكتر, ممكن تختاري البالطو بالالوان المحايدة الشتوية وتنسقي معاه اكسسوارات شتوية زي السكارف والقبعة للوك انيق.
4- ال Hoodies:
ستايل ال Hoodies من الستايلات العملية جدا وفي نفس الوقت بتدفي جدا في الشتا لانه بيكون نازل بزونط لتغطية الراس ومعمول من جوه بخامة الصوف, وكمان نازل منه الوان زاهية وحلوة بخلاف الوان الشتا التقليدية عشان يدي حياة شوية للوك الشتوي بتاعنا, وبيكون حلو جدا لو نسقتيه مع سكيني جينز وسنيكرز, وكمان بيكون مطبوع بكلمات وشعارات حلوة او بتدريج الوان, ومناسب جدا للجامعة او السفر لانه عملي جدا.
5- الجاكيت الجينز:
الجاكيت الجينز الكلاسيكي القديم جاله فترة اختفى شوية لكن من كام سنة رجع موضة تاني كقطعة شتوية, والجاكيت الجينز من اكتر انواع الجواكيت اللي بتلبسها النساء في كل انحاء العالم, ونازل منه ستايل الجاكيت اللي بيكون فرو من جوه عشان يدفي اكتر في الايام البرد اوي, ومثالي ومناسب جدا لكل انواع الاجسام وانواع الطقس المختلفة.
6- ال Windcheater:
القطعة دي اساسا معمولة للحماية من الرياح والغبار والمطر, ومناسبة جدا للاشخاص اللي بيحبوا يقضوا وقت في الهوا او في مكان مفتوح في ايام الشتا, وممكن تلبسيه فوق اي قطعة عندك لو حابه تتمشي في مكان مفتوح هو يمكن مش بيدفي بشكل كافي لكن ليه مميزات تانية انه هيحميكي من العوامل الخارجية زي المطر, الشمس, الرياح, الغبار, وممكن تجيبي منه الالوان المحايدة عشان تقدري تنسقيه على اكتر من قطعة عندك.
7- ال Bomber Jacket:
النوع ده من الستايلات المفضلة عند كتير من البنات لان شكله عصري وانيق, وتقدري تختاري منه الستايل المطبوع بالورود, او الالوان المحايدة عشان تقدري تنسقيه على اي لبس عندك.
8- البالطو الفرو:
البالطو الفرو من القطع الشتوية الفخمة والانيقة جدا, وهنلاقي متوفر منه الوان كتير جدا اللي ممكن تنسقيها مع الفساتين خصوصا مع ال Slip dress.
9- الجاكيت الجلد ال Biker Jacket:
النوع ده من الجواكيت يمكن يكون في بنات بيشوفوا انه يمشي مع الشباب اكتر من انه بناتي, لكن بالعكس الستايل ده بيطلع انيق جدا مع الفساتين والجيبات الماكسي, وكمان البنطلونات الجينز او الكلاسيك.
10- الكارديجان:
الكادريجان من القطع التريندي جدا بقالها فترة, لانه من الستايلات اللي سهل جدا تنسقيها على اي قطعة عندك, يعني لو عايزة تعملي لوك طبقات شتوي انيق اكيد اختيارك هيكون هو الكارديجان, ممكن تنسقي كارديجان سادة مع فستان مطبوع بيطلع لوك شيك جدا.
11- ال Quilted Ethnic Jacket:
نوع تاني من الجواكيت المبطنة اللي ممكن تنسقيها مع السكيني جينز, البنطلونات الكلاسيك, الليجينج, الجيبات, والفساتين, هتديكي لوك انيق وبيدفي في نفس الوقت, والنوع ده بيكون مصنوع من خامة القطن الخالص وبيكون مبطن بألوان كمان عشان يدي الجاكيت جاذبية اكتر.
12- الكارديجان الطويل:
احنا اتكلمنا على الكارديجان القصير نازل كمان ستايل الكارديجان الطويل اللي تقدري تنسقيه على اي قطعة ملابس عندك مع بوت وقبعة وتعملي لوك شتوي انيق بابسط واسهل طريقة, ومن الحاجات التريندي جدا هو الكارديجان المطبوع ال Aztec prints اللي بننصحك تشتري منه قطعة للموسم ده.
13- ال Turtleneck:
السويتر رقبة السلحفة تعتبر من القطع الاساسية لموسم الشتا, واللي تقدري تنسقيها مع اي نوع من انواع الجواكيت الشتوية اللي قولنا عليها, لو عندك سويتر بستايل Turtle neck بألوان محايدة بننصحك تختاري الوان زاهية واكتر جرأة هتغير اللوك بتاعك كله وتظهره اكتر, والستايل مناسب جدا للجو البرد لانه بيبقى مدفي الرقبة من الهوا البارد.
14- السويتر الصوف:
لو مش بتحبي ستايل السويتر الطويل يبقى اكيد النوع ده من السويتر هيكون هو الاختيار المناسب ليكي, السويتر الصوف تقدري تلبسيه بكل بساطة فوق معظم القطع, ممكن تنسقي تحته بلوزة بسيطة عشان تعملي لوك طبقات انيق, ومناسب جدا للوك فورمال للشغل.
والقايمة دي تعتبر دليل لكل البنات لانواع الجواكيت والسويتر المختلفة لموسم الشتا اللي تقدري تختاري منها اللي تحبيه او يناسبك اكتر, وقولي لنا اي جاكيت او سويتر منهم هو المفضل عندك او تحبي يكون عندك.