لوك مكياج كامل باستخدام درجة لون واحدة

احنا دايما متعودين في المكياج بنستخدم اكتر من درجة واكتر من لون بنحاول نختار الالوان المتناسقة مع بعض من الاييشادو والبلاشر والروج ونعمل بيها اللوك بتاعنا, لكن النهاردة هنشوف مع بعض لوك مكياج كامل بدرجة لون واحدة بس لمكياج ناعم وبسيط وهندمج في اللوك ما بين المات والميتاليك لنفس درجة اللون.

لوك مكياج كامل بدرجة لون واحدة:

– الحاجات اللي هنحتاجها:

1- ايشادو مات بلون بني دافي, بدرجتين فاتح وغامق.

2- ايلاينر سايل نحاسي معدني او برونزي لخط الرموش اللي فوق.

3- قلم ميتاليك نحاسي او برونزي لخط الرموش اللي تحت.

4- بلاشر بودر باللون الخوخي او البني الدافي نفس درجة لون الايشادو.

5- روج باللون الخوخي النيود نفس درجة البلاشر.

– الخطوات:

1- اول خطوة طبقي درجة الايشادو البني الفاتح المات على الجفن اللي فوق كله, وعلى خط الرموش اللي تحت.

2- حطي درجة بني غامق دافي على تنية الجفن اللي فوق.

3- ارسمي الايلاينر البرونزي المعدني على خط الرموش اللي فوق, وممكن ترسمي جناح الايلاينر لو حابة تظهري الرسمة اكتر.

4- بالقلم البرونزي ارسمي تحت خط الرموش اللي تحت, وعلى الجفن اللي تحت من جوه.

5- حطي البلاشر الخوخي على تفاحتين الخد.

6- اخر خطوة هتحطي الروج باللون الخوخي النيود.

اتعلمي خطوة بخطوة بالصور والفيديو مكياج يومي للوك رائع