10 وصفات طبيعية فعالة لتفتيح الرقبة

ريهام محمود
ريهام محمود
في
بشرة
5773

كل البنات اكيد بيهتموا ببشرتهم وبيكون التركيز عليها في العناية بالماسكات وغيرها من منتجات العناية البشرة, لكن في مناطق تانية في الجسم بتكون مهملة او مش بتاخد عناية كفاية زي الرقبة من الاماكن اللي مش بنهتم بيها خصوصا المنطقة اللي ورا من الرقبة لانها بتكون تحت الشعر فبننساها في الغالب او بنهملها ومش بتاخد عناية كافية زي البشرة, وده بيأدي في النهاية لتصبغ لون الرقبة وغمقانها وظهور البقع والتجاعيد, عشان كده النهاردة هنقول لكل بنات حوا اللي بيعانوا من غمقان او تصبغ الرقبة او البقع الداكنة 10 وصفات طبيعية لتفتيح الرقبة بشكل فعال جدا.

– تعالوا نتعرف الاول على اسباب غمقان او اسمرار الرقبة:

في اسباب كتير جدا ممكن تسبب غمقان الرقبة ممكن تختلف من شخص للتاني, لكن في معظم الحالات بيكون سببها هو اهمالها او عدم العناية بيها بشكل كافي ده واحد من اكتر اسباب غمقان الرقبة بالاضافة لمجموعة اسباب تانية زي

1- زيادة الوزن.

2- التعرض كتير لاشعة الشمس من غير حماية.

3- ممكن يكون بسبب مشاكل صحية زي الغدة الدرقية اللي ممكن تأدي لتصبغ جلد الرقبة.

4- مرض السكر.

5- اسباب وراثية.

6- تلوث البيئة.

7- المواد الكيميائية الموجودة في بعض مستحضرات التجميل والمبيضات.

8- سوء النضافة.

9- التهابات الجلد الفطرية او البكتيرية.

10- الاختلالات الهرمونية.

وصفات طبيعية لتفتيح الرقبة 1
وصفات طبيعية لتفتيح الرقبة 1

– وصفات طبيعية لتفتيح الرقبة:

اولا وقبل اي حاجة لازم الاهتمام بنضافة الجسم كله, وتحافظي عليه دايما نضيف بانك تاخدي شاور كل يوم, ولو خرجتي واتعرضتي للتراب متنسيش تاخدي شاور قبل النوم, يعني حاولي تدي العناية الكافية للجسم كله عشان المشكلة مترجعش تاني بعد استخدام الوصفات.

1- ماسك الكركم:

الكركم من اكتر المكونات اللي بيستخدموا الهنود من قبل ظهور كريمات التفتيح, وهو مش بس بيساعد على التفتيح كمان مطهر وبيمنع التهابات الجلد, ويعتبر من اكتر العلاجات الطبيعية الفعالة في تفتيح الرقبة.

المكونات:

كركم “كمية على قد ما تكفي الرقبة”.

لبن رايب او زبادي.

الطريقة:

في بولة او طبق صغير حطي الكركم وضيفي عليه اللبن الرايب او الزبادي بالتدريج لحد ما يتكون عندك ماسك كريمي ناعم مش سميك ولا خفيف, طبقي الماسك على الرقبة وممكن كمان تحطي منه على الوش, سيبيه لمدة 15 دقيقة, وبعدين اغسليه بمية دافية, كرري الماسك يوميا لحد ما توصلي للنتيجة اللي انتي عايزاها.

وصفات طبيعية لتفتيح الرقبة 2
وصفات طبيعية لتفتيح الرقبة 2

2- ماسك اللوز:

اللوز كمان واحد من المكونات الطبيعية اللي بتساعد جدا على تفتيح الرقبة, لانه بيحتوي على الفيتامينات والمعادن الاساسية المفيدة جدا لصحة الجلد, واللوز مصدر غني جدا لفيتامين E المعروف بفوايدة للبشرة وهنلاقيه بيستخدم في كتير من منتجات العناية بالبشرة.

المكونات:

2 معلقة صغيرة لوز.

عسل نحل.

1 معلقة صغيرة لبن بودرة.

الطريقة:

انقعي اللوز الاول في مية دافية من بالليل للصبح عشان يطرى, اطحنية لحد ما يتكون عندك عجينة خشنة, في طبق صغير اخلطي اللوز مع اللبن البودرة وضيفي عليهم العسل بالتدريج لحد ما يتكون عندك عجينة سميكة, حطي الماسك على الرقبة وسيبية من 20 – 30 دقيقة, وبعدها اغسليه بمية دافية, كرري الماسك مرتين في الاسبوع.

وممكن تدهني الرقبة كل يوم قبل النوم بزيت اللوز الحلو, بيساعد جدا على التفتيح وترطيب البشرة.

وصفات طبيعية لتفتيح الرقبة 3
وصفات طبيعية لتفتيح الرقبة 3

3- ماسك جل الالوفيرا:

الالوفيرا ليه فوايد هايلة جدا في ترطيب وتغذية البشرة, وعلاج اي ضرر ناتج عن الجفاف, غني جدا بالمواد المضادة للاكسدة اللي بتمنع علامات الشيخوخة وبتحسن صحة الجلد, والالوسين الموجود في الالوفيرا بيمنع تصبغ الجلد وبتحسن لون البشرة بشكل كبير.

كل اللي هتحتاجيه جل الصبار بس, ادهنية على الرقبة مع التدليك لمدة 10 دقايق, وبعدين اغسليه بالمية, كرري الماسك كل يوم لافضل النتايج.

وصفات طبيعية لتفتيح الرقبة 4
وصفات طبيعية لتفتيح الرقبة 4

4- ماسك الخيار:

الخيار بيحتوي على خصائص تبريد بتساهد على تهدئة الجلد, واصلاح الخلايا التالفة, وازالة الجلد الميت اللي ممكن يسبب غمقان الرقبة.

كل اللي هتحتاجيه الخيار بس, ابشريه وصفيه طلعي منه العصير بتاعه, بقطعة قطن خدي من العصير وادهني بيه الرقبة, سيبيه لمدة 20 دقيقة, وبعدين خدي تاني من عصير الخيار وادهني طبقة تانية مع تدليك الرقبة لمدة 5 دقايق كمان, وبعدين اغسليه بالمية, كرري الماسك يوميا هتوصلي لنتايج هايلة جدا.

وصفات طبيعية لتفتيح الرقبة 5
وصفات طبيعية لتفتيح الرقبة 5

5- ماسك عصير البطاطس:

عصير البطاطس بيحتوي على خصائص طبيعية مبيضة للبشرة, وممتاز جدا لازالة التصبغات والبقع الغامقة من الجذور.

هاتي ثمرة بطاطس ابشريها وصفيها استخرجي منها العصير, ادهني الرقبة بالعصير مع التدليك لمدة دقيقتين, بعدها ادهني طبقة تانية من العصير وسيبيها لحد ما تنشف, بعدها اغسليها بمية دافية, كرري الماسك يوميا.

وصفات طبيعية لتفتيح الرقبة 6
وصفات طبيعية لتفتيح الرقبة 6

6- ماسك الشوفان:

الشوفان يعتبر مقشر ومبيض للبشرة في نفس الوقت, بينضف البشرة بشكل عميق جدا, بيساعد على ازالة الجلد الميت وتنعيم البشرة, كمان باقي المكونات اللي موجودة في الخلطة اللي هي عصير الطماطم والعسل يعتبروا مكونات مبيضة للبشرة بشكل طبيعي.

المكونات:

1 كوب شوفان مطحون.

عصير طماطم.

عسل نحل.

الطريقة:

حطي كمية من الشوفان على قد ما تحتاجي في طبق وضيفي لها عصير الطماطم والعسل بالتدريج لحد ما توصلي لقوام متوسط مش سميك اوي ولا خفيف, حطي الماسك على الرقبة مع التدليك, سيبيه ينشف لمدة دقيقتين وبعدين بلي صوابعك بالمية وافركيه من على الرقبة, وبعدها اغسليه بالمية, كرري الماسك مرتين في الاسبوع.

وصفات طبيعية لتفتيح الرقبة 7
وصفات طبيعية لتفتيح الرقبة 7

7- ماسك عصير الليمون:

عصير الليمون غني جدا بفيتامين C اللي يعتبر علاج فعال جدا لازالة غمقان الرقبة, ومن اكتر المكونات اللي بتجيب نتايج سريعة جدا في التفتيح, وبيزيل التصبغات الشديدة من الجلد, لكن مشكلته الوحيدة مع البشرة الحساسة اوي ممكن يسبب لسعة شوية في الجلد.

المكونات:

عصير ليمون.

زبادي.

الطريقة:

اخلطي عصير الليمون مع الزبادي لحد ما يتكون عندك خليط متجانس, حطي الماسك على الرقبة مع التدليك لمدة من 10 – 15 دقيقة, وبعدين سيبيه ينشف, وبعدها اغسليه بالمية, كرري الماسك مرة واحدة في الاسبوع.

وصفات طبيعية لتفتيح الرقبة 8
وصفات طبيعية لتفتيح الرقبة 8

8- ماسك قشر البرتقان:

قشر البرتقان يعتبر كمان من العلاجات الفعالة جدا للتخلص من غمقان الرقبة وتفتيحها, وبيساعد على تجديد البشرة وبيحافظ عليها صحية, وبيقضي كمان على علامات حب الشباب لانه غني جدا بفيتامين C اللي يعتبر مقشر ومبيض طبيعي للبشرة.

المكونات:

قشر برتقان مطحون.

لبن كامل الدسم.

الطريقة:

جففي قشر البرتقان ولما ينشف خالص اطحنيه, خدي منه الكمية اللي محتاجاها للماسك ضيفي عليها لبن بالتدريج لحد ما يتكون عندك خليط قوامه مناسب, ادهني الرقبة بالماسك وسيبيه 15 دقيقة لحد ما ينشف, وبعدها اغسليه بمية دافية, كرري الماسك مرة واحدة في الاسبوع.

وصفات طبيعية لتفتيح الرقبة 9
وصفات طبيعية لتفتيح الرقبة 9

9- ماسك صودا الخبز او الكربوناتو:

الكربوناتو يعتبر مقشر للجلد وبيساعد على ازالة الخلايا الميتة, وعلاج فرط التصبغ وتفتيح البشرة.

المكونات:

كربوناتو.

مية.

الطريقة:

اخلطي الكربوناتو مع صودا الخبز لحد ما تتكون عندك عجينة سميكة, طبقي الماسك على الرقبة وسيبيه لحد ما ينشف, وبعدها اغسليه بمية باردة, كرري الماسك من 2 – 3 مرات في الاسبوع.

وصفات طبيعية لتفتيح الرقبة 10
وصفات طبيعية لتفتيح الرقبة 10

10- ماسك خل التفاح:

خل التفاح يعتبر كمان من الوسائل الطبيعية اللي بتساعد على تفتيح الرقبة, وبيشفي ويحسن حالة الجلد, ويعتبر علاج فعال جدا لعدوى الجلد وجفاف الرقبة, كمان خل التفاح معروف انه بيحسن درجة حموضة البشرة, وبيساعد على ازالة الخلايا الميتة, بس ضروري اننا نستخدم كريم مرطب بعد الماسك ده بشكل خاص لان ممكن الخل يسبب جفاف البشرة شوية.

المكونات:

خل التفاح.

ضعف كمية خل التفاح مية.

الطريقة:

اخلطي خل التفاح مع المية, وبقطعة قطن اغمسيها في الخليط ادهني الرقبة كويس وسيبيه لمدة من 10 – 15 دقيقة, وبعدين اغسليه بالمية, ورطبي الرقبة بكريم مرطب مناسب او ممكن تدهينها بزيت لوز حلو, كرري الماسك 3 مرات في الاسبوع.

وصفات طبيعية لتفتيح الرقبة 11
وصفات طبيعية لتفتيح الرقبة 11

وطبعا زي ما دايما بنقول لبنات حوا ان كل بشرة بتختلف عن التانية يعني اللي يجيب نتيجة مع بشرتك ممكن متجيبش مع غيرك والعكس, عشان كده ده بيظهر بالتجربة اختاري ماسك واحد من الماسكات واستمري عليه لو موصلتيش للنتيجة اللي انتي عايزاها غيريه بماسك تاني, والنتايج ممكن تاخد وقت على ما تظهر  لكن في النهاية هتوصلي للنتيجة اللي انتي عايزاها بالاستمرار والانتظام.

10 ماسكات طبيعية بالطماطم لكل انواع البشرة..لبشرة خالية من اي عيوب

ماسكات طبيعية بالطماطم
ماسكات طبيعية بالطماطم

مقالات متعلقه

5 علاجات طبيعية بتستخدمها كارينا كابور لبشرة نضرة وشباب

5 علاجات طبيعية بتستخدمها كارينا كابور لبشرة نضرة وشباب

10 نصايح جمالية دخليهم في روتينك هيفرقوا معاكي

10 نصايح جمالية دخليهم في روتينك هيفرقوا معاكي

10 وصفات طبيعية لتغذية بشرتك في الشتا

10 وصفات طبيعية لتغذية بشرتك في الشتا